މާލޭ އިންޑަސްޓްރިއަލް ވިލެޖް ސަރަހައްދުގައި ޕާކް ކޮށްފައިވާ ވެހިކަލްތައް މިއަދު ހަވީރު ހައެއް ޖެހުމުގެ ކުރިން ނެގުމަށް ހައުސިން މިިނިސްޓްރީން އަންގައިފިއެވެ.
ހައުސިން މިނިސްޓްރީން މިދިޔަ ބުރާސްފަތި ދުވަހު ނެރެފައިވާ އެންގުމެއްގައި ބުނެފައިވަނީ މާލޭ އިންޑަސްޓްރިއަލް ވިލެޖް ހިމެނޭ ސަރަހައްދަކީ، މިވަގުތު މަސައްކަތް ކުރިއަށްދާ ސައިޓެއް ކަމުން، އެ ސަރަހައްދުގެ މަގުތަކުގައި އެއްވެސް އުޅަނދެއް ޕާކު ކުރުމަކީ މަނާ ކަމެއް ކަމަށެވެ.
އިންޑަސްޓްރިއަލް ވިލެޖްގެ މަގުތަކުގައި ބަހައްޓާފައިވާ ވެހިކަލްތައް މިއަދު ހަވީރު ހައެއް ޖެހުމުގެ ކުރިން އިންޑަސްޓްރިއަލް ވިލެޖް ސަރަހައްދުން ނަގައި ހުސްކުރަން އެދޭ ކަމަށާއި، އެ ތާރީހުގެ ފަހުން އިންޑަސްޓްރިއަލް ވިލެޖްގެ މަގުތަކުގައި އެއްވެސް ވެހިކަލެއް ޕާކު ކޮށްފައި ހުރެއްޖެ ނަމަ، ހައުސިން މިނިސްްޓްރީގެ ފަރާތުން އެ ވެހިކަލެއް ނަގާ ތިލަފުއްޓަށް ގެންދާނެ ކަމަށް އެ އެންގުމުގައި ވަނީ ބުނެފައެވެ.
މީގެ އިތުރުން، އެ ވެހިކަލްތަށް ނެގުމުގަ އާއި، ގެންދިއުމުގައި ވެހިކަލްތަކަށް ލިބިދާނެ އެއްވެސް ގެއްލުމަކަަށް އެ މިނިސްޓްރީން ޒިންމާ ނުވާނެ ކަމަށް އެ އެންގުމުގައި ވަނީ ބުނެފައެވެ. މާލެ އިންޑަސްޓްރިއަލް ވިލެޖްގައި ގިނަ އަދަދެއްގެ ވެހިކަލް ޕާކްކޮށްފައިވާއިރު، އެ ވެހިކަލްތަކުގައިވެސް މިނިސްޓްރީގެ އެ އެންގުން ވަނީ ހަރުކޮށްފައެވެ.