ގއ. ކޮލަމާފުއްށީގައި އިސްކޮށް ހަރަކާތްތެރިވާ ޕީޕީއެމްގެ ބައެއް ފަރާތްތަކަށާއި އެރަށުގައި ގާއިމް ކޮށްފައިވާ ޕީޕީއެމްގެ ޖަގަހަތަކަށާއި ބައެއް ތަކެއްޗަށް ބަޔަކު ގެއްލުންދީފި އެވެ.
އެކަމާ ގުޅިގެން ޕީޕީއެމުން މިރޭ ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ އެޕާޓީގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާން ހުސެއިން މަނިކު ވިދާޅުވީ، ޕީޕީއެމްގެ ޖަގަހަތަކަށް އެހެން ޕާޓީތަކަށް ނިސްބަތްވާ ބަޔަކު ގެއްލުންދީފައިވާ ކަމަށާއި އެކަމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ.
"ޒަމާނުއްސުރެ އެރަށު [ކޮލަމާފުށީ] ގެ އެކްޓިވިސްޓުން ގޮތުގައި މަޝްހޫރުވެފައިވާ ބަޔަކު އިސްވެތިބެ މިއަދު އެރަށުގައި ހިންގި ޖަރީމާ، މިއަދުގެ އާލާތްތަކަށް ރެކޯޑްވެފައި ހުއްޓަ، ރެކޯޑްވެފަހުރި މަރުހަލާގަ އެތަންބަލާ ދެކެތިބެ، އެކަން އަޅުގަނޑުމެން ވަރަށް ހަރުކަށި އިބާރާތުން ކުށްވެރިކުރަން،" ނިހާން ވިދާޅުވި އެވެ.
ނިހާން ވިދާޅުވީ، ކޮލަމާފުށީގެ އިތުރުން އެއަތޮޅު ކޮނޑޭއާ ލ. ފޮނަދޫ އާއި އދ. މާމިނގިލީގައި ހުރި ޖަގަހަތަކަށް ގެއްލުންތަކެއް ދީފައިވާ ކަމަށެވެ. އަދި އެކްޓިވިސްޓުންނެރެ ހިންގާ އަމަލަކީ ވަރަށް ނުރައްކާތެރި އަދި އިންތިހާބަށް ނުފޫޒް ފޯރުވުމަށް ހިންގާ ވަރަށްވެސް ނޭއްގާނީ އަމަލެއް ކަމަށާއި އެކަން ހަރުކަށި އިބާރާތުން ކުށްވެރި ކުރާ ކަމަށްވެސް ނިހާން ވިދާޅުވި އެވެ.
"އަޅުގަނޑުމެން ޖަގަހައިގެ ކުރިމަތީ ހުރި ބެނާތައް ނައްތާލުމުގެ އިތުރަށް 400 އަށްވުރެ ގިނަ ހޮޅިދަނޑި ވައްޓާލައި އެއަށް ގެއްލުންދީފައިވޭ، އަދި ޖަގަހަ ކުރިމަތީ ހުރި ދިދަތަކާއި ޖަގަހަ ކުރިމަތީ ހުރި ވަރަށް ހާއްސަ މޮނިއުމަންޓެއް އެއްވެސް ވަނީ ހަލާކުކޮށްލާފަ، މިކަމުގެ ތެރޭގައި ކޮލަމާފުށީގައި ޕީޕީއެމްގެ ކަންކަމުގައި ހަރަކާތެރިވާ 10 ކުއްޖަކަށް އަނިޔާލިބި އެކުދިންނަށް ފަރުވާ ރަށުގެ ސިއްހީ މަރުކަޒުގައި ދިނުމަށް ހަރަކާތްތެރިވަމުން މިހާރުވެސް ދަނީ،" ނިހާން ވިދާޅުވި އެވެ.
ނިހާން ވިދާޅުވީ، މިމައްސަލަ މިރޭގެ ފުލުހަށް ހުށަހަޅާފައިވާ ކަމަށެވެ. ފުލުހުންވެސް ވަނީ ކޮލަމާފުށި ޕީޕީއެމްގެ ތަކެއްޗަށާއި ޖަގަހައަށް ގެއްލުންދިން މައްސަލައެއް ހުށަހެޅި ކަމަށް ބުނެފަ އެވެ. ނަމަވެސް އެކަމުގެ ތެރޭގައި އެއްވެސް ފަރާތަކަށް ގެއްލުން ލިބިގެން މައްސަލައެއް ހުށަހަޅާފައިވާ ކަމަކަށް ފުލުހުން ހާމައެއް ނުކުރެ އެވެ.