ސްޕެއިންގެ ކޯޗް ލުއިސް އެންރިކޭ، އެކުލަވާލީ ފުރަތަމަ ސްކޮޑުން އޭނާގެ ކުރީގެ ކުލަބު ބާސެލޯނާގެ ޑިފެންޑަރު ޖޯޑީ އަލްބާ އަށް ފުރުސަތު ގެއްލިއްޖެ އެވެ.
ބާސާގެ ކޯޗުގެ ގޮތުގައި އެންރީކޭ ހުރި ދުވަސްވަރު، އޭނާ އާއި އަލްބާ އާ މައްސަލަ ޖެހުނު ކަމުގެ އަޑުތަކެއް އޭރު ފެތުރުނެވެ. އަލްބާ ޓީމަށް ނުނެގުމުން އެކަމާ ބެހޭގޮތުން އެންރީކޭއާ ސުވާލު ކުރުމުން އޭނާ ބުނީ ސްކޮޑުގައި ނުހިމެނޭ ކުޅުންތިންނާ ބެހޭގޮތުން އޭނާ ވާހަކަ ނުދައްކާނެ ކަމަށެވެ.
ސްކޮޑުން ފުރުސަތު ގެއްލުނު މަޝްހޫރު އެހެން ކުޅުންތެރިންނަކީ، އެތުލެޓިކޯ މިޑްފީލްޑަރު ކޮކޭ، ރެއާލް މެޑްރިޑްގެ ލޫކަސް ވަޒްކްއޭޒް އަދި ސެލްޓަޑެވީގޯގެ އިއާގޯ އެސްޕަސް އެވެ.
ސްކޮޑުން ފުރުސަތު ލިބުނު ފާހަގަ ކުރެވޭ ކުޅުންތެރިންނަކީ ނަޕޯލީގެ ރައުލް އަލްބިއޮލް، އޭސީ މިލާންގެ ސޫސޯ އާއި ރެއާލް މެޑްރިޑްގެ ޑެނީ ސަބެޔޯސް، ރެއާލް ސޮސިއެޑާޑްގެ ޑިއޭގޯ ޔޮރެންޓޯ އަދި އެތުލެޓިކް ކުލަބު އިނިގޯ މާޓިނޭޒް އަށް ވަނީ ފުރުސަތު ދީފަ އެވެ.
އެންރިކޭގެ ޓީމުން، ފުރުސަތު ދީފައި ވަނީ ބާސާގެ ދެ ކުޅުންތެރިންނަށެވެ. އެއީ ސާޖިއޯ ބުސްކެޓްސް އާއި ސާޖީ ރޮބޭޓޯ އެވެ. ވޯލްޑްކަޕަށް ފަހު ގައުމީ ޓީމަށް ކުޅުން ހުއްޓާލާފައިވާ ޑިފެންޑަރު ޖެރާޑް ޕީކޭ އަނބުރާ ޓީމަށް ގެންނަން މަސައްކަތް ކުރި ނަމަވެސް އޭނާގެ ނިންމުން ބަދަލު ކޮށްފައެއް ނުވެ އެވެ.