މާލެއާއި ހުޅުމާލެއާ ދެމެދު އަޅާފައިވާ ތާރީހީ ބްރިޖަށް އަރައި ބްރިޖް އިހުސާސްކޮށްލުމުގެ ފުރުސަތު އާންމުންނަށް ދިނުމަށް، ހައުސިން މިނިސްޓްރީން މިއަދު ހަވީރު 4:00 ގައި ބްރިޖްގެ މައި ގޭޓު އާންމުންނަށް ހުޅުވައިލާނެ އެވެ. މިމަހުގެ ހަތްވަނަ ދުވަހު ދަތުރުކުރުމަށް ބްރިޖް ހުޅުވައިލާއިރު، އަމާންކަމާއެކު ބްރިޖްގައި ހިނގާލަން މިއީ ލިބޭނެ އެންމެ ފުރިހަމަ ފުރުސަތަށް ވާނެއެވެ.
ހައުސިން މިނިސްޓްރީގެ އޮފިޝަލަކު މިއަދު "އަވަސް" އަށް ވިދާޅުވީ، މިއަދު ހަވީރު 4:00 އާއި 6:00 އާ ދެމެދު ބޭނުން ހުރިހާ ފަރާތްތަކަށް ބްރިޖަށް އަރާލެވޭނެ ކަމަށެވެ. އެހެން ނަމަވެސް މިއަދު ބްރިޖް މަތީގައި އޮންނަނީ ހަމައެކަނި ހިނގާލުމުގެ ހަރަކާތަކަށް ވާތީ އެއްވެސް ކަހަލަ ދުއްވާ ވެހިކަލެއްގައި ބްރިޖަށް ނޭރުވޭނެ ކަމަށް މިނިސްޓްރީން ބުންޏެވެ. މީގެ ތެރޭގައި ބައިސްކަލް ވެސް ހިމެނެ އެވެ.
އެހެންނަމަވެސް ކުޑަކުދިން ގޮވައިގެން އުޅޭ ފަރާތްތަކަށް ސްޓްރޯލާ ފަދަ ފުރޮޅުލީ ގޮނޑި ގެނެވޭނެ ކަމަށް އެ މިނިސްޓްރީން ބުންޏެވެ.
"ދެ ރަށް ދެމެދުގައި އެއްކޮޅުން އަނެއްކޮޅަށް ހިނގާލަން ފުދޭ ވަރަކަށް ގިނަ އިރު ނަގާނެ. މާލެ ކޮޅުން ހުޅުލެ ކޮޅަށް ގޮއްސަ އަނބުރާލާފަ އަނެއްކާވެސް މާލެ ކޮޅަށް އަންނަން މި ޖެހެނީ. އެހެންވީމަ އަޅުގަނޑުމެން އިލްތިމާސްކުރަން ކުދިން އުރައިގެން އުޅޭ ފަރާތްތަކުގެ ފަސޭހައަށް ސްޓްރޯލާ ފަދަ ތަކެތި ގެނައުމަށް،" މިނިސްޓްރީން ބުންޏެވެ.
މިދިޔަ ބުރާސްފަތި ދުވަހުގެ ރޭ ސިނަމާލެ ބްރިޖް ރަސްމީކޮށް އިފްތިތާހުކޮށްފައިވާއިރު، ބްރިޖް މަތީގައި ދަތުރުރުކުރެވޭގޮތަށް ހުޅުވައިލާނީ މި މަހުގެ 7 ވަނަ ދުވަހު އެވެ. އޭގެ ކުރިން ތަފާތު ހަރަކާތްތައް ބްރިޖްމަތީގައި ބާއްވަން ހައުސިން މިނިސްޓްރީން ވަނީ ތާވަލުކޮށްފަ އެވެ. އެގޮތުން އިއްޔެ ވަނީ ބްރިޖް މަތީގައި ފަސް ކައިވެންޏެއް ބާއްވާފަ އެވެ. އަދި މިއަދު ހެނދުނު ވަނީ ބައިސްކަލު ބުރެއްވެސް ބާއްވާފަ އެވެ.