ޔޫތު ޗެމްޕިއަންޝިޕްގައި، މާޒިޔާގެ މައްޗަށް 1-0 ގެ ނަތީޖާ އަކުން ކާމިޔާބު ހޯދައި މުބާރާތުގައި ކުރިއަށް ދިއުމަށް ނިއު އިން ކުރާ އުންމީދު ދަމަހައްޓައިފި އެވެ.
ނިއު ކުޅުނު ފުރަތަމަ މެޗުގައި އީގަލްސް އަތުން ބަލިވީ، 4-2 ންނެވެ. އެ މެޗުގެ ވަރަށް ފަހު ވަގުތާ ޖެހެންދެން ނިއުއިން ލީޑްގައި ދެމެހެއްޓި އެވެ. އީގަލްސް މެޗު ކާމިޔާބު ކުރީ މެޗުގެ އެންމެ ފަހު 15 މިނެޓްގައި ކާމިޔާބު ކުރި ލަނޑުތަކުންނެވެ.
ރޭ ގެ މެޗުގައި، ނިއުގެ ލަނޑު މެޗުގެ 10 ވަނަ މިނެޓްގައި ކާމިޔާބު ކުރީ ޔަޒްދާން އިބްރާހީމެވެ.
މާޒިޔާ ކުޅުނު ފުރަތަމަ މެޗުގައި، އެ ޓީމު ވަނީ ގްރީން ސްޓްރީޓާ އެއްވަރު ވެފަ އެވެ. ރޭ މާޒިޔާ ބަލިވުމުން އެ ޓީމަށް ވަނީ މުބާރާތުގައި ކުރިއަށް ދިއުމަށް އުނދަގޫ ކުރިމަތި ވެފަ އެވެ. ހުކުރު ދުވަހުގެ ރޭ، ގްރީން ސްޓްރީޓާއި އީގަލްސް ކުޅުނު މެޗު ނިމުނީ ލަނޑެއް ނުޖެހި އެއްވަރު ވެގެންނެވެ.
މާދަމާ ކުޅޭ މެޗުގައި ވާދަ ކުރާނީ، މާޒިޔާ އާއި އީގަލްސް އެވެ.