ފައިނަލުގައި، ބޮޑު އިންޑިއާގެ މައްޗަށް 2-1 ގެ ނަތީޖާ އަކުން ކާމިޔާބު ހޯދައި ދެކުނު އޭޝިއާގެ ޗެމްޕިއަން ރާއްޖެއިން ހޯދައިފި އެވެ.
މިއީ 10 އަހަރަށް ފަހު، ސާފު މުބާރާތުގެ ޗެމްޕިއަންކަން ރާއްޖެއިން ހޯދި ފުރަތަމަ ފަހަރެވެ. ރާއްޖެއިން ފުރަތަމަ ޗެމްޕިއަންކަން ހޯދީ 2008 ވަނަ އަހަރު އެވެ.
ރާއްޖޭގެ ފުރަތަމަ ލަނޑު، މެޗުގެ 19 ވަނަ މިނެޓްގައި، ޖެހީ އިބްރާހިމް މަހްދީ ހުސައިން، 'ހަބޭސް އިއްބެ' އެވެ. އޭނާ ލަނޑު ޖެހީ ނާއިޒް ހަސަން 'ދާދު' ދިން ބޯޅަ އަކުންނެވެ.
ރާއްޖޭގެ ދެ ވަނަ ލަނޑު އަލީ ފާސިރު 'ސެންޓޭ' ކާމިޔާބު ކުރީ އޭނާ އާއި އެއް ރަށަކަށް ނިސްބަތްވާ، ހަމްޒާ މުހައްމަދު 'ހަމްޕް' ދިން ހިތް ގައިމު ޕާހަކުންނެވެ. ހަމްޕް އާއި ސެންޓޭ އަކީ ބ. އޭދަފުއްޓަށް އުފަން ދެ ކުޅުންތެރިންނެވެ.
ރާއްޖެއިން ވަނީ، މުބާރާތް ކުރިއަށް ގެންދިޔަ، ޑާކާގެ ބަންގުބަންދު ސްޓޭޑިއަމްގައި ތިން ފަހަރު ފައިނަލު ކުޅެފަ އެވެ. އެއީ 2003، 2009، 2018 އެވެ. ދެހާސް ނުވަ ވަނަ އަހަރުވެސް ރާއްޖެ ފައިނަލުގައި ނިކުތީ އިންޑިއާ ދެކޮޅަށެވެ.