ހުޅުމާލޭގެ ފްލެޓްތަކަށް ފައިސާ ނުދެއްކުމުން އަރާފައިވާ ޖޫރިމަނާތައް މާފުކޮށްދޭން ހުޅުމާލެ ބަލަހައްޓައި، ހައުސިން ޑިވެލޮޕްމެންޓް ކޯޕަރޭޝަން، އެޗްޑީސިއިން މިއަދު ނިންމައިފި އެވެ.
އެޗްޑީސީއިން މިއަދު ނެރުނު ބަޔާނެއްގައި ބުނީ ފައިސާ ނުދެއްކެވި ގިނަ ދުވަސްވުމުގެ ސަބަބުން ދިގު މުއްދަތަށް އަރާފައިވާ ޖޫރިމަނާ އާންމު ފަރާތްތަކަށް މާފުކޮށްދިނުމަށް ނިންމާފައިވާ ކަމަށެވެ.
އެ ނިންމުމަކީ ސަރުކާރުގެ ޕޮލިސީގެ ތެރެއިން ރައްޔިތުންނަށް ލިބެންހުރި ފަސޭހަތައް ދެނެގަނެ، ރައްޔިތުންނަށް ފުދުންތެރި ދިރިއުޅުމެއް އުޅުމުގެ މަގުފަހި ކޮށްދިނުމަށްޓަކައި، ސަރުކާރުގެ ލަފާއާއެކު، ނިންމި ނިންމުމެއް ކަމަށް އެ ކުންފުނިން ބުންޏެވެ.
"ހުޅުމާލޭގައި ދިރިއުޅުއްވާ ފަރާތްތަކަށް މިފަދަ ލުއި ފަސޭހަ ގޮތްތައް ސަރުކާރުގެ ވިސްނުމާއި އެއްގޮތަށް އެކަށަ އެޅުމަކީ މި ކުންފުނީގެ އަމާޒެއް،" އެޗްޑީސީއިން ބުންޏެވެ.
އެޗްޑީސީއިން ބުނީ އެ ނިންމުމުގެ ސަބަބުން، ތަފާތު ދަތިތައް މެދުވެރިވެގެން ފައިސާ ނުދެއްކެވި އަރާފައިވާ ޖޫރިމަނާ، އެފަދަ ރައްޔިތުންނަށް މާފުކުރެވި، ބާކީ ދައްކަން ހުރި ފައިސާ ދެއްކޭނެ ފަސޭހަ އިންތިޒާމް ތަކެއް ހަމަޖެހިގެންދާނެ ކަމަށެވެ.