ހުޅުމާލޭގައި ހިންގާ ކުޑަކުދިން ބަލަހައްޓާ މަރުކަޒު ފިޔަވަތީގައި ޖެންޑާ މިނިސްޓްރީން މެޑިކަލް ޔުނިޓެއް ގާއިމުކޮށްފިއެވެ.
މެޑިކަލް ޔުނިޓު ރަސްމީކޮށް ހުޅުވައިދެއްވީ ފިޔަވަތީގައި މިއަދު ކުރިއަށް ދިޔަ ރަސްމިއްޔާތެއްގައި ޖެންޑާ މިނިސްޓަރު ޒެނީޝާ ޝަހީދު ޒަކީއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޒެނީޝާ ވިދާޅުވީ ދައުލަތުގެ ބެލުމުގެ ދަށުގައި މަރުކަޒުތަކުގައި ދިރިއުޅޭ ކުދިންނަށް ބޭނުންވާ އަސާސީ ބޭނުންތައް ފުއްދައިދީ، އެ ކުދިންގެ ސިއްހަތާއި ދުޅަހެޔޮ ކަމަށް ސަރުކާރުން ހާއްސަ ސަމާލުކަމެއް ދެއްވާ ކަމަށެވެ. އަދި މިފަދަ މެޑިކަލް ޔުނިޓެއް ފިޔަވަތީގައި ގާއިމުކުރެވިގެންދިޔުމަކީ، މި ދާއިރާއިން ކުރަމުންދާ މަސައްކަތްތަކަށް ލިބިގެން ދިޔަ އިތުރު ކުރިއެރުމެއް ކަމަށް ވިދާޅުވިއެވެ.
މެޑިކަލް ޔުނިޓުގައި ނަރުހުން ޑިއުޓީގެ އުސޫލުން ހިދުމަތްދެއްވަމުން ގެންދާނެއެވެ. އަދި އާންމު ބަލިތަކާއި، އެނދުމަތިކޮށް ގެންދެވޭ ފަރުވާއާއި، ހެލްތު ސްކްރީނިން ހެދުމަށް ބޭނުންވާ ވަސީލަތްތައް މި ޔުނިޓުގައި ވަނީ ގާއިމުކޮށްފައެވެ.
މީގެ އިތުރުން، އައިވީއާއި، ބޭސްއެޅުމާއި، ބައެއް ޑަކްޓަރީބޭހުގެ ހިދުމަތް ވެސް މި ޔުނިޓުން ލިބެން ހުންނާނެއެވެ.
މީގެ ކުރިން، މިފަދަ ހިދުމަތްތައް ފޯރުކޮށްދެމުން ދިޔައީ ފިޔަވަތީގައި ގާއިމު ކުރެވިފައިވާ މެޑިކަލް ރޫމަކުންނެވެ.
ފިޔަވަތީގައި މި ވަގުތު 12 އަހަރުން ދަށުގެ ޖުމުލަ 91 ކުދިން ދިރިއުޅެމުންދެއެވެ.