މިހާތަނަށް އައި ޓޫރިސްޓުންގެ އަދަދު ނުވަ ޕަސެންޓް އިތުރުވެއްޖެ

މި އަހަރުގެ މިހާތަނަށް އައި ޓޫރިސްޓުންގެ އަދަދު ނުވަ ޕަސެންޓް އިތުރުވެފައިވާ ކަމަށް ޓޫރިޒަމް މިނިސްޓްރީން ބުނެފި އެވެ.

ޓޫރިޒަމް މިނިސްޓްރީން އާއްމުކުރި ތަފާސް ހިސާބުތައް ދައްކާ ގޮތުން މި އަހަރުގެ އޮގަސްޓް މަހުގެ ނިޔަލަށް 972,839 މީހުން އައިސްފައިވެ އެވެ. މިއީ މިދިޔަ އަހަރު އައި 892,025 މީހުންނާ އަޅާ ބަލާއިރު 9.1 ޕަސެންޓް އިތުރުވެފައިވެ އެވެ. އަދި މިދިޔަ އޮގަސްޓް މަހު 123,992 މީހުން އައިސްފައިވެ އެވެ. މިއީ މިދިޔަ އަހަރުގެ އޮގަސްޓް މަހު އައި 121,310 މީހުންނާ އަޅާ ބަލާއިރު 2.2 ޕަސެންޓުގެ އިތުރު ވުމެކެވެ.

ތަފާސް ހިސާބުތައް ދައްކާ ގޮތުގައި މިދިޔަ މަހު އިނގިރޭސިވިލާތުން 9,249 މީހުން އައިސްފައިވެ އެވެ. މިއީ މިދިޔަ އަހަރުގެ އޮގަސްޓް މަހު އައި 8,565 މީހުންނާ އަޅާބަލާއިރު އަށް ޕަސެންޓް އިތުރު ވުމެކެވެ. އަދި ފްރާންސުން އައީ 2,714 މީހުންނެވެ. މި އަދަދަކީ މިދިޔަ އަހަރު އައި 2,695 މީހުންނާ އަޅާބަލާއިރު 0.7 ޕަސެންޓް އިތުރުވުމެކެވެ. އަދި މި މުއްދަތުގައި ޖަރުމަނުން 6,382 މީހުން އައިސްފައިވެ އެވެ. މިއީ މިދިޔަ އަހަރު އައި 6,916 މީހުންނާ އަޅާބަލާއިރު 7.7 ޕަސެންޓް ދަށްވުމެކެވެ.

މި މުއްދަތުގައި ޗައިނާ އިން 33,472 މީހުން އައިސްފައިވެ އެވެ. މިއީ މިދިޔަ އަހަރު އައި 33,743 މީހުންނާ އަޅާ ބަލާއިރު 0.8 ޕަސެންޓް ދަށްވުމެކެވެ. އަދި އިންޑިޔާ އިން މިދިޔަ މަހު 4,299 މީހުން އައިސްފައިވެ އެވެ. މިއީ މިދިޔަ މަހު އައި 6,024 މީހުންނާ އަޅާބަލާއިރު 28.6 ޕަސެންޓް ދަށްވުމެކެވެ.

ޓޫރިޒަމް މިނިސްޓްރީން ބުނި ގޮތުގައި މި މުއްދަތުގައި ޓޫރިސްޓުންނަށް 766 ތަނަކުން ދަނީ ހިދުމަތް ދެމުންނެވެ. މީގެތެރޭގައި ހިމެނެނީ 129 ރިސޯޓާއި 482 ގެސްޓްހައުސް އަދި 144 ސަފާރީ އާއި 11 ހޮޓަލެވެ. މި ތަންތަނުގައި ޖުމްލަ 41,382 އެނދު އެބަހުއްޓެވެ.