އިންތިހާބީ ރައީސް އިބްރާހިމް މުހައްމަދު ސޯލިހުއާ، ރާއްޖޭގައި ހުންނަވާ ޗައިނާގެ ސަފީރު ޖަން ލިޖޮންގް ބައްދަލުކުރައްވައިފި އެވެ.
އިބޫގެ އޮފީހުގައި ދެބޭފުޅުން މިއަދު ބައްދަލުކުރައްވާފައިވާކަން ވަނީ ހާމަކޮށްފަ އެވެ. ރިޔާސީ އިންތިހާބުގައި އިބޫ ހޯއްދެވި ކާމިޔާބީ ފާހަގަކޮށް ޗައިނާގެ ރައީސް ޝީ ޖިންޕިން އާއި ސަރުކާރުން ވަނީ އިބޫ އަށް މަރުހަބާ ކިޔާފަ އެވެ. އަދި އިބޫގެ ސަރުކާރެއްގައި ރާއްޖެ ޗައިނާ ގުޅުން މިހާރަށް ވުރެވެސް ބޮޑަށް ހަރުދަނާ ކުރުމުގެ ޝައުގުވެރިކަން ޝީ ވަނީ ފާޅުކުރައްވާފަ އެވެ.
އިބޫ، ޗައިނާ ސަފީރާ ބައްދަލުކުރައްވާފައިވާއިރު، އިންތިހާބުގެ ދާއިމީ ނަތީޖާ އިލެކްޝަން ކޮމިޝަނުން އިއުލާންކުރެއްވުމަށް ފަހު އިބޫ ވަނީ ސަރުކާރުގެ ބައެއް ފަރާތްތަކާއި މިނިވަން ބައެއް މުއައްސަސާތަކުގެ އިސްވެރިންނާ ވެސް ބައްދަލުކުރައްވާފަ އެވެ. އެގޮތުން އެމްއެމްއޭ އާއި ޑިފެންސް މިނިސްޓްރީ އަދި ދިރާގުގެ އިސް ބޭފުޅުންނާ ވެސް އިބޫ ވަނީ ބައްދަލުކުރައްވާފަ އެވެ.
މީގެ އިތުރުން، އެމެރިކާ އިންޑިއާ އަދި ސައުދީ އަރަބިއްޔާގެ ވެރިން ވަނީ އިބޫއަށް މިހާރުވެސް މަރުހަބާ ކިޔައިފަ އެވެ. އަދި އިބޫގެ ސަރުކާރާ އެކު ގުޅުން ބަދަހި ކުރަން ބޭނުންވާކަން ވަނީ ހާމަކޮށްފަ އެވެ.