ތަރައްގީ ކުރުމަށް އާޓިފިޝަލް ބީޗް ސަރަހައްދު ބަންދުކުރަން ހައުސިން މިނިސްޓްރީން ނިންމައިފި އެވެ.
އެ ސަރަހައްދު ބަންދުކުރަން ނިންމާފައިވާކަން ހާމަކޮށް އެ ސަރަހައްދުގައި ހުރި އުޅަނދުތައް ނެގުމަށް ހައުސިން މިނިސްޓްރީން އިއްޔެ ވަނީ އަންގާފަ އެވެ.
އިއްޔެ އެ މިނިސްޓްރީން ނެރެފައިވާ އިއުލާނެއްގައި ބުނެފައިވަނީ އާޓިފިޝަލް ބީޗް ސަރަހައްދު ތަރައްގީ ކުރުމަށްޓަކައި ފެންސް ޖެހުމަށް ބޭނުންވާތީ، އަންނަ ހުކުރު ދުވަހުގެ ނިޔަލަށް އާޓިފިޝަލް ބީޗް ސަރަހައްދުގައި ޕާކްކޮށްފައިހުރި ވެހިކަލްތައް، އެތަނުންނަގާ އެސަރަހައްދު ހުސްކުރަން އަންގާ ކަމަށެވެ.
އެ ތާރީހުގެ ނިޔަލަށް ނުނަގާ ހުންނަ ވެހިކަލްތައް ފުލުހުން މެދުވެރިކޮށް ނެގޭނެ ކަމަށާއި އެގޮތަށް ނެގޭ ވެހިކަލްތަކަށް ލިބިދާނެ ގެއްލުމަކަށް މިނިސްޓްރީއިން ޒިންމާ ނުވެވޭނެ ކަމަށް ވެސް މިނިސްޓްރީން ބުންޏެވެ.
އާޓިފިޝަލް ބީޗް ސަރަހައްދު ތަރައްގީ ކުރަން ހަވާލުކޮށްފައިވަނީ އެމްޓީސީސީއަށެވެ. ފަސް މަސް ދުވަހުން އެ މަޝްރޫއު ނިންމަން ހަވާލުކޮށްފައިވަނީ 13 މިލިއަން ރުފިޔާއަށެވެ.
