އިންތިހާބީ ރައީސް އިބްރާހިމް މުހައްމަދު ސޯލިހް ރައީސްކަމުގެ ހުވާކުރެއްވުމަށް މިމަހުގެ 17 ވަނަ ދުވަހު ގަލޮޅު ދަނޑުގައި ބާއްވަން ހަމަޖެހިފައިވާ ރަސްމިއްޔާތު އާންމުންނަށް ހުޅުވާލާގޮތަށް ކުރިން ހަމަޖެހިފައި އޮތްނަމަވެސް ޖާގަ ދަތިވެ، ޖަލްސާ ބަންދުކޮށްގެން ކުރިއަށްގެންދަން ނިންމައިފި އެވެ.
އިބޫ ހުވާކުރައްވާ ޖަލްސާ ބާއްވަން ހަމަޖެހިފައިވަނީ ގަލޮޅު ދަނޑުގަ އެވެ. މިމަހުގެ 17 ވަނަ ދުވަހުގެ ހަވީރު 5:00 ގައި ގަލޮޅު ދަނޑުގައި ފެށުމަށް ހަމަޖެހިފައިވާ އެ ރަސްމިއްޔާތަށް ދަނޑުގެ ފުލް ކެޕޭސިޓީއަށް ދައުވަތުކާޑު ބަހާނެ ކަމަށް އެ ރަސްމިއްޔާތު އިންތިޒާމްކުރާ އިނޮގްރޭޝަން ކޮމިޓީން މިއަދު ވަނީ ހާމަކޮށްފަ އެވެ. އެއީ 11،500 ދައުވަތުކާޑެވެ.
އިބޫ ހުވާކުރައްވާ ރަސްމިއްޔާތުގެ ތައްޔާރީތަކާ ބެހޭގޮތުން ނޫސްވެރިންނަށް މައުލޫމާތުދެއްވަމުން، އެ ރަސްމިއްޔާތު އޮގަނައިޒްކުރާ އިނޮގްރޭޝަން ކޮމިޓީގައި ހިމެނިވަޑައިގަންނަވާ ވަކީލް ހަސަން ލަތީފް މިއަދު ވިދާޅުވީ، އިބޫ ބޭނުންފުޅުވަނީ އެމަނިކުފާނު ހުވާކުރައްވާ ރަސްމިއްޔާތުގައި ވީހާވެސް ގިނަ ފަރާތްތަކަށް ބައިވެރިކުރުމަށް ކަމަށާއި ގަލޮޅު ދަނޑުގައި ރަސްމިއްޔާތު ބާއްވަން އެދިވަޑައިގެންނެވީ ވެސް އެ މަގްސަދުގައި ކަމަށެވެ. އެހެން ނަމަވެސް ރަސްމިއްޔާތުގެ ދައުވަތު އަރުވަން ވަރަށް ބޮޑު ލިސްޓެއް އޮތުމާއެކު ކުރިން ރަސްމިއްޔާތު އާންމުންނަށް ހުޅުވާލާގޮތަށް ބާއްވަން ވިސްނި ވިސްނުން މިހާރު ބަދަލުވެފައިވާ ކަމަށް ވިދާޅުވި އެވެ. އެ ރަސްމިއްޔާތަށް މިހާރުވެސް ބޭރުގެ އެކި ގައުމުތަކުގެ އިސް ވެރިންނަށާއި އެނޫންވެސް އިއްޒަތްތެރިންނަށް ދައުވަތު އަރުވާފައިވާއިރު، ރާއްޖޭގެ ސިޔާސީ ޕާޓީތަކުގެ ވެރިންނާއި ޕާޓީތަކުގެ އެކި މަގާމްތައް އަދާކުރާ ފަރާތްތަކުގެ އިތުރުން ރާއްޖޭގެ ހުރިހާ ރަށެއްގެ ކައުންސިލަރުންނަށް ދައުވަތު އަރުވާނެ އެވެ.
އަދި ކޮންމެ ޕާޓީއަކަށް އެ ޕާޓީއެއްގެ އާންމު މެންބަރުންނަށް ދިނުމަށް ވަކި އަދަދުތަކެއް ކަނޑައަޅައި އިތުރު ޖާގަތަކެއްވެސް ދޭން ހަމަޖެހިފައިވާ ކަމަށް ހަސަން ލަތީފް ވިދާޅުވި އެވެ.
"މި ރަސްމިއްޔާތުގައި އެހެން ދައލަތްތަކުގެ އިސްވެރިންވެސް ބައިވެރިވެވަޑައިގަންނަވާތީ ސެކިއުރިޓީ ކަންކަން ވަރަށް ވަރުގަދަ ވާނެ. އެހެންވީމަ ރަސްމިއްޔާތަށް ވަދެވޭނީ ހަމައެކަނި ދައުވަތުކާޑު އޮންނަ ފަރާތްތަކަށް،" ހަސަން ލަތީފް ވިދާޅުވި އެވެ.
ހަސް ލަތީފް ވިދާޅުވީ، ހުވާކުރުމުގެ ރަސްމިއްޔާތު އާންމުކޮށް ހުޅުވާ ނުލިނަމަވެސް ރަސްމިއްޔާތު ވަގުތުން ބަލައިލެވޭގޮތަށް މާލޭގެ ދެ ތަނެއްގައި ސްކްރީން ބަހައްޓައި ރައްޔިތުންނަށް އެތަންތަނުގައި ތިބެވޭނެ އިންތިޒާމްތައް ހަމަޖައްސާނެ ކަމަށެވެ.
އިބޫ ހުވާކުރެއްވިމަށް މި ފަހުގެ ތާރީހެއްގައި ރާއްޖޭގެ ވެރިކަމަށް ވަޑައިގަންނަވާ ރައީސަކަށް ނުބާއްވާ ވަރުގެ ރަސްމިއްޔާތެއް ބާއްވާއިރު، އެ ރަސްމިއްޔާތުގައި ބައިވެރިވެވަޑައިގެންނެވުމަށް ދައުވަތު ދެއްވާފައިވާ ގިނަ ގަުމުތަކުގެ އިސްވެރިން ބައިވެރިވެވަޑައިގަންނަވާނެ ކަމުގެ އުންމީދު އެބައޮތްކަމަށް ހަސަން ލަތީފް ވިދާޅުވި އެވެ. އެހެން ނަމަވެސް ރަސްމިއްޔާތުގައި ބޭރުގެ އެއްވެސް ރައީސަކު ބައިވެރިވެވަޑައިގަންނަވާނެ ކަމުގެ ޔަގީންކަން ދެއްވައިފިތޯ ނޫސްވެރިއަކު ކުރެއްވި ސުވާލަށް ޖަވާބެއް ނުދެއްވައެވެ. ވިދާޅުވީ އެ ތަފްސީލުތައް ފަހުން ހާމަކުރާނެ ކަމަށެވެ. އަދި އެ ރަސްމިއްޔާތުގައި ރާއްޖޭގެ ކުރީގެ ހަތަރު ރައީސުން ބައިވެރިވެވަޑައިގަންނަވާނެތޯ ކުރެއްވި ސުވާލަށް ވެސް ޖަވާބެއް ނުދެއްވަ އެވެ.
އިބޫގެ ހުވާކުރެއްވުމަށް އެގާރަ ހާހަށްވުރެ ގިނަ ރަސްމީ ދައުވަތު ދޭއިރު، އެ ރަސްމިއްޔާތުގައި އިދިކޮޅު ހަތަރު ލީޑަރުން ބައިވެރިވެ ވަޑައިގަންނަވާނެ އެވެ.