މިސަރުކާރުގެ މިނިސްޓްރީގައި ތިއްބަވާ ސިޔާސީ ފަރާތްތަކަށްވުރެ އިންތިހާބީ ރައީސް އިބްރާހިމް މުހައްމަދު ސޯލިހް، އިބޫގެ ސަރުކާރުގައި 100 ސިޔާސީ މަގާމް މަދުވާނެ ކަމަށާއި އެހެންކަމުން ސިޔާސީ މަގާމްތަކަށް ކުރާ ހަރަދު 16 ޕަސެންޓް ދަށްވެގެންދާނެ ކަމަށް އިބޫގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެ އެވެ.
މާރިޔާ ވިދާޅުވީ، މިހާރު މި ސަރުކާރުގައި 700 އަށްވުރެ ގިނަ ސިޔާސީ މަގާމް އޮންނަ ކަމަށާއި އިބޫގެ ސަރުކާރުގައި ސިޔާސީ މަގާމްތަކުގައި ތިއްބަވާ ސިޔާސީ ބޭފުޅުންގެ އަދަދު މިހާރު ތިއްބަވާ އަދަދަށްވުރެ 100 މީހުން މަދުވާނެ ކަމަށެވެ.
"ހަރަދަށް ބަލާއިރު ކިހާވަރެއް ރައްޔިތު މީހާގެ ޖީބުން ސޭވް ވާނެތޯ ބައްލަވައިފިކަމަށް ވަންޏާ މި ޓްރާންސްލޭޓް ވަނީ ގާތްގަނޑަކަށް 16 ޕަސެންޓް ހަރަދު، ސިޔާސީ މުއައްޒަފުންނަށް ކުރާ ހަރަދު 16 ޕަސެންޓްވަރު ކުޑަވެގެންދާނެ ކަމަށް އަޅުގަނޑުމެން މިވަލަނީ،" މާރިޔާ ވިދާޅުވި އެވެ.
މާރިޔާ ވިދާޅުވީ، މަގާމުތަކަށް މީހުން އައްޔަން ކުރުމުގައި ވިސްނާނީ މަސައްކަތް އިތުރުވާނެ ނިސްބަތަށް ކަމަށެވެ. އިބޫގެ މިނިސްޓްރީތައް އެކުލަވާލާނީ އިތުރު މަސްއޫލިއްޔަތުތައް އިތުރުކުރާ ގޮތަށްކަމަށްވާތީ މަގާމްތަކަށް މީހުން އައްޔަން ކުރާނީ އެކަންކަން ކުރެވޭނެ ގޮތަށް ކަމަށްވެސް މާރިޔާ ވިދާޅުވި އެވެ.
އިބޫގެ ސަރުކާރުގައި 19 މިނިސްޓްރީއެއް އުފައްދަން ވަނީ ނިންމާފަ އެވެ. ރައީސް އަބުދުﷲ ޔާމީންގެ ސަރުކާރުގައި އޮންނަނީ 15 މިނިސްޓްރީއެކެވެ. އެގޮތުން އަލަށް އުފައްދާނީ ހަތަރު މިނިސްޓްރީއެކެވެ. އެމިނިސްޓްރީ ތަކަކީ، މިނިސްޓްރީ އޮފް ހަޔާ އެޑިއުކޭޝަން، މިނިސްޓްރީ އޮފް އާޓްސް ކަލްޗާ އެންޑް ހެރިޓޭޖް، މިނިސްޓްރީ އޮފް ޓްރާންސްޕޯޓް އެބްޑް ސި ވިލްއޭވިއޭޝަން، މިނިސްޓްރީ އޮފް ސައިންސް، ކޮމިއުނިކޭޝަން އެންޑް ޓެކްނޮލޮޖީ އެވެ.
މާރިޔާ ވިދާޅުވީ، ފަސް މިނިސްޓްރީއަކަށް އާ މަސްއޫލިއްޔަތު ތަކެއް ހަވާލު ކުރެވިގެންދާނެ ކަމަށެވެ. އެ މިނިސްޓްރީ ތަކަކީ މިނިސްޓްރީ އޮފް ޖެންޑާ އެންޑް ފެމެލީ އެންޑް ސޯޝަލް ސާވިސެސްއާ މިނިސްޓްރީ އޮފް ފިޝަރީޒް، މެރިން ރިސޯސް އެންޑް އެގްރިކަލްޗާއާ މިނިސްޓްރީ އޮފް ނޭޝަނަލް ޕްލޭނިންގް އެންޑް އިންފްރާސްޓްރަކްޗާއާ މިނިސްޓްރީ އޮފް ހައުސިންގް އެންޑް އާބަން ޑިވެލޮޕްމެންޓް އަދި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް ކަމަށެވެ.
މީގެ އިތުރުން ނަން ބަދަލުވާ ބައެއް މިނިސްޓްރީތައް އެބަހުރި ކަމަށާއި އެމިނިސްޓްރީތަކަކީ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގެ ނަން މިނިސްޓްރީ އޮފް ޑިފެންސްއަށް ބަދަލުވެގެންދާނެ ކަމަށެވެ. އަދި މިނިސްޓްރީ އޮފް ފިނޭންސް އެންޑް ޓްރެޝަރީގެ ނަން މިނިސްޓްރީ އޮފް ފިނޭންސްއަށް ބަދަލުވެގެންދާނެ ކަމަށާއި މިނިސްޓްރީ އޮފް އެންވާރަމަންޓް އެންޑް އެނާޖީގެ ނަން މިނިސްޓްރީ އޮފް އެންވާރަމަންޓަށް ބަދަލުވެގެންދާނެ ކަމަށް މާރިޔާ ވިދާޅުވި އެވެ. ބާކީ ހުރި މިނިސްޓްރީތަކަށް އެއްވެސް ބަދަލެއް ނާންނާނެ ކަމަށްވެސް މާރިޔާ ވިދާޅުވި އެވެ.