މިރޭގެ 12:00 އާ ހަމަޔަށް ހިޔާ ފެލެޓްތަކުގެ ލިއުން ހަވާލުކޮށް ނުނިމޭނަމަ، އެ ލިއުން ހަވާލުކުރުން މާދަމާ މެންދުރު 12:00 އާ ހަމަޔަށް ހުއްޓާނުލާ ކުރިޔަށް ގެންދިއުމަށް ނިންމާފައިވާ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ހައުސިން މިނިސްޓަރު ކުރެއްވި ޓުވީޓެއްގައި ވިދާޅުވީ، ހިޔާ ފްލެޓްތަކުގެ ލިޔުން ހަވާލުކުރުން މިރޭ 12:00 އާ ހަމަޔަށް ނިންމާލެވޭތޯ މަސައްކަތް ކުރަމުންދާ ކަމަށާއި، އެ މަސައްކަތް ނުނިމެއްޖެ ނަމަ، 17 ނޮވެމްބަރުވާ ހޮނިހިރު ދުވަހުގެ މެންދުރު 12:00 އާ ހަމަޔަށް ހުއްޓާ ނުލާ ކުރިޔަށް ގެންދަވާނެ ކަމަށެވެ.
އެކަން ކުރުމަށް ބަންޑާރަ ނައިބްގެ ގާނޫނީ ލަފާ ވެސް ލިބިފައިވާ ކަމަށް މިނިސްޓަރު މުއިއްޒު ވަނީ ވިދާޅުވެފައެވެ. މާދަމާ މެންދުރުގެ ނިޔަލަށް ފްލެޓް ލިޔުން ހަވާލުކުރަން ނިންމާފައިވާ އިރު، މާދަމާގެ ހަވީރުގެ ވަގުތެއްގައި އިންތިހާބީ ރައީސް އިބްރާހިމް މުހައްމަދު ސޯލިހުއާއި، އިންތިހާބީ ނައިބް ރައީސް ފައިސަލް ނަސީމްގެ ހުވާ ކުރުމުގެ ރަސްމިއްޔާތު އޮންނާނެ އެވެ. އެއާއެކު ރައީސް އަބުދުﷲ ޔާމީންގެ ސަރުކާރަށް ނިމުން އައިސް، އެމަނިކުފާނުގެ ކެބިނެޓް ވެސް އުވިގެންދާނެ އެވެ.
ހިޔާ މަޝްރޫއުގެ ފްލެޓްތަކުގެ ލިއުން ހަވާލު ކުރަމުންދާއިރު، އާ ސަރުކާރުން އެ ފްލެޓްތަށް ދީފައިވަނީ އޭގެ ހައްގުވެރިންނަށްތޯ ބަލާނެ ކަމަށް ވަނީ ބުނެފައެވެ. އެއާ އެކު ސަރުކާރު ބަދަލުވުމުގެ ކުރިން އެ ލިޔުންތަށް އަވަސް އަރުވާލައިގެން ދިނުމަކީ އެކަމުގައި ކޮރަޕްޝަން އެކުލެވިގެންވާ ކަމެއް ކަމަށް ބުނެ ބައެއް ފަރާތްތަކުގެ ފާޑު ކިއުންވެސް ވަނީ ހައުސިން މިނިސްޓްރީއަށް އަމާޒުވެފަ އެވެ.