ކުރީގެ ރައީސް އަބްދުﷲ ޔާމީންއާ ވަރަށް އަރިސްކޮށް މަސައްކަތް ކުރެއްވި ފަރެސްމާތޮޑާ ދާއިރާގެ މެންބަރު، ހުސެއިން މުހައްމަދު ލަތީފު ޖޭޕީއަށް ސޮއި ކުރައްވައިފި އެވެ. އޭނާގެ އިތުރުން ދަކެތި ދާއިރާގެ މެންބަރު، އިލްހާމް އަހުމަދު ވެސް މިއަދު ވަނީ ޖޭޕީއަށް ސޮއި ކުރައްވައިފަ އެވެ.
އެބޭފުޅުން ސޮއި ކުރެއްވުމުގެ ރަސްމިއްޔާތު އޮތީ މިއަދު ހަވީރުގެ ޖޭޕީގެ މައި އޮފީސް ހުންނަ، ކުނޫޒުގަ އެވެ. އެބޭފުޅުން ސޮއި ކުރެއްވި ފޯމާ ހަވާލުވެ ވަޑައިގަތީ ޖޭޕީގެ ލީޑަރު އަދި މަޖިލީހުގެ ރައީސް ގާސިމް އިބްރާހިމް އެވެ. އަދި އެ ހަފްލާގައި އެ ޕާޓީގެ ރައީސް، އަލީ ވަހީދާއި އެހެން ވެސް ބައެއް ލީޑަޝިޕްގެ ބޭފުޅުން ބައިވެރިވެ ވަޑައިގަތެވެ.
އިލްހާމް ރައްޔިތުންގެ މަޖިލީހަށް އިންތިހާބުވީ ވެސް ޖޭޕީގެ ޓިކެޓެއްގަ އެވެ. އެހެން ނަމަވެސް ފަހުން ޕީޕީއެމްއާ އެމަނިކުފާނު ގުޅިވަޑައިގެންނެވި އެވެ. ނަމަވެސް ރައްޔިތުން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަަލައިގައި ސޮއި ކުރެއްވުމަށް ފަހު އޭނާ ވަނީ ޕީޕީއެމް އިން ވެސް ވަކިވެ ވަޑައިގެންފަ އެވެ. އަދި އެކެއް ފެބުރުއަރީގެ އަމުރަށް ފަހު، ހައްޔަރު ކުރި މަޖިލީހުގެ މެންބަރުންގެ ތެރޭގައި އިލްހާމް ހިމެނެ އެވެ. އޭނާ ވަނީ ޖަލުގައި ގިނަ މަސްތަކެއް ހޭދަ ކުރައްވައިފަ އެވެ.