ދައުލަތަށް ލިބޭ އާމްދަނީ އިތުރު ކުރުމަށް މިހާރުން މިހާރަށް އިންކަމް ޓެކްސް ނަގަން ޖެހޭ ކަމަށް އޮޑިޓާ ޖެނަރަލް އިބްރާހިމް ޒިޔަތު ވިދާޅުވެއްޖެ އެވެ.
ބަޖެޓު ދިރާސާ ކުރާ ރައްޔިތުން މަޖިލީހުގެ ކޮމިޓީގައި ވާހަކަދައްކަވަމުން ޒިޔަތު ވިދާޅުވީ ޓެކްސްގެ ނިޒާމުގައި ހުރި ލީކޭޖުތައް ކުޑަ ކުރުމަށާއި ޓެކްސް ނިޒާމް ފުރިހަމަ ކުރުމަށްޓަކައި އަދި ދައުލަތުގެ އިގްތިސާދަށް ރިއާޔަތްކޮށް އިންކަމް ޓެކްސް ނެގުމަކީ މިހާރުން މިހާރަށް ކުރުން މުހިންމު ކަަމެއްގެ ގޮތުގައި ދެކޭ ކަމަށެވެ. އެކަން ކުރަން ޖެހޭ އިތުރު ސަބަބަކީ ނުހައްގު މުސްހަނދިކަން ލިބެން އޮންނަ ފުރުސަތުތައް ވެސް ވަރަށް ބޮޑަށް ހަނިވެގެންދާ ކަމަށް ޒިޔަތު ވިދާޅުވި އެވެ.
"އަޅުގަނޑުމެންނަށް މައުލޫމާތު ލިބިފައި ވަނީ ނުހައްގު މުސްހަނދިކަން ހުއްޓުވަން ގާނޫނެއްގެ މަސައްކަތް ކުރަމުންދާ ކަމާއި ވަރަށް އަވަހަށް މަޖިލީހަށް ހުށަހެޅޭނެކަން، އެކަން ވެސް ކުރެވޭނެ ކަމަށް ލަފާ ކުރެވޭ އިންކަމް ޓެކްސް ތާރަފްކޮށްގެން،" ޒިޔަތު ވިދާޅުވި އެވެ.
އިންކަމް ޓެކްސް ނެގުމަކީ މި ސަރުކާރުގެ ވައުދެކެވެ. އެކަން ކުރަން ޖެހޭނީ އެފަދަ ގާނޫނެއް ރައްޔިތުންގެ މަޖިލީހުން ފާސްކޮށްގެނެވެ.
ނަމަވެސް ކުރީގެ ފިނޭންސް މިނިސްޓަރު އަހުމަދު މުނައްވަރު ބަޖެޓު ކޮމިޓީއަށް ލަފާ ދެއްވަމުން ވިދާޅުވީ އިންކަމް ޓެކްސް ނެގުމުގެ ކުރިން ޓެކްސްގެ ނިޒާމް ވަރަށް ބޮޑަށް ހަރުދަނާ ވާން ޖެހޭ ކަމަށެވެ. އެގޮތުން އެ ގާނޫނުގައި ހުރި ލޫޕް ހޯލްސްތައް ފިލުވަން ޖެހޭ ކަމަށާއި އެ ނޫނީ އެފަދަ ޓެކްސް އެއް ނެގުން ރަނގަޅެއް ނުވާނެ ކަމަށް މުނައްވަރު ވިދާޅުވި އެވެ.