ރައީސް އަބްދުﷲ ޔާމީންް އަބްދުލްގައްޔޫމް އަވަހާރަކޮށްލުމަށް ލަންކާއިން ސްނައިޕަރެއް ގެނައި ކަމަށް ބުނެ ދައުވާކުރި މައްސަލަ ކުރިމިނަލް ކޯޓުން މިއަދު ބޭރުކޮށްލައިފި އެވެ.
މި މައްސަލާގައި ދައުވާކުރީ ކުރީގެ ނައިބު ރައީސް އަހުމަދު އަދީބާއި ލަންކާގެ ލަހިރޫ މަދުޝަންކާ އާއި މ. ލިލީޕާކް ފަޒީލު ހަމީދާއި ގ. އޮއިވާލި، އިސްހާގު ހުސެއިންގެ މައްޗަށެވެ.
މައްސަލަ ކޯޓުން ބޭރުކޮށްލާފައިވާކަން ވަކީލުން ކަށަވަރުކޮށްދިނެވެ. މައްސަލަ ބޭރުކޮށްލީ އެ މައްސަލާގައި އެކަށީގެންވާ މިންވަރަށް ހެކި ނެތް ކަމަށް ބުނެ އެވެ.
މައްސަލަ ބޭރުކޮށްލުމާއެކު އިސްހާގު ހުސެއިން އާއި ފަޒީލު ވަނީ މިނިވަންކޮށްފަ އެވެ. އަދި ލަންކާގެ މަދުޝަންކާ ވެސް ވަނީ މިނިވަންކޮށްފަ އެވެ.
އޭނާ މިނިވަންކޮށްފައިމިވަނީ ރައީސް އިބްރާހިމް މުހައްމަދު ސޯލިހުގެ ހުވާ ކުރެއްވުމުގެ ރަސްމިއްޔާތަށް ވަޑައިގެންނެވި ލަންކާ ސަރުކާރުގެ އިސް ބޭފުޅުން ޖަލަށް ވަޑައިގެން މަދުޝަންކާއާ ބައްދަލު ކުރައްވާފައިވަނިކޮށެވެ. ޖަލުގައި މަދުޝަންކާއަށް އަނިޔާކޮށް ޓޯޗާކުރި ކަމުގެ ތުހުމަތުތަކެއް ވެސް މީގެކުރިން ފެންމަތިވެފައިވެ އެވެ.
މައްސަލައާ ގުޅިގެން އެ ތިން މީހުން ވެސް ހައްޔަރުކުރީ 2015 ވަނަ އަހަރުގެ ތެރޭގައި ކުއްލި ނުރައްކަލުގެ ހާލަތު އިއުލާންކުރުމަށްފަހު އެވެ. އެ މައްސަލާގައި ދައުވާ ލިބުނު ފަރާތްތަކުގެ ތެރެއިން ހަމައެކަނި ހައްޔަރުކޮށްފައި މިހާރު ހުންނެވީ އަދީބެވެ.
އެހެން މައްސަލަތަކެއް އަދީބަށް ޖަލު ހުކުމްތަކެއް އިއްވާފައިވާއިރު އޭނާ މިހާރު އޮންނެވީ އައިޖީއެމްއެޗް ހޮސްޕިޓަލްގަ އެވެ. މިއަދުގެ ޝަރީއަތަށް އަދީބެއް ހާޒިރެއް ނުވެ އެވެ.
