ސިޔާސީ ނުފޫޒުން އެއްކިބާވެފައިވާ ތަނަކަށް ފުލުހުންގެ މުއައްސަސާ ހެދުމައްޓަކައި ކުރަންޖެހޭ ކަންކަންކުރުމުގައި ފުރިހަމަ އެއްބާރުލުން ދެއްވާނެކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
ރައީސް އެގޮތަށް ވިދާޅުވެފައިވަނީ މިއަދު ޕޮލިސް ހެޑް ކުއާޓާއަށް ވަޑައިގެން ފުލުހުންގެ އިސް ފަރާތްތަކާއި ބައްދަލު ކުރެއްވުމަށްފަހު އެވެ. މިއީ ރައީސްކަމާއި ހަވާލުވެވަޑައިގެންނެވުމަށްފަހު އެމަނިކުފާނު ފުލުހުންގެ އިދާރާއަށް ވަޑައިގެން ފުރަތަމަ ފަހަރެވެ. އެމަނިކުފާނު ވަނީ ރިޔާސީ އިންތިހާބް ކާމިޔާބު ކުރެއްވުމަށްފަހު ރައީސް ކަމުގެ ހުވާ ކުރެއްވުމުގެ ކުރިން ޕުލުހުންގެ އިދާރާއަށް ޒިޔާރަތް ކުރައްވާފަ އެވެ.
އެ ބައްދަލުވުމުގައި ފުލުހުންގެ މުއައްސަސާ އިތުރަށް ހަރުދަނާކުރުމަށާއި އިސްލާހުކުރުމަށް ކުރަންޖެހޭކަންކަމާބެހޭގޮތުން ރައީސް ސޯލިހް ވަނީ ފުލުހުންގެ މުއައްސަސާގެ އިސްވެރިންނާ މަޝްވަރާކުރައްވާފަ އެވެ.
ރައީސް ވިދާޅުވީ، ފުލުހުންގެ މުއައްސަސާއަކީ ރައްޔިތުންނަށް ރައްކާތެރިކަން ހޯދައިދޭންޖެހޭ މުއައްސަސާއެއް ކަމަށެވެ. އަދި ސިޔާސީ ނުފޫޒުން އެއްކިބާވެފައިވާ ތަނަކަށް ފުލުހުންގެ މުއައްސަސާ ހެދުމައްޓަކައި ކުރަންޖެހޭ ކަންކަންކުރުމުގައި ފުރިހަމަ އެއްބާރުލުން ދެއްވާނެކަމުގެ ޔަގީންކަން ދެއްވާކަމަށްވެސް ރައީސް ވިދާޅުވި އެވެ.
އެ ބައްދަލުވުމުގައި ހޯމް މިނިސްޓަރު އިމްރާން އަބްދުﷲއާ ރައީސް އޮފީހުގެ ޗީފް އޮފް ސްޓާފް އަލީ ޒާހިރު އާއި ޕޮލިސް ކޮމިޝަނަރު ހަމްދޫން ރަޝީދުވެސް ބައިވެރިވެވަޑައިގެންނެވި އެވެ.
ރައީސް ސޯލިހް، ޕޮލިހުންގެ އިސްވެރިންނާއި މިއަދު ބައްދަލުކުރައްވާފައިވާއިރު، އިއްޔެ ވަނީ މައިޖަލު ދޫނިދުއަށް ވަޑައިގެން އެތާންގެ ހާލަތު ބައްލަވާލައްވާފަ އެވެ. ރައީސް ސޯލިހު ދޫނިދޫ ޖަލަށް ޒިޔާރަތް ކުރައްވައި، ސިޔާސީ ބޭފުޅުން ހައްޔަރުކުރައްވާފައި ބޭތިއްބެވި ގޮޅިތަކާއި، ޖަލުގެ އާންމު އެހެން ގޮޅިތައް ބައްލަވައިލެއްވި އެވެ. އަދި ޖަލުގެ ހާލަތު އިތުރަށް ރަނގަޅު ކުރުމަށްޓަކައި ކުރަންހުރި ކަންތައްތަކުގެ މައުލޫމާތު، އޮޅުންފިލުއްވި އެވެ.