ތިމާވެށި ހިމާޔަތް ކުރުމުގެ ހިދުމަތްތަކަށް ގްރީން ފަންޑެއް ރައީސް އިބްރާހިމް މުހައްމަދު ސޯލިހް ވަރަށް އަވަހަށް ގްރީން ފަންޑެއް އުފައްދަވާނެ ކަަމަށް އެންވަޔަރުމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެ އެވެ.
ހުރިހާ އިންތިހާބީ އަދި އައްޔަންކުރެވޭ މަގާމުތަކަށް ވަޑައިގަންނަވާ ފަރާތްތަކަށް ތިމާވެށި ރައްކާތެރިކުރުމާ ގުޅޭ ޕްރޮގްރާމްތައް ފެށި ދާއިމީގޮތެއްގައި ހިންގުންމަކީ ރައީސް ސޯލިހްގެ ފުރަތަމަ 100 ދުވަހުގެ ވައުދުގެ ތެރެއިން ހިމެނޭ ކަމެކެވެ. އެގޮތުން މިއަދު ވަނީ ތިމާވެށި މައްތިނި ދަށުން ފުރަތަމަ ފޯރަމް ފަށާފަ އެވެ.
ތިމާވެށި މައްތިނިގެ ނަމުގައި މިއަދު ފެށި ފޯރަމް ޝަރަފްވެރި ކޮށްދެއްވައި މިނިސްޓަރު ޑރ. ހުސެއިން ރަޝީދު ވިދާޅުވީ، ރައީސް ސޯލިހްގެ ސަރުކާރުން ގްރީން ފަންޑެއް އުފައްްދަވާ ކަމަށާއި އެފަންޑުން ތިމާވެށި ހިމާޔަތް ކުރުމުގެ ހިދުމަތްތައް ދިނުމަށް ހަރަދު ކުރެވޭނެ ކަމަށެވެ.
މިނިސްޓަރު ވިދާޅުވީ، ރާއްޖޭގެ ތިމާވެށީގެ މައްސަލަ ހައްލުކުރުމަށް ސައްހަ މައުލޫމާތު ކައުންސިލްތަކާއި ކައުންސިލަރުންނަށް ލިބިގެން ކަމަށެވެ.
"ރައްޔިތުންނަށް އެންމް ގާތުން ހިދުމަަތް ކުރަން ތިބޭ ބަޔަކީ އެރަށެއްގެ ކައުންސިލަރުން، އެހެންވީމާ ތިމާވެއްޓަކީ ކޮބައިކަމާއި ތިމާވެށީގެ ނާޒުކުކަމާއި ތިމާވެށި ހިމާޔަތް ކުރުމަށްޓަކައި އަދާކުރަން ޖެހެނީ ކޮންކަހަލަ ވާޖިބްތަކެއްކަން ކައުންސިލަރުންނަށް އިނގިވަޑައިނުގަންނަވަންޏާ އަޅުގަނޑުމެންގެ ތިމާވެށި ހިމާތަތެއް ނުކުރެވޭނެ،" މިިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ތިމާވެށި ހިމާޔަތް ކުރުމަކީ މިޖީލުން އަދާކުރަންޖެހޭނެ ޒިންމާއެއް ކަމަށާއި އެކަން ޒިންމާދާރު ގޮތެއްގައި އަދާކުރެވިގެން ނޫނީ އަންނަނިވި ޖީލްތަކަށް ވާސިލްކޮށް ނުދެވޭނެ ކަމަށެވެ. ތިމާވެށި ހިމާޔަތް ނުކުރެވިއްޖެނަމަ އަންނަންއޮތް ޖީލުތަކުން މި ޖީލު ބަދުނާމު ކުރާނެ ކަމަށާއި ކުށްވެރި ކުރާނެ ކަމަށް މިނިސްޓަރު ވިދާޅުވި އެވެ.
"އެހެންވީމާ އަޅުގަނޑު މެންނަށް އޮތް ވާޖިބެއް މިގައުމު ޖަޒީރާ ގައުމެއްގެ ގޮތުގައި މިހާރަށް ވުރެވެސް ފުރިހަމައަށް އަންނަނިވި ޖީލްތަކަށް ރައްދުކޮށް ދިނުމަށް މަސައްކަތް ކޮށްދިނުން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ކޮންމެ ރައްޔިތަކު އެމީހަކު އުފައްދާ ކުންޏާމެދު ޒިންމާވާން ޖެހޭނެ ކަމަށާއި ކޮންމެ އާއިލާއަކުން އުފައްދާ ކުންޏާމެދު އެއާއިލާއަކުން ޒިންމާ އުފުލަން ޖެހޭނެ ކަމަށެވެ. އެހެން ނޫންނަމަ ރާއްޖޭގެ ތިމާވެއްޓަށް ރަނގަޅު ގޮތެއް ނުވާނެ ކަމަށްވެސް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ކައުންސިލްތައް ބާރުވެރިކޮށްގެން ނޫނީ ކުނި މެނޭޖް ކުރުން ހައްލު ކުރެވިގެން ނުދާނެ ކަމަށާއި އެކަމަށް ބޭނުންވާ ވަސީލަތްތައް ފޯރުކޮށްދީގެން އެކަން ފަށާނެ ކަމަށެވެ.
މިނިސްޓަރު އިތުރަށް ވިދާޅުވީ، ރާއްޖޭގެ ރަށްތަކުގައި ހުންނަ ރުއްތައް ނަގައި ރަށްރަށުން ބޭރު ކުރުމަކީ ކޮށްގެންވާނެ ކަމެއް ނޫން ކަމަށާއި އެކަން ހައްލު ކުރުމަށްޓަކައި ގާނޫނުތަކަށް ބަދަލުގެނެސް ގާނޫނުތައް އިސްލާހު ކުރަންޖެހޭނެ ކަމަށެވެ.
ތިމާވެށި މައްތިނީގައި މިއަދު އޮތީ އއ. އދ. އަދި ކ އަތޮޅުގެ ކައުންސިލަރުންނަށް ބޭއްވި ފޯރަމެވެ. މީގެ އިތުރު ފޯރަމްތަކެއް ރައްޔިތުންގެ މަޖިލިސް މެންބަރުންނަށާއި ކެބިނެޓް މިނިސްޓަރުންނަށާއި އެހެން ރަށްރަށުގެ ކައުންސިލަރުންނަށް ބާއްވާނެ އެވެ. މި ފޯރަމަކީ ސަރުކާރުގެ މުއައްޒަފުން ތިމާވެއްޓަށް އަހުލުވެރި ކުރުމުގެ ގޮތުން ބާއްވާ ފޯރަމްތަކެކެވެ.