ގްރީންބޮކްސް ޕްރައިވެޓް ލިމިޓެޑް ކިޔާ ދިވެހި ކުންފުންޏަކުން އެ ކުންފުނީގެ ބޯޓްތަކެއްގައިި މަސައްކަތް ކުރާ މުވައްޒަފުންތަކަކަށް މުސާރަނުދީ ހާލުގައި ޖައްސާފައިވާކަމަށް ބުނެ އިންޓަނޭޝަނަލް ލޭބާ އޮގަނައިޒޭޝަން (އައިއެލްއޯ) އަށް މައްސަލައެއް ހުށަހަޅައިފި އެވެ.
ގްރީން ބޮކްސް ކުންފުނީގެ މައިގަނޑު ހިއްސާދާރަކީ، ކުރިން ސިފައިން ގޭގައި މަސައްކަތް ކުރެއްވި އަދި ނިއު ރޭޑިއަންޓްގެ ޗެއާމަން މުހައްމަދު ޒިޔާދު އެވެ.
ގްރީންބޮކްސް ކުންފުނީގެ، "އެމްޓީ ޓްރާންސް ފިއުލް 9" ބޯޓުގެ ކެޕްޓަން ޑެރެކް ކްރޫޒު އައިއެލްއޯއަށް ހުށަހެޅި މައްސަލާގައި ބުނެފައިވަނީ އެކުންފުނިން އިންޑިއާގެ ތިން މީހަކާއި، ލަންކާގެ ނުވަ މީހަކަށް މުސާރަ ނުދީ ހާލުގައި ޖައްސާފައިވާ ކަމަށެވެ. އެ މުވައްޒަފުންނަށް ހަތަރު މަހުގެ މުސާރަ ނުދީ އެބައޮތް ކަމަށާއި، އެ ބޯޓަށް ލިބިފައިވާ އިންޓަނޭޝަނަލް ޓްރޭޑިންގް ލައިސަންސާއި، ވެސެލްގެ ސެޓްފިކެޓްތަށްވެސް އޮކްޓޯބަރު މަހު ހަމަވެފައިވާ ކަމަށެވެ.
އެބޯޓަކީ، މިހާރު ބައިނަލްއަގުވާމީ ކަނޑުގެ ގާނޫނުތަކާ އެއްގޮތަށް ދިގު ދަތުރު ކުރެވޭ ހާލަތުގައި އޮތް ބޯޓެއް ނޫން ކަމަށާއި، އެ ބޯޓުގައި ސަލާމަތީ ކަންތައްތަށްވެސް ހަމަނުވާ ކަމަށާއި، އިންސާނުން ދިރިއުޅެން ބޭނުންވާ ޒަރޫރީކަންތައްތައްވެސް މިހާރު އެބޯޓުގައި ފުއްދެން ނެތް ކަމަށް އެމައްސަލައިގައި ވަނީ ބުނެފަ އެވެ.
ބޯޓްގެ މެއިންޓަނެންސް ރެކޯޑްތަކެއްވެސް ބަލަހައްޓާފައިނުވާ ކަމަށާއި، ބޯޓްގެ ހާތަލު ދަށްވެފައިވާއިރު އެބޯޓަކީ އިންސާނުން ދިރިއުޅެން އެކަށީގެންނުވާ އެއްޗެއްކަމަށްވެސް އެ މައްސަލާގައިވަނީ ބުނެފަ އެވެ.
މީގެ އިތުރުން ބޯޓްގެ ހާލަތާއި، މުވައްޒަފުންގެ ހާލަތު ކަމާއިބެހޭ ފަރާތްތަކަށްވެސް އަންގާފައިވާ ކަމަށާއި އެހެން ނަމަވެސް އެ އިދާރާތަކުން އެކަމަށް އެކަށީގެންވާ އަޅާލުމެއްދީފައިނުވާކަމަށްވެސް އެމައްސަލާގައިވަނީ ބުނެފަ އެވެ. އެގޮތުން ހާބަރު މާސްޓާއަށް އެ ޝަކުވާ ހުށަހެޅުމުން، ޓްރާންސްޕޯޓް އޮތޯރިޓީއަށް ޝަކުވާ ހުށަހަޅަން އެންގި ކަމަށާއި، ރާއްޖޭގެ ޕޯޓް ޔޫނިއަންއަށް ޝަކުވާ ހުށަހެޅުމުން އަދިވެސް ޖަވާބެއްދީފައިނުވާ ކަމަށް މައްސަލައިގައިބުނެ އެވެ.
އޮސްޓްރޭލިއަން ސޭފްޓީ މެރިޓައިމް އޮތޯރިޓީން އެމައްސަލައާއި ގުޅިގެން ރާއްޖޭގެ މެރިޓައިމް އޮތޯރިޓީއާ ގުޅަން މަސަައްކަތް ކުރި ނަމަވެސް އެ އޮތޯރިޓީން ޖަވާބެއް ދީފައިނުވާކަންވެސް ވަނި އެމައްސަލާގައި ފާހަގަކޮށްފަ އެވެ. ރައީސް އޮފީހަށްވެސް އެމައްސަލައާއި ގުޅިގެން މެއިލްކޮށްފައިވާނެ ކަމަށާއި، އެހެން ނަމަވެސް އެ އޮފީހުންވެސް ޖަވާބެއްދީފައިނުވާކަމަށް ވެސް މުވައްޒަފުން ބުންޏެވެ.
އެމައްސަލައިގައި އިތުރަށް ބުނެފައިވަނީ، އެމައްސަލާގައި ޓްރާންސްޕޯޓް އޮތޯރިޓީއާއި، އިމިގްރޭޝަނާއި، ފުލުހުންގެ އިދާރާއާއި، އެޗްއާރުސީއެމްއާވެސް ގުޅި ކަމަށާއި، އެހެން ނަމަވެސް ގިނަ އިދާރާތަކުން ޖަވާބެއްދީފައިނުވާކަމަށެވެ. އެ މުވައްޒަފުން މިހާރު ވަނީ އެމްޕްލޯއިމަންޓް ޓްރިބިއުނަލަށް ވެސް މައްސަލަ ލައިފަ އެވެ. އަދި އެޗްއާރުސީއެމްއަށް ވެސް މައްސަލަ ވަނީ ލައިފަ އެވެ.
އެ ޝަކުވާތަކާ ގުޅިގެން ޒިޔާދަށް ގުޅި ނަމަވެސް އޭނާގެ ފޯން ނިންވާލާފައި އޮތުމުން އޭނާގެ ބަހެއް ވަނީ ލިބޭ ގޮތް ނުވެފަ އެވެ.