ސުޕްރީމް ކޯޓްގެ ހުކުމަކާ ގުޅިގެން، މިފަހުން އެސިސްޓެންޓް ކޮމިޝަނަރުގެ ރޭންކްގައި ފުލުހުންގެ ވަޒީފާއަށް އަލުން ވެއްދި މުހައްމަދު ހަމީދު، އެމްސީ ހަމީދު އެކްޓިން ކޮމިޝަނަރެއްގެ ގޮތުގައި ރައީސް ސޯލިހު މިއަދު ހަމަޖައްސަވައިފި އެވެ. އޭނާ އެ މަގާމަށް ހަމަޖެއްސީ ޑެޕިއުޓީ ކޮމިޝަނަރަކަށް ޕްރޮމޯޓް ކުރުމަށް ފަހު އެވެ.
ސުޕްރީމް ކޯޓުން އޭނާއަށް އަލުން ވަޒީފާ ދިނުމަށް ނިންމި ނިންމުމާ ގުޅިގެން، މި މަހުގެ ހަތަރު ވަނަ ދުވަހު އެމްސީ ހަމީދަށް ފުލުހުންގެ ވަޒީފާ އަލުން ދިނުމަށް ފަހު އޭނާ ހަމަޖެއްސީ ފުލުހުންގެ އިންޓެލިޖެންސް ޑިޕާޓްމަންޓް ނޫނީ ސިއްރު ފުލުހުންގެ ވެރިއަކަށެވެ.
ރައީސް ސޯލިހުގެ ޅިޔަނު، އެމްސީ ހަމީދު ޗީފް ސުޕްރިޓެންޑެންޓްގެ ރޭންކްގައި ހުއްޓައި އޮގަސްޓް، 2012 ގައި ފުލުހުންގެ ވަޒީފާއިން ވަކިކުރީ ފުލުހުންގެ އެތެރޭގެ މައުލޫމާތުތަކެއް ހާމަކުރިކަމަށް ތުހުމަތުކޮށްފަ އެވެ. އެހެން ނަމަވެސް ސުޕްރީމް ކޯޓުން އެ މައްސަލަ ބަލައި، އަމުރުކޮށްފައި ވަނީ އޭނާ ފުލުހުންގެ ވަޒީފާއިން ވަކިކުރީ އުސޫލުތަކާ ހިލާފަށް ކަމަށާއި ކުރިން އޭނާ ވަކިކުރި އިރު ހުރި ފެންވަރުގެ ވަޒީފާއެއް އަލުން ދިނުމަށެވެ.