ރިޔާސީ ލޯންޗްކޮޅު، ފިނިފެންމާ ގޮވުމުގެ ހާދިސާއާމެދު ސުވާލު އުފައްދަވައި، ޕީޕީއެމުން މިރޭ ވަކިވެވަޑައިގެން ކުރީގެ ނައިބް ރައީސް އަހުމަދު އަދީބަށް، ކުރީގެ ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ ވަރަށް ބޮޑަށް ތައުރީފް ކުރައްވައިފި އެވެ.
މޫކައި ހޮޓެލްގައި މިރޭ ބޭއްވި ނޫސްވެރިންގެ ބައްދަލުވުމެއްގައި މުއާޒް ވިދާޅުވީ، ރިޔަސީ ލޯންޗްކޮޅު ގޮއްވާލި ހާދިސާއާގުޅޭ ވަރަށް ގިނަ މައުލޫމާތު މިއަދު ރައްޔިތުންނަށް އިނގިވަޑައިގަންނަވާ ކަމަށެވެ. ނަމަވެސް އެދުވަހު ހިނގާދިޔަ ބައެއް ކަންކަން ހިއްސާކުރައްވަން ޖެހޭ ކަމަށް ގަބޫލުކުރައްވާ ކަމަށް އޭނާ ވިދާޅުވި އެވެ.
މުއާޒް ވިދާޅުވީ، ރައީސް ޔާމީން އުމްރާގެ މަތިވެރި އަޅުކަން އަދާކުރެއްވުމަށްފަހު މާލެ ވަޑައިގެން ނޫސްވެރިންނާއި ބައްދަލުކުރައްވަން ބޭނުންވާ ކަމަށްވިދާޅުވި ކަމަށެވެ. ނަމަވެސް އެމަނިކުފާނު ބޭނުންވީ އެއާޕޯޓްގެ ވީއައިޕީ ލޯންޖްގެ ބަދަލުގައި އިއްޒުއްދީން ފާލަން ސަރަހައްދުގައި ނޫސްވެރިންނާއި ބައްދަލުކުރައްވައި ސައުދީގެ ރަސްގެފާނާއެކު ކުރެއްވި މަޝްވަރާތައް ހިއްސާ ކުރެއްވުމަށް ކަމަށް މުއާޒް ވިދާޅުވި އެވެ.
"އެދުވަހު އަޅުގަނޑު ވަޑައިގަންނަވަން ހަމަޖެހިފައިވަނީ ކުރީގެ ނައިބް ރައީސް އަހުމަދު އަދީބާއެކު، ނަމަވެސް އާލާސް ކަންފުޅާ އުޅުއްވާތީ އަދީބަށް ވަޑައެއްނުގަނެވުނު، ރައީސް ޔާމީން ރާއްޖެ ވަޑައިގެންނެވުމަށްފަހު ވީއީއޭ ލޯންގްގައި މަޑު ކުރުމެއްވެސްނެތި ވަޑައިގެންނެވީ ލޯންޗް ކޮޅަށް،" މުއާޒް ވިދާޅުވި އެވެ.
"ދެން އަޅުގަނޑަށް ފާހަގަވި ކަމަކީ އެމަނިކުފާނު އާންމުގޮތެއްގައި އިންނަވާ ގޮނޑިކޮޅަކު ނޫން އިށީންދެވަޑައިގެންނެވީ، އެމަނިކުފާނު އިށީންދެވަޑައިގަންނަވާ ސީޓްކޮޅު، އެއީ ލޯންޗްގެ އެންމެ އެތެރޭގެ ކަނާތް ފަޅިއަށް ވާގޮތަށް އިންނަވާ ސީޓްކޮޅު އެއީ އެމަނިކުފާނު އާންމު ގޮތެއްގައި އިންނަވާ ސީޓް ކޮޅު، އެތަނުގައި އިށީންދެ ވަޑައިގެންނެވީ ފަސްޓްލޭޑީ، މެޑަމް ފާތުމަތު އިބްރާހިމް، އެއާ ޖެހިގެން މި އިށީންދެ ވަޑައިގެންނެވީ ރައީސް ޔާމީން،"
އޭނާ ވިދާޅުވީ، އެކަމަކީ އޭގެ ކުރިން ދުވަހަކުވެސް ރައީސް ޔާމީން ކުރެއްވި ކަމެއް ނޫން ކަމަށާއި އެއީ އެދުވަހު ފާހަގަ ކުރެވުނު އެންމެ ބޮޑު އެއްކަންތައް ކަމަށެވެ. އަދި މިވާހަކަތަކަކީ ދިވެހި ރައްޔިތުންނަށް ހިއްސާ ކުރަންޖެހޭ މައުލޫމާތު ކަމަށްދެކޭ ކަމަށާއި މި މައުލޫމާތު ތަކުގެ ސަބަބުން މިހާރު ކުރިއަށްދާ މި މައްސަލައިގެ ތަހްގީގްތަކާއި ޝަރީއަތްތަކަށްވެސް މުހިންމު މައުލޫމާތުތަކެއް ކަމަށްދެކޭ ކަމަށްވެސް މުއާޒް ވިދާޅުވި އެވެ.
"ލޯންޗް ގޮވީ މާލޭ ފަޅު ތެރޭގައި އޮއްވައި، އެއާއެކު ފަސްޓް ލޭޑީ އޮތީ ވިއްސާގެން އައިސް އަޅުގަނޑުގެ ފައި ބުޑުގައި، އިތުރު އެއްވެސް ބޭފުޅަކު ފެނިވަޑައެއް ނުގަންނަވާ، އަޅުގަނޑަށް ވެވުނު އެހީއެއް އެވަގުތުވިން، ރައީސް ޔާމީންގެ އޭގެ ކުޑަ ވަގުތުކޮޅެއްފަހުން ފެނިވަޑައިގެންނެވީ، ބޮލުގައި ހުރި ކުނޑިތައް ފޮޅަމުން ނިކުންނަވަނިކޮށް، ނަމަވެސް އަޅުގަނޑުމެންގެ މޫނުމަތިން ފެނުނު ވަރުގެ ހާސްކަމެއް ރައީސް ޔާމީންގެ މޫނު ފުޅުއް ފެނިވަޑައެއް ނުގަންނަވާ،" މުއާޒް ވިދާޅުވި އެވެ.
މުއާޒް ވިދާޅުވީ، އެދުވަހު ހާދިސާއާ ގުޅިގެން ބަޔާން ނެންގެވި ކަމަށާއި އަލިފާނުގެ އެއްވެސް އަސަރެއް ބޮން ގޮވި ގަޑީގައި ފެނިފައިނުވާ ކަމަށެވެ. އަދި އެދުވަހު އެމަންޒަރު އެންމެ ގާތުން ރީއްޗަށް ފެންނާނެ އެކަކީ އޭނާ ކަމަށްވެސް މުއާޒް ވިދާޅުވި އެވެ.
މުއާޒް ވިދާޅުވީ، އެކަމާ ގުޅިގެން ރައީސް އޮފީހުން އާންމު ކުރި ވީޑިއޯގައި އަލިފާންކަނި ފެނިގެންދިއުމުން ހައިރާންވި ކަމަށާއި އެއީ އެޑިޓެއް ކަމަށެވެ. އެކަން އޭނާއަސް ޔަގީންވާ ކަމަށްވެސް މުއާޒް ވިދާޅުވި އެވެ. މުއާޒް ވަނީ މިރޭ ހިއްސާކުރި މައުލޫމާތުތަކުގެ އަލީގައި ފުލުހުން މިމައްސަލަ އަލުންބަލައި ތަހްގީގް ކުރުމަށްވެސް ގޮވާލާފަ އެވެ.
މުއާޒް ވިދާޅުވީ، ޕްރެސް ބާއްވަނީ ޕީޕީއެމްގެ ކައުންސިލް މެންބަރެއްގެ ހައިސިއްޔަތުން ކަމަށާއި ނަމަވެސް މިއަދުން ފެށިގެން ޕީޕީއެމުން އިސްތިއުފާދެއްވާ ކަމަށެވެ. އޭނާ އަކީ އެއްވެސް ޕާޓީގެ މެންބަރެއް ނޫން ކަމަށާއި މިހާރު އެއީ މިނިވަން ބޭފުޅެއް ކަމަށްވެސް މުއާޒް ވިދާޅުވި އެވެ.
އަދީބުގެ ދިފާއުގައި މުއާޒް ދެއްކެވި ވާހަކަތައް:
މުއާޒް ވިދާޅުވީ، އަދީބު ރައީސް ޔާމީނާއެކު ހުންނެވިއިރު، އިދިކޮޅު ފަރާތްތަކުން އޭރު ދެކުނު ގޮތަކީ ރައީސް ޔާމީނާ ކުޅެލެވޭނީ އަދީބު ބަލިކޮށްލައިގެންކަން އެމީހުން ދެކޭ ކަމަށެވެ. އަދި ރައީސް ޔާމީނާއި ހަމައަށް އާދެވޭނީ އަދީބު ފޫއަޅުވާލާފައި ކަމަށް ޕީޕީއެމްގެ މެންބަރުން އޭރު ގަބޫލު ކުރެއްވި ކަމަށްވެސް މުއާޒް ވިދާޅުވި އެވެ.
"އެއީ ޒުވާނުންގެ ތާއީދާ ވަރަށް ގިނަ ބައެއްގެ ތާއީދާއެކު ނައިބް ރައީސް ކަމަށް ވަޑައިގެންނެވުމުން، ޕީޕީއެމްގެ ގިނަ ބައެއްގެ ލޮއެބާއެކު ވަޑައިގެންނެވި ފަރާތެއް، އިދިކޮޅު އިދިކޮޅު ފަރާތްތަކުން އޭރުވެސް އެންމެ ބޮޑަށް ޖެހިލުންވާ ފަރާތަކީ އަދީބު،" މުއާޒް ވިދާޅުވި އެވެ.
މުއާޒް ވިދާޅުވީ، ޕީޕީއެމްގެ އެތެރެއިންވެސް އަދީބަށް އޮތް ހަސަދަވެރިކަން ވަރަށް ގާތުން ދުށިން ކަމަށާއި ޕީޕީއެމްގެ އެތެރެއިން އަދީބާ ވަރަށް ބޮޑަށް ޖައްސާލާފައިވާ ކަމަށެވެ. އަދި މިހާރު އަދީބް ރައީސް ޔާމީން ކައިރީގައި ހުންނަވަން ޕީޕީއެމްގެ ނައިބް ރައީސް މޫސާ ޒަމީރާއި އެޕާޓީން ފަހުން ވަކިވެވަޑައިގެންނެވި އަބްދުއްރަހީމް އަބްދުﷲ، އަދުރޭ ބޭނުންނުވާ ކަމަށްވެސް މުއާޒް ވިދާޅުވި އެވެ.