މިއީ އިހު ޒަމާނެއް ނޫނެވެ؛ މިއީ އަންހެނުންނެކޭ އެއްފަދައިން ފިރިހެނުން ވެސް ކުދިންގެ ކަންތައްތަކާއި ގޭތެރޭގެ ކަންތައްތައް ކޮށްއުޅޭ އާ ޒަމާނެވެ. ފިރިހެނުން ގޭތެރޭ ކަންތައްތަކުގައި ޝާމިލްވެ އުޅުމަކީ އަނބިދަށުވުން ކަމުގައި އެއްއިރެއްގައި މީހުން ދެކުނެވެ. ނަމަވެސް، ގޭތެރެ ތަރުތީބު ކުރުމާއި، ކުދިންގެ ކަންކަމުގައި އަންހެނުންނާ އެއްވަރަށް ފިރިމީހާ ވެސް ޝާމިލުވެ އުޅޭތަން އުފާވާ ވަރަށް މިހާރު އާންމެވެ.
ޔުނިވާސިޓީ އޮފް މިސޯރީއިން ހެދި ދިރާސާއަކުން ދައްކާ ގޮތުގައި ގޭތެރޭ ކަން ކަމާއި ކުދިން ބެލުމުގެ ޒިންމާ ދެ މީހުން އެކުގައި ގުޅިގެން ނަގާނަމަ އާއިލާގެ އުފާވެރިކަން އިތުރު ވެއެވެ. މިގޮތަށް ޒިންމާ ނަގައި އެހީތެރިވުމަކީ ކޮންމެހެން ފިރިމީހާ ރަނގަޅުކަމުން ކުރާ ކަމެއް ނޫން ކަމުގައި މުޖުތަމައު ދެނެގަނެ ބަލައިގަންނަންޖެހެ އެވެ. ކުދިން އެއީ ދެމަފިރިންގެ ކުދިންކަމާއި ދިރިއުޅުމެއް ބިނާ ކުރަނީ ދެމީހުން އެއްކޮށް މަސައްކަތް ކޮށްގެނެވެ. ކުދިންގެ ކަންތައްތައް ފުރިހަމަ ކުރަން މައިންބަފައިން ނުވިސްނާ ވަރަށް ވިސްނާނެ އެހެން ބަޔަކު ނުތިބޭނެ އެވެ.
ގިނަ އާއިލާތަކުގައި މަންމަ އާއި ބައްޕައަކީވެސް ވަޒީފާ އަދާކުރާ މީހުނެވެ. ދަރިން ތިބޭ ނަމަ އަންހެންމީހާ ގޭގައި ކުރެވޭ މަސައްކަތްތަކުން އާމްދަނީ ހޯދަ އެވެ. މިސާލަކަށް ޓިއުޝަން ދީގެންނާއި ކޭކް އެޅުމާއި ފެހުން ފަދަ، މިހެންގޮސް ތަފާތު އެކި އެކި މަސައްކަތް ކުރަނީ އާއިލާއަށް ލިބޭ އާމްދަނީ އިތުރު ކުރުމަށެވެ. ގޭގެ ކުއްޔާއި އެހެނިހެން ޚަރަދަށް ކޮންމެވެސް ހިއްސާއެއް ލުމަށެވެ.
އެހެންކަމަށްވާނަމަ ފިރިހެނުންނެކޭ އެއްވަރަށް އަންހެނުން ވެސް އަރާމު ކުރުމަށާއި، ރައްޓެހިންނާއި ބައްދަލު ކުރަންވެސް ވަގުތު ބޭނުންވާ، ކަމީ ދެބަސްވެވޭނެ ކަމެއް ނޫނެވެ. އަންހެނުން އަބަދު ކުދިންގެ ކަންތައްތައް ނުވަތަ އަބަދު ގޭތެރޭ ކަންތައް ކުރުމަށާއި ކައްކައި ތަށިދޮވުމުގެ ބަދަލުގައި ފިރިހެނުންވެސް އަންހެނުންނެކޭ އެއްފަދައިން މިކަންކަން ކުރުމުން ގުޅުން ބަދަހިވެ އެވެ. ދެމީހުނަށް ގޭތެރެ މަސައްކަތް ހަމަހަމަކޮށް ނުބަހާނަމަ އަދި އެކަކަށް މާ ބޮޑު ލުޔެއް އޮންނަކަމަށް ދެކޭނަމަ މައްސަލަޖެހި ގުޅުން ކުޑަވުމަކީ ދިމާވުން އެކަށީގެންވާ ކަމެކެވެ.
އަންހެންނުން ދެކެނީ ފިރިމީހާގެ އެހީ އާއި އެއްބާރުލުމަކީ ލޯބި ކަމުގައެވެ. މިގޮތަށް ކަންތައްކުރާ ނަމަ ދަރިންނާއެކު ވަގުތު ހޭދަ ކުރުމަށް ދެމީހުންނަށް ވެސް ހަމަ ހަމަ ފުރުސަތު ލިބިގެންދެ އެވެ. އަދި މުޅި އާއިލާއެއްކޮށް ވަގުތު ހޭދަ ކުރުމަށް ވެސް ފުރުސަތު ލިބެ އެވެ. އާއިލީ ގުޅުން ބަދަހިވެ ކުދިންގެ ކުޑައިރުގެ ހަނދާންތަކަކީ އުފާވެރި ހަނދާންތަކަށް ވެގެން ދެއެވެ. އެއީ އަގު ބޮޑު ކުޅޭ އެއްޗެއްސަށްވުރެ އެކީގަ ހޭދަ ކުރާ ވަގުތުން އެކުދިންނަށް ކުރާ ފައިދާ ގެ ބޮޑުކަމުންނެވެ.
ގޭތެރޭ މަސައްކަތްތަކުގައ މަންމަ އާއި ބައްޕަގެ ހިއްސާ އޮންނަނަމަ، މިކަމުގެ ސަބަބުން ކުދިންނަށް އެކުދިންގެ މައިންބަފައިން ރަނގަޅު ނަމޫނާ ދައްކާ ރޯލްމޮޑެލްއަކަށް ވެގެން ދެއެވެ. ޒަމާނުއްސުރެ އޮންނަ ވިސްނުން، ފިރިހެންމީހާ އަކީ އާމްދަނީ ހޯދާމީހާ އަދި އަންހެންމީހާ އަކީ ގެޔާއި ކުދިން ބަލަން އިންނަ މީހާ ކަމަށް އޮންނަ ވިސްނުން ބަދަލުވުމުން އެމީހުން ދިރިއުޅުމަށް ވެސް ރަނގަޅު މަންފާއެއް ކުރާނެއެވެ.
މިގޮތަށް ގޭތެރޭކަންތައް ބަހާލައިގެން ކުރުމަށް އެންމެ ރަނގަޅީ މަޝްވަރާ ކޮށްގެން ދެމީހުންގެ މެދުގައި ވާހަކަ ދައްކާ އެއްބަސްވެގެންނެވެ. ދެމީހުންގެ ތެރެއިން އެކަކު ވަކިކަމެއް ކުރުމަށް ކަނޑައަޅާ އަނެކަކު އެހެން ކަމެއް ކުރުމަށް ކަނޑައަޅައިގެންނެވެ. މިގޮތަށް ކަންތައްތައް ކުރާނަމަ ވަގުތު ސަލާމަތްވެ ދިރިއުޅުމުގެ ސްޓްރެސް ކުޑަވެ އުފާވެރިކަން އިތުރުވެއެވެ. ހަނގުރާމައެއް ފަދަ މި ދިރިއުޅުން އެތަށްގުނައެއް ފަސޭހަ ވެގެން ދެއެވެ.