ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަލީ ނިޒާރަށް ވެސް އެމްޑީޕީގެ ޕްރައިމަރީގައި ނާކާމިޔާބީއާ ކުރިމަތިލާން ޖެހިއްޖެ އެވެ.
އެ ދާއިރާގެ އެމްޑީޕީ ޓިކެޓް ހޯދުމަށް ނިޒާރާ ދެ ބޭފުޅަކު ވާދަ ކުރެއްވި އެވެ. އޭގެ ތެރެއިން ނިޒާރު ބަލި ކުރައްވައި އިންތިހާބު ކާމިޔާބު ކުރެއްވީ އިބްރާހިމް ނާޒިލެވެ. އޭނާއަކީ އެމްޑީޕީގެ ލީގަލް ޑައިރެކްޓަރު ހިސާން ހުސެއިންގެ ފިރިކަލުންނެވެ.
މެންބަރު ނިޒާރަށް އިންތިހާބުގައި ނާކާމިޔާބުވީއިރު މިހާރު ތިއްބެވި މެންބަރުންގެ ތެރެއިން އިތުރު ތިން މެންބަރަކަށް ވެސް ވަނީ ނާކާމިޔާބުވެފަ އެވެ. އެއީ ހެންވޭރު ދެކުނު ދާއިރާގެ މެންބަރު މުހައްމަދު އަބްދުލް ކަރީމް، ރުކުމާއަށާއި ހިތަދޫ މެދު ދާއިރާގެ މެންބަރު ބްރިގޭޑިއާ، ރިޓަޔާޑް އިބްރާހިމް ދީދީއަށާއި ވައިކަރަދޫ ދާއިރާގެ މެންބަރު މުހައްމަދު ނާޒިމަށެވެ.
ހެންވޭރު ދެކުނު ދާއިރާގެ ޓިކެޓް ކާމިޔާބުކޮށްފައިވަނީ ހުސެއިން ޝަހީމް، އަނދުން ހުސެއިން އެވެ. ހިތަދޫ މެދު ދާއިރާގެ ޓިކެޓް ކާމިޔާބުކޮށްފައިވަނީ ޕީޕީއެމްގައި އުޅުއްވުމަށްފަހު އެމްޑީޕީއަށް ސޮއިކުރެއްވި ވިޔަފާރިވެރިޔާ ހިޔަލީ މުހައްމަދު ރަޝީދުގެ ކޮއްކޮ އަހުމަދު ރަޝީދެވެ. ވިލިނގިލީ ދާއިރާ ޓިކެޓް ކާމިޔާބުކުރީ ހުސައިން ޒިޔާދު، ފިއްޓޭ އެވެ.
ހަތަރު މެންބަރުންނަށް އިންތިހާބުގައި ނާކާމިޔާބުވީއިރު މިހާރު މަޖިލީހުގައި ތިއްބަވާ، ޕްރައިމަރީގައި ވާދަ ކުރެއްވި އެހެން ގިނަ މެންބަރުންނަށް ޓިކެޓް ވަނީ ކަށަވަރުވެފަ އެވެ.
އެގޮތުން އައްޑޫ މީދޫ ދާއިރާގެ ޓިކެޓް ރޮޒައިނާ އާދަމް ކަށަވަރު ކުރައްވާފައިވާއިރު މާފަންނު ހުޅަނގު ދާއިރާގެ ޓިކެޓް މިހާރު ވެސް އެ ދާއިރާގެ މެންބަރު މުހައްމަދު ފަލާހު ވަނީ ކާމިޔާބު ކުރައްވާފަ އެވެ. ހިތަދޫ އުތުރު ދާއިރާގެ ޓިކެޓް މިހާރު ވެސް އެ ދާއިރާ ތަމްސީލް ކުރައްވާ މެންބަރު މުހައްމަދު އަސްލަމް ވެސް ވަނީ ކާމިޔާބު ކުރައްވާފަ އެވެ. އަދި އައްޑޫ ސިޓީ މަރަދޫ ދާއިރާގެ ޓިކެޓް މިހާރު ވެސް އެ ދާއިރާ ތަމްސީލް ކުރައްވާ އިބްރާހިމް ޝަރީފް ހޯއްދަވާފައިވެ އެވެ.
މިފަހުން އެމްޑީޕީއާ ގުޅިވަޑައިގެންނެވި ތިމަރަފުށީ ދާއިރާގެ މެންބަރު މުހައްމަދު މުސްތަފާ އާއި އިހަވަންދޫ ދާއިރާގެ މެންބަރު މުހައްމަދު އަބްދުﷲ ވެސް ވަނީ އެ ދެ ދާއިރާއިން ޓިކެޓް ކާމިޔާބު ކުރައްވާފަ އެވެ.
މީގެއިތުރުން ޕްރައިމަރީއަކާ ނުލާ ގަލޮޅު އުތުރު ދާއިރާގެ މެންބަރު އީވާ އަބްދުﷲ އާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އަދި އަލިފުށި ދާއިރާގެ މެމްބަރު މުހައްމަދު ރަޝީދު، ބިގޭ ވަނީ ޓިކެޓް ހޯއްދަވާފަ އެވެ.