ފޮރިން މިނިސްޓަރު އަބްދުﷲ ޝާހިދު އެމެރިކާއަށް ކުރައްވަމުން ގެންދާ ދަތުރުފުޅުގެ ތެރެއިން، އެ ގައުމުގެ ނެޝަނަލް ސެކިއުރިޓީ ކައުންސިލާއި މިއަދު ބައްދަލު ކުރައްވައިފި އެވެ.
އެމެރިކާގެ ވެރިރަށް ވޮޝިންގްޓަންގައި ބޭއްވި އެ ބައްދަލުވުމުގައި، ސަލާމަތީ ގޮތުން ދެ ގައުމު ގުޅިގެން މިހާރު ކުރެވޭ މަސައްކަތާއި ގުޅޭގޮތުން މަޝްވަރާ ކުރެވުނު ކަމަށް ފޮރިން މިނިސްޓްރީން ބުނެފައިވެ އެވެ.
މިނިސްޓްރީން އިތުރަށް ބުނި ގޮތުގައި، އެމެރިކާގެ ސަލާމަތާއި އެންމެ މަތީ ކައުންސިލާ ގުޅިގެން މަސައްކަތް ކުރެވޭނެ އިތުރު ދާއިރާތަކާއި ގުޅޭ ގޮތުން ޝާހިދު މަޝްވަރާ ކުރެއްވި ކަމަށެވެ.
އެމެރިކާ ސަރުކާރުގެ އިސް އޮފިޝަލުންނާ ބައްދަލުކުރެއްވުމަށް ޝާހިދު އެ ގައުމަށް ކުރައްވަމުން ގެންދަވާ ދެ ދުވަހުގެ ރަސްމީ ދަތުރުފުޅުގެ ތެރެއިން، ސެކިޔުރިޓީ ކައުންސިލްގެ އިތުރުން އެމެރިކާގެ ސްޓޭޓް ޑިޕާޓްމަންޓުގެ އިސް އޮފިޝަލުންނާއި މިއަދު ބައްދަލުކުރައްވައިފާއިރު، އިއްޔެ ވެސް ވަނީ އެގައުމުގެ ޓްރެޒަރީ ޑިޕާޓްމަންޓާއި ބައިނަލްއަގުވާމީ އެހީދޭ ޖަމިއްޔާކަމުގައިވާ ޔުސެއިޑް އާވެސް ބައްދަލުކުރައްވައިފަ އެވެ.