ކުރީގެ މަޝްހޫރު ބަތަލާ އަދި މިހާރު ވެރިކަން ކުރާ ބީޖޭޕީ ތަމްސީލުކުރައްވާ މަޖިލިސް މެމްބަރު ހެމާ މާލިނީ ދަތުރުކުރަމުން ދިޔަ ކާރުން އެހެން ކާރެއްގައި ޖެހި ހިނގި ނުރައްކާތެރި އެކްސިޑެންޓެއްގައި، ކުޑަ އަންހެން ކުއްޖަކު މަރުވެއްޖެ އެވެ.
މިރޭ 9:00 ޖެހި އެހާކަން ހާއިރު، ރާޖަސްތާންގެ ދައުސާ ހައިވޭގައި ހިނގި މިއެކްސިޑެންޓްގައި ހެމާ މާލިނީ އިން މާސެޑީޒް ކާރު މާރުތީ އަލްޓޯ ކާރެއްގައި ޖެހިގެންނެވެ. މި އެކްސިޑެންޓްގައި އަލްޓޯ ކާރުގައި ދަތުރުކުރަމުން ދިޔަ ހަތަރު އަހަރުގެ ކުޑަ އަންހެން ކުއްޖެއް މަރުވެފައިވާއިރު، އިތުރު ހަތަރު މީހަކަށް އަނިޔާވެފައިވާ ކަމަށްވެ އެވެ. މީގެތެރޭގައި އެކުއްޖާގެ މަންމަ އާއި 6 އަހަރުގެ ބޭބެ އަށް ސީރިއަސް އަނިޔާތަކެއް ލިބި، އެސްއެމްއެސް ހޮސްޕިޓަލުގައި ފަރުވާދެމުން އަންނަ ކަމަށް އިންޑިއާގެ ނޫސްތަކުން ރިޕޯޓްކުރެ އެވެ.
ހެމާ މާލިނީގެ ބޮލަށް ކޮންމެވެސް ވަރެއްގެ އަނިޔާތަކެއް ލިބި، މިހާރު ސީޓީ ސްކޭން އެއް ހަދާފައިވާއިރު، ނޭފަތް ކައިރިން ފަޅައިގެން ގޮސް އިންތަނެއް ފަހާފައިވީނަމަވެސް، އޭނާއަށް މާބޮޑެތި އަނިޔާ ލިބިފައިނުވާކަމަށް ހެމާ އަށް ފަރުވާދެމުން އަންނަ ފޯޓިސް ހޮސްޕިޓަލުގެ ޑޮކްޓަރުންނާއި ހަވާލާދީ އިންޑިއާގެ ނޫސްތަކުގައިވެ އެވެ.
މިރޭ ހިނގި އެކްސިޑެންޓާއި ބެހޭގޮތުން ދައުސާގެ ސީނިއާ ޕޮލިސް ރަޖިންދަ ތިޔާގީ ބުނެފައިވަނީ، އަލްޓޯ ކާރު ދުއްވަން އިން ޑްރައިވަރު އެކްސިޑެންޓް ހިނގި ހިސާބުން ދުއްވަމުން އައި އިރު، އެހާ ސަމާލުވެގެން ނެތުމުގެ ސަބަބުން އެކްސިޑެންޓް ހިނގަން މެދުވެރިވީ ކަމަށެވެ. އަދި ހެމާ އިން ކާރު ހައިވޭގައި ދުއްވާފައި ވަނީ ބާރު ސްޕީޑުގައި ކަމަށްވެސް ތިޔާގީ ވަނީ ބުނެފަ އެވެ.
ޕާލިމަންޓްގައި މަރުތާ ސްޓޭޓް ރިޕްރެޒެންޓްކުރާ މާލިނީ އެކްސިޑެންޓް ހިނގި ވަގުތު ދަތުރު ކުރަމުން ދިޔައީ އާގްރާ އިން ޖެއިޕޫރް އަށެވެ. މި އެކްސިޑެންޓް ހިނގާފައިވަނީ ޖެއިފޫރުގެ ވެރިރަށުގެ 60 ކިލޯ މީޓަރު ދުރުން އޮންނަ ދައުސާގެ ހައިވޭގަ އެވެ.