އަތޮޅުތަކު ތެރޭ ހޮސްޕިޓަލުތަކުގައި މަސައްކަތް ކުރުމަށް 633 ނަރުހުން ހޯދަން ހެލްތު މިނިސްޓްރީ އިން މިއަދު އިއުލާނެއް ކޮށްފި އެވެ.
ހެލްތު މިނިސްޓްރީ އިން ބުނީ އެ މިނިސްޓްރީގެ ދަށުން އަތޮޅުތަކުގައި ހިންގާ ހޮސްޕިޓަލްތަކާއި ސިއްހީ މަރުކަޒުތަކުގައި މަސައްކަތް ކުރާ ބިދޭސީ ނަރުހުންގެ ބަދަލުގައި ދިވެހި ނަރުހުން ހޯދުމަށް ބޭނުންވާ ކަމަށެވެ. އަދި އެކަމަށް ޝައުގުވެރިވާ ގާބިލް 633 ދިވެހި ރެޖިސްޓަޑް ނަރުހުން ބޭނުންވާ ކަމަށެވެ.
އެ ނަރުހުންނަށް މަހު މުސާރައިގެ ގޮތުގައި 9060 ރުފިޔާ އާއި އޭގެ އިތުރުން ސާވިސް އެލަވަންސްތައް ވެސް ލިބޭނެ ކަމަށް އެ އިއުލާނުގައި ބުނެފައިވެ އެވެ.
ހެލްތު މިނިސްޓްރީ އިން ދާދި ފަހުން ވަނީ ގިނަ އަދަދަކަށް ސްޕެޝަލިސްޓުން ހޯދުމަށް ވެސް އިއުލާންކޮށްފަ އެވެ. އަތޮޅުތަކު ތެރޭ ސިއްހީ ހިދުމަތް ތަރައްގީ ކުރުމަކީ މި ސަރުކާރުގެ އަމާޒެކެވެ.