ހަދަމުންދިޔަ އިމާރާތަކުން ކުއްޖެއްގެ ބޮލަށް ސިމިންތި ބަސްތާއެއް ވެއްޓި ލިބުނު އަނިޔާއަށް ފަރުވާ ދެމުން ދަނިކޮށް އެ ކުއްޖާ މަރުވި މައްސަލައިގައި ދައުވާކޮށް ދިނުމަށް ފުލުހުން ޕީޖީގައި އެދިއްޖެ އެވެ.
ފުލުހުންގެ އިދާރާ ހިންގެވުމާ ހަވާޅުވެ ހުންނެވި އެކްޓިން ކޮމިޝްނާ އޮފް ޕޮލިސް މުހައްމަދު ހަމީދު މިއަދުގެ ކުރެއްވި ޓުވީޓެއްގައި ވިދާޅުވީ، އެމައްސަލައިގަިއ ދައުވާކުރަން ފޮނުވާފައިވަނީ މީގެ ދެ ހަފްތާ ކުރިން ކަމަށެވެ.
ބަންގަލަދޭޝް ކުއްޖެއްކަމަށްވާ، ރައުޝާން ޖީއާން ބޮލަށް ސިމެންތި ބަސްތާ ވެއްޓިފައިވަނީ ޑަބްލިޔު ކޮންސްޓަރަކްޝަން އިން ހަދަމުން އައި އިމާރާތަކުން އެވެ. މިކަމާ ގުޅިގެން މާލޭ ސިޓީ ކައުންސިލުން ވަނީ މާލޭގައި އިމާރާތް ކުރަމުން ދިޔަ ސައިޓްތައް ބަލައި އިންސްޕެކްޓްކޮށްފަ އެވެ.
މަރުވި ރައުޝާން އަކީ އަތޮޅު ތެރޭގައި ރަށެއްގައި މަސައްކަތް ކުރަމުންދާ ޑޮކްޓަރެއްގެ ކުއްޖެކެވެ. އެމީހުން މާލެ އައީ ޗުއްޓީ އަކަށެވެ. އެ މައްސަލައިގައި އިންސާފު ހޯދުމަށް އެ އާއިލާއިން ވަނީ ނިންމައިފަ އެވެ.