ނުބައްދަލު ބާރުގެ ބޭނުން ކޮށްގެން ފުލުހުން އާންމުންނާއި ކުރިމަތިލާފައިވާނަމަ ފިޔަވަޅު އަޅާނެ ކަމަށް އެކްޓިން ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
އެކްޓިން ސީޕީ ހަމީދު ކުރެއްވި ޓްވީޓެއްގައި ވިދާޅުވީ، ފުލުހުން ނުބައްދަލު ބާރުުގެ ބޭނުންކޮށްގެން އާންމުންނާއި ކުރިމަތިލާފައިވާ ހުރިހާ މައްސަލައެއް ބަލާނެ ކަމަށެވެ. އަދި އަޅަންޖެހޭ ކޮންމެ ފިޔަވަޅެއް އަޅާނެ ކަމަށެވެ. ފުލުހުން ހާލަތާ ނުބައްދަލު ބާރުގެ ބޭނުން ކުރާ ކަމުގެ ޝަކުވާ ރައްޔިތުން ވޭތުވެދިޔަ އަހަރުތަކުގައި ކުރަމުންދާ ކަމަށްވެސް އެކްޓިން ސީޕީ ވިދާޅުވި އެވެ.
އެކްޓިން ސީޕީ އެގޮތަށް ވިދާޅުވެފައިވާއިރު، ކުރީގެ ރައީސް އަބުދުﷲ ޔާމީން އަށް ފަރުވާ ދިނުމަށް މިއަދު އައިޖީއެމްއެޗަށް ގެނައުމުން، އެމަނިކުފާނުގެ ސަޕޯޓަރުންގެ އައިޖީއެމްއެޗުން ބޭރުކޮށްފައިވަނީ ޕެޕާ ސުޕްރޭ ޖަހައިގެން އެވެ. އެކަމާ ގުޅިގެން ފުލުހުންނަށް ޕީޕީއެމް އިންނާއި ޕީއެންސީ އިން ވަނީ ފާޑު ކިޔައިފަ އެވެ.
މީގެ އިތުރުން ރައީސް ޔާމީންގެ ސަރުކާރުގެ ވަރަށް ގިނަ މުޒާހަރާތައް އިދިކޮޅު ފަރާތްތައް ކޮށްފައިވާއިރު، ގިނަ މުޒާހަރާތައް ރޫޅާލާފައިވަނީ ނުބައްދަލު ބާރުގެ ބޭނުންކޮށް އާންމުންނަށް ބޮޑެތި އަނިޔާތަކެއް ދިނުމަށް ފަހު ކަމަށް ބުނެ އޭރު ފުލުހުންނަށް ބޮޑެތި ފާޑުކިޔުންތައް އަމާޒުވި އެވެ.