ކޮޕާ އެމެރިކާގެ ފައިނަލްގައި މިރޭ މުބާރާތް ބާއްވާ ގައުމު ކަމަށްވާ ޗިލީއާ ދެކޮޅަށް އާޖެންޓީނާ ނުކުންނައިރު، އާޖެންޓީނާ އޮތީ ތައްޓަކަށް ކެތްމަދުވެފައި ކަމަށް އެ ޓީމުގެ ކެޕްޓަން ލިއޮނެލް މެސީ ބުނެފި އެވެ.
އާޖެންޓީނާގެ ގައުމީ ޓީމަށް ތައްޓެއް ނުލިބޭތާ 22 އަހަރުވެއްޖެ އެވެ. މިދިޔަ އަހަރު ބްރެޒިލްގައި އޮތް ވޯލްޑް ކަޕްގެ ފައިނަލް އިން ޖާގަ ހޯދި ނަމަވެސް، ފައިނަލްގައި ޖަރުމަން އަތުން އާޖެންޓީނާ ވަނީ ބަލިވެފަ އެވެ.
ފައިނަލް މެޗުގެ ކުރިން މެސީ ،28، ބުނީ ގައުމީ ޓީމަށް ތައްޓެއް ހޯދައިދިނުމަށް އާޖެންޓީނާގެ ހުރިހާ ކުޅުންތެރިން ވެސް ތިބީ ބޭނުންވެފައި ކަމަށެވެ.
"ގައުމީ ޓީމަށް ތައްޓެއް ހޯދައިދޭން ހުރިހާ ކުޅުންތެރިން ވެސް ބޭނުންވޭ،" މެސީ ބުންޏެވެ. "އަހަރެމެންނަށް މިހާރު ތައްޓެއް ހައްގު. އަދި ހާއްސަކޮށް ވޯލްޑް ކަޕްގައި ކުރިމަތިލާން ޖެހުނު ހިތި ނަތީޖާ އަށް ފަހު، މި މުބާރާތް ކާމިޔާބުކުރެވުމަކީ ވަރަށް ބޮޑު ހިތްހަމަޖެހުމަަށް ވާނީ."
އާޖެންޓީނާގައި މިހާރު އޮތް ޓީމަކީ އާޖެންޓީނާ އިން މިހާތަނަށް ނެރިފައިވާ އެންމެ ވަރުގަދަ އެއް ޓީމެކެވެ. މެސީގެ އިތުރުން ދުނިޔޭގެ ފެންވަރުގެ ގިނަ ކުޅުންތެރިންތަކެއް އެ ޓީމުގައި ހިމެނެ އެވެ. އޭގެ ތެރޭގައި މެންޗެސްޓާ ސިޓީގެ ފޯވަޑް ސާޖިއޯ އަގުއޭރޯ އާއި މެންޗެސްޓާ ޔުނައިޓެޑްގެ އަންހެލް ޑިމަރިއާ އާއި ކާލޮސް ޓެވޭޒް އަދި ގޮންޒާލޯ ހިގުއައިން ހިމެނެ އެވެ.
އަގުއޭރޯ ބުނީ މިހާރު އޮތް އާޖެންޓީނާގެ ޓީމަށް ތައްޓެއް ކާމިޔާބުނުކުރެވިއްޖެ ނަމަ، އެއީ މިހާރު ޓީމުގައި ހިމެނޭ ކޮންމެ ކުޅުންތެރިއަކަށް ވެސް "ހަނދާނުން ފޮހެނުލެވޭނެ ހިތާމައަކަށް ވާނެ" ކަމަށެވެ.
އާޖެންޓީނާ މި މުބާރާތް ކާމިޔާބުކޮށްފި ނަަމަ، 15 ވަނަ ތައްޓާއެކު މި މުބާރާތުގައި އެންމެ ކާމިޔާބު ޓީމު ކަމަށްވާ އުރުގުއޭގެ ރެކޯޑާ އާޖެންޓީނާ އަށް އެއްވަރުކުރެވޭނެ އެވެ.
ޗިލީ އަކީ މީގެ ކުރިން ކޮޕާ އެމެރިކާ ކާމިޔާބުކޮށްފައިވާ ގައުމެއް ނޫނެެވެ. އެކަމަކު އެލެކްސިސް ސަންޗޭޒް އާއި އާޓޫރޯ ވިޑާލް ފަދަ ކުޅުންތެރިންނާއެކު، ޗިލީ އަކީ އާޖެންޓީނާ އަށް ދުލެއް ދޭނެ ކުޅުންތެރިއެއް ނޫނެވެ.
"ވަރަށް ގިނަ މީހުން އެބަ ފުއްދާލާ ފައިނަލްގެ ޖާގައަކާއެކު. އެކަމަކު އަމިއްލަ ގައުމުގައި ކުޅެ ކޮޕާ އެމެރިކާ ކާމިޔާބުކުރުމަށް ވުރެ ވަކި ބޮޑު ކާމިޔާބެއް އޮންނާނެތަ؟،" ޗިލީގެ ގޯލްކީޕަރު ކްލައުޑިއޯ ބްރާވޯ ބުންޏެވެ.
ކޮޕާ އެމެރިކާގައި އާޖެންޓީނާ އާއި ޗިލީ 24 ފަހަރު ބައްދަލުކޮށްފައިވާއިރު، ޗިލީ އަށް އާޖެންޓީނާގެ މައްޗަށް ކުރި ހޯދިފައެއްނުވެ އެވެ.
ޗިލީގެ ސަންތިއާގޯ އެސްޓާޑިއޯ ނަޝިއޮނާލްގައި ސްޓޭޑިއަމްގައި މިރޭ އާޖެންޓީނާ އާއި ޗިލީ ބައްދަލުކުރާ މެޗު ފަށާނީ ދަންވަރު 1:00ގަ އެވެ.