މެގަސްޓާ އަމީތާބް ބައްޗަން އަށް ސަޕޯޓްކުރާ އެތަކެއް މިލިއަން ފޭނުންނެއް ތިބޭކަމީ އެއްވެސް ޝައްކެތް އޮތްކަމެއް ނޫނެވެ.
އަމީތާބް ހަމަ ލޮލުން ބަލާލުމަށް ކޮންމެ އާދީއްތަ ދުވަހަކު އޭނާގެ ގެ ކައިރިއަށް އެތައް ހާސް ބަޔަކު އެއްވަމުން އަންނައިރު، އޭނާ އާންމުންގެ ތެރެއަށް ދިއުމުން، ސަޕޯޓަރުން އުޅޭނެ ގޮތް ދެން ނިކަން ހިތަށް ގެންނާށެވެ.
ވަރަށް ގާތް އެކުވެރިއެއްގެ ޖަނާޒާއަށް ދިއުމުން، އަމީތާބް އަށް ސަޕޯޓްކުރާ އެތަކެއް ފޭނުންނެއް އޭނާ ވަށައި ބޮނޑިވެ ސެލްފީ ނަގަން އުޅުމުން އެކަމާ ވަރަށް ހިތްހަމަނުޖެހުނު ކަމަށް އަމީތާބް ބުނެފި އެވެ.
ރޭގެ ވަގުތެއްގައި އަމީތާބް އޭނާގެ ޓްވިޓާގައި އާއި ފޭސްބުކްގައި ލިޔެފައިވާ ޕޯސްޓުގައި ވަނީ ގާތް އެކުވެރިއެއްގެ ގަނާޒާއަށް އޭނާއަށް އެންމެ ފަހުގެ އިހްތިރާމް އަދާކުރަން ގޮސްހުއްޓާ، އޭނާއަށް ތާއީދުކުރާ މީހުން އެފަދަ ގޮތަކަށް އުޅުމުން މަރުވެފައިވާ މައްޔިތާ އަށް އަދި އޭނާއަށް ވެސް އިހްތިރާމް ނުކުރެވުނު ކަމަށާއި އެކަމާ ހިތާމަކުރާ ކަމަށެވެ.
ގާތް އެކުވެރިޔާގެެ ކުއްލި މަރާއިއެކު އިންތިހާއަށް ދެރަވެފައިހުރި އަމީތާބް ޓްވިޓާގައި ލިޔެފައިވަނީ، އޭނާއާއި އެކުގައި އުޅުމަށްފަހު އެކުވެރިޔާގެ ކުއްލި މަރާއެކު ވަރަށް ދެރަވިކަމަށާއި، އެންމެފަހުގެ އިހްތިރާމް އަދާކޮށްފައި އެނބުރި އައި އިރު ނޭނގޭ ހުސްކަމެއް އިހްސާސްކުރެވޭ ކަމަށެވެ. އަދި ޖަނާޒާތަކުގައި މީހުން ސެލްފީ ނެގުމަކީ އެއްވެސް ވަރަކަށް ގަބޫލުކުރެވޭ ކުރެވޭ ކަމެއް ނޫންކަމަށްވެސް އަމީތާބް ލިޔެފައިވެ އެވެ.
އަބަދުވެސް ފޭނުންނާއި ސޯޝަލް މީޑިއާ މެދުވެރިކޮށް އެންމެ ގާތް ގުޅުމެއް ބާއްވަމުން އަންނަކަމަށް ފާހަގަކުރެވިފައިވާ އަމީތާބް އަންނަނީ ފިލްމުތަކުގެ ވާހަކަތަކުގެ އިތުރުން އަމިއްލަ ދިރިއުޅުމުގެ ކަންތައްވެސް ގަވާއިދުން ފޭނުންނާއި ހިއްސާކުރަމުންނެވެ.
އެގޮތުން އަމީތާބްް ވަނީ ދާދިފަހުން އޭނާގެ ބްލޮގްގައި ރަހުމަތްތެރިއެއްގެ މަރުވި ކަމުގެ ހަބަރު ހިއްސާކުރަމުން ވަނީ އެކަމުން އޭނާއަށް ދުނިޔެއަކީ ވަގުތީ ތަނެއް ކަން އެނގިގެންދާކަމަށް ބުނެފަ އެވެ.