"ޖިސްމް 2" އަދި "ރާގިނީ އެމްއެމްއެސް 2" ފަދަ ފިލްމުތަކުގައި "ބޯލްޑް" ރޯލްތައް ކުޅެގެން މަގްބޫލުކަން ހޯދާފައިވާ އިންޑޯ ކެނޭޑިއަން އެޑަލްޓް އެކްޓްރެސް ސަނީ ލިއޯން ވަނީ ބޮލީވުޑްގެ ނަން މަޝްހޫރު ބަތަލާއިންނާއި އެއް ހަމައެއްގައި ފައިތިލަ ސާބިތުކޮށްފަ އެވެ.
ބޮލީވުޑްގެ އޭ ލިސްޓް ތަރިންނާއި އެކު މަސައްކަތްކުރުމަކީ ދެކޭ ހުވަފެނެއް ކަމަށް މަދު ދުވަސްކޮޅެއްގެ ތެރޭގައި ބޮޑު މަގުބޫލުކަމެއް ހޯދާފައިވާ ސަނީ ބުނެފި އެވެ.
މި އިންޑަސްޓްރީއަށް ކޮންމެ މީހަކުވެސް ނިކުންނައިރު، ކުރިން ފިލްމުތަކުން ފެނިފައިވާ މަޝްހޫރު ތަރިންނާއިއެކު މަސައްކަތްކުރުމުގެ ހުވަފެން ދެކެމުން އަންނަ ކަމަށާއި، އޭނާއަކީ ބޮލީވުޑަށް ތައާރަފު ވުމުގެ ކުރިންވެސް ހިންދީ ފިލްމުތައް ގަވާއިދުން ބަލަމުން އައި މީހެއްކަމަށް ވެސް ސަނީ ވަނީ ބުނެފަ އެވެ.
އަދި ބޮޑެތި ތަރިންނާއިއެކު މަސައްކަތްކުރަން ފުރުސަތު ލިބިއްޖެނަމަ އޭނާގެ ހުނަރު ކުރިއަރުވަން ފުރުސަތު ލިބިގެންދާނެ ކަމަށް ގަބޫލުކުރާކަމަށް ވެސް ސަނީ ވަނީ ބުނެފަ އެވެ.
މިހާތަނަށް ކުރަން އަޒުމް ކަނޑައެޅި ހުރިހާ ކަމެއް ހާސިލްކޮށްފައިވާ ކަމަށް ބުނަމުން ސަނީ ވަނީ އޭނާ ކުޅޭ ހުރިހާ ރޯލްތައް އެންމެ ފުރިހަމަ އަށް ކުޅުމަށް ވަރަށް ބުރަ މަސައްކަތްކުރާ ކަމަށެވެ. އަދި އޭނާއަށް އެންމެ މުހިންމީ އޭނާއަށް ސަޕޯޓްކުރާ ފޭނުންކަމަށާއި އަދި އެމީހުންނާއި ގަވާއިދުން ގުޅުން ބޭއްވުން ކަމަށެވެ.
އުމުރުން 34 އަހަރުގެ ސަނީ މިހާރު އަންނަނީ އެމްޓީވީ އިން ދައްކަމުން އަންނަ ރިއަލިޓީ ޝޯ "އެމްޓީވީ ސްޕްލިޓްސްވިލާ" ގެ އަށްވަނަ ސީޒަން އެކްޓަރު ރަންވިޖޭ އާއިއެކު ހުށަހަޅަމުންނެވެ.
މީގެކުރިންވެސް މި ޝޯގެ ހަތްވަނަ ސީޒަން ކޯ ހޯސްޓްކޮށްފައިވާ ސަނީ ބުނީ އެހެން އަހަރުތަކާއި ހިލާފަށް މިފަހަރުގެ ޝޯ ބޮޑަށް ބިނާވެފައިވަނީ އަންހެން ކުދިންނަށް ހާއްސަ ކަންތައްތަކަށް އިސްކަންދީގެން ކަމަށެވެ.
"އެމްޓީވީ ސްޕްލިޓްސްވިލާ" އަކީ އެމެރިކަން ރިއަލިޓީ ޝޯ "ފްލޭވާ އޮފް ލަވް" ގެ އިންޑިއަން ވާޝަން އެވެ.
ޕްރޮޑިއުސަރު ޑެނިއަލް ވެބާ އާއި ކައިވެނިކޮށްގެން ނުއުޅޭނަމަ ޑޭޓްކުރަން ބޭނުންވަނީ ކާކާތޯ އެހުމުން ސަނީ ވަނީ އޭނާ ކައިވެނި ނުކޮށް ހުސްހަށިބައިކޮށް ހުރިނަމަ ބްރެޑް ޕިޓް އާއި ޑޭޓްކުރަން ބޭނުންވާ ކަމަށެވެ.
ސަނީ މިވަގުތު ފިލްމެއްގެ މަސައްކަތްކުރަމުން ނާންނައިރު، އޭނާ އަންނަނީ ސެންސަރު ބޯޑުން ފާސްކުރުން ލަސްކޮށްފައިވާ ސެކްސް ކޮމިޑީ ފިލްމު "މަސްތިޒާދޭ" ފާސްކުރާނެ އިރަކަށް އިންތިޒާރުކުރަމުންނެވެ. މީގެއިތުރުންވެސް ދެން ސަނީ އެންމެ އަވަހަށް ފެނިގެންދާނީ "ބެއިމާން" އާއި "ވަން ނައިޓް ސްޓޭންޑް" އިންނެވެ.