ކުރަމަތި ރިސޯޓްގައި ފަތުރުވެރިއަކު ގެނބިގެން މަރުވެއްޖެ

އއ. ކުރަމަތި ރިސޯޓްގައި ފަތުރުވެރިއަކު ގެނބިގެން މަރުވެއްޖެ އެވެ. މަރުވެފައިވަނީ ޖަރުމަނުވިލާތުގެ އަންހެނެކެވެ.

ފުލުހުން ބުނީ، މޫދަށް އެރި އުޅެނިކޮށް ގެނބިގެން މަރުވެފައިވަނީ 60 އަހަރުގެ ޖަރުމަނު ވިލާތުގެ އަންހެނެއް ކަމަށެވެ. އަދި އެކަމުގެ މައުލޫމާތު ފުލުހުންނަށް ލިބިފައިވަނީ މިއަދު ހަވީރު 4:50 އެހާއިރު ކަމަށެވެ.

ކުރަމަތި ރިސޯޓްގައި ފަތުރުވެރިއަކު ގެނބިގެން މަރުވެފައިވާއިރު، މިދިޔަ ހޮނިހިރު ދުވަހު ވަނީ ކ. މާފުށީގައި ތުރުކީއަށް ނިސްބަތްވާ 40 އަހަރުގެ ފިރިހެނަކު ގެނބިގެން މަރުވެފަ އެވެ.

ގެނބިގެން ފަތުރުވެރިން މަރުވާ ހާދިސާ މިފަހުން ވަނީ އިތުރުވެފަ އެވެ. އެކަމާ ގުޅިގެން ޓޫރިޒަމް މިނިސްޓްރީއިން އެ ހާދިސާ ހިނގާ ސަބަބުތައް ދެނެގަތުމަށް މަސައްކަތްތަކެއް ވެސް ވަނީ ފަށައިފަ އެވެ.