އައްޑޫ ސިޓީ ހިތަދޫގައި ރޭ ތޫނު އެއްޗަކުން ހަމަލާދީ ބިދޭސީއަކު ޒަހަމްކޮށްލި މައްސަލާގައި ތިން މީހަކު ހައްޔަރުކޮށްފި އެވެ.
ފުލުހުން ބުނީ، ރޭ އައްޑޫ ސިޓީގައި ހިނގި މާރާމާރީއާ ގުޅިގެން 24 އަހަރުގެ ދެ ފިރިހެނަކާއި 18 އަހަރުގެ ފިރިހެނަކު މިރޭ 7:15 ގައި ހައްޔަރުކޮށްފައިވާ ކަމަށެވެ. އެތިން މީހުންވެސް ހައްޔަރު ކޮށްފައިވަނީ ކޯޓް އަމުރެއްގެ ދަށުންނެވެ.
މާރާމާރީއާ ގުޅޭގޮތުން ފުލުހުން މީގެ ކުރިން ބުނެފައިވަނީ، ތޫނު އެއްޗަކުން ހަމަލާދީ ޒަހަމް ކޮށްލާފައިވަނީ ރޭ ފަތިހު 4:00 ހާއިރު، އައްޑޫ ސިޓީ ހިތަދޫ ބޮޑު މަގުން ބައިސިކަލްގައި ދުއްވާފައިދިޔަ އިންޑިއާގެ މީހަކަށް ކަމަށެވެ. ތޫނު އެއްޗަކުން ހަމަލާދީފައިވަނީ އޭނާގެ މޫނު މައްޗަށެވެ.
އޭނާއަށް ފަރުވާ ދެމުން އަންނަނީ ހިތަދޫ ރީޖަނަލް ހޮސްޕިޓަލުގައި އެވެ. އެ ހޮސްޕިޓަލުން ބުނީ، އޭނާގެ ހާލު ވަރަށް ސީރިއަސް ކަމަށާއި އޭނާ އަށް ފަރުވާ ދެމުން އަންނަނީ އައިސީޔޫގައި ކަމަށެވެ. އަދި އިތުރު ފަރުވާއަށް މާލެ ފޮނުވާލުމަށްޓަކައި އޭނާގެ ސްޕޮންސާއާ ވާހަކަ ދައްކަމުންދާ ކަމަށްވެސް ހޮސްޕިޓަލުން ބުންޏެވެ.