ކުރީގެ ނައިބު ރައީސް އަހްމަދް އަދީބް ޑޮކްޓަރަށް ދެއްކުމަށްފަހު އަނބުރާ މާފުށި ޖަލަށް ގެންގޮސްފި އެވެ.
އަދީބުގެ އަބިކަނބަލުން މަރިޔަމް ނަޝްވާ މިއަދު ކުރެއްވި ޓުވީޓެއްގައި ބުނީ، އަދީބު ޑޮކްޓަރަށް ދެއްކި ކަމަށް ބުނާ ލިޔުމެއް އޭނާއަށް ލިބިފައިވާ ކަމަށެވެ. އެލިޔުމުގައި ވާގޮތުން އަދީބު އައިޖީއެމްއެޗް އަށް ގެނެސް ދައްކާފައިވަނީ ނާރުގެ ޑޮކްޓަރަކަށެވެ. އަދި އަދީބުގެ ނާރުގެ ޑޮކްޓަރަށް ދެއްކިއިރު އަދީބު މީގެ ކުރިން ހަދާފައިވާ ބޮލުގެ އެމްއާރްއައި ސްކޭން އެއްވެސް ޑޮކްޓަރަށް ދައްކާފައިވާ ކަމަށް އޭނާ ބުންޏެވެ.
އަދީބް ގޭގައި ބަހައްޓައިގެން ފަރުވާދިނުމަށް ދީފައިވާ މުއްދަތު ހަމަވުމުން، ވަނީ އަނބުރާ ޖަލަށް ގެންގޮސްފަ އެވެ. މިކަމާ ގުޅިގެން އަދީބް އުފެއްދި ސިޔާސީ ޕާޓީ ކަމަށްވާ އެމްޓީޑީ އިން ވަނީ ހޯމް މިނިސްޓަރު އިމްރާނަށް ވަރަށް ބޮޑަށް ފާޑު ކިޔާ އިސްތިއުފާ ދިނުމަށް ގޮވަލައިފަ އެވެ.
ނަމަވެސް މިނިސްޓަރު އިމްރާން ވިދާޅުވެފަވަނީ އަދީބް އާމެދު ނުހައްގުން އެއްވެސް ކަމެއް ކޮށްފައިނުވާނެ ކަމަށެވެ.
ކުރީގެ ރައީސް އަބްދުﷲ ޔާމީން އަވާހަރަކޮށްލުމުގެ ގޮތުން ފިނިފެންމާ ލާންޗުގައި ބޮން ގޮއްވުމުގެ ކުށް ސާބިތުވުމާއި އެމްއެމްޕީއާރްސީ މެދުވެރިކޮށް ހިންގި 1.2 ބިލިއަން ރުފިޔާގެ ކޮރަޕްޝަންގެ ތުހުމަތުގައި އަދީބުގެ މައްޗަށް ވަނި 33 އަހަރުގެ ޖަލު ހުކުމެއް އިއްވާފަ އެވެ.