އަސާރީ މޯލްޑިވްސް އާއި މޯލްޑިވްސް އެގްޒެބިޝަން އެންޑް ކޮންފަރެސް ސާވިސްއިން ރާއްޖޭގައި މިހާތަނަށް ބާއްވާ އެންމެ ބޮޑު އިންޓަނޭޝަނަލް އެޑިއުކޭޝަން އެންޑް ކެރިއާ އެކްސްޕޯ މާދަމާ ހަވީރު ދަރުބާރުގޭގައި ބޭއްވުމަށް ނިންމައިފި އެވެ.
މިއީ އާސާރި މޯލްޑިވްސް އާއި އެގްޒެބިޝަން އެންޑް ކޮންފަރެސް ސާވިސްއިން ބާއްވާ ހަތަރު ވަނަ އެޑިއުކޭޝަން އެކްސްޕޯއެވެ. މި އެކްސޯގައި މަތީ ތައުލީމު ހާސިލް ކުރުމަށް ބޭނުންވާ ފަރާތްތަކާއި، ވަޒީފާތަކަށް ނިކުންނަން ތައްޔާރުވެފައިވާ ޒުވާނުންނަށް ހާއްސަ ކޮށްގެން ތަފާތު ތަޖުރިބާތަކެއް ހިމެނޭގޮތަށް ހަތަރު ސެމިނާއެއް ބޭއްވުމަށް ވަނީ ހަމަޖެހިފައިފަ އެވެ.
މި ހަތަރު ސެމިނާވެސް ހުށަހަޅައި ދޭނީ ރާއްޖޭން ބޭރުގެ ތަޖުރިބާކާރުންނެވެ. ސެމިނާތަކުގެ ތެރޭގައި ފަތުރުވެރިކަމާއި ކަލިނަރީ އާއި، ސެންޗަރީ ޑިޒައިން އާއި ބްރޭންޑިން އެންޑް ޑިވޮލޮޕްމެންޓް އަދި މެޑިކަލް އެޑިއުކޭޝަންގެ ޒަމާނީ ޓްރެންޑް ހިިމެނެ އެވެ.
ދަރުބާރުގޭގައި ކުރިއަށްގެންދާ މިއެކްސްޕޯގައި 46 އަށްވުރެ ގިނަ ޔުނިވާސިޓީތަކުން ކިޔަވައިދެމުންދާ 500 އަށްވުރެ ގިނަ ކޯސްތަކުގެ މައުލޫމާތު އެކްސްޕޯގެ ބައިވެރިންންނަށް ދިނުމަށް ވަނީ ހަމަޖެހިފަ އެވެ. އަދި މިއެކްސްޕޯގައި ސެޓްފިކެޓް ލެވެލް އިން ފެށިގެން ޕީއެޗްޑީ ޕްރޮގްރާމްތަކުގެ މައުލޫމާތު ބައިވެރިންނަށް ލިބޭނެ އިންތިޒާމު ވަނީ ހަމަޖައްސާފަ އެވެ.
އެކްސްޕޯގައި ބައިވެރިވާ ދަރިވަރުންނަށް، އެދަރިވަރަކު ވަޒީފާ އަދާ ކުރަން ބޭނުންވާ ދާއިރާތަކުގެ މައުލޫމާތުވެސް ލިބޭނެ އިންތިޒާމު ވަނީ ހަމަޖައްސާފަ އެވެ.
މިއެކްސްޕޯގައި ރާއްޖޭގެ ކޮލެޖުތަކުގެ އިތުރުން ސްރިލަންކާ، މެލޭޝިއާ، ތައިލެންޑް ސުވިޒަލޭންޑް، ޖާމަނީ އަދި އެހެނިހެން ގައުމުތަކުގެ ޔުނިވާސިޓީތަކުން، އެކްސްޕޯގައި ބައިވެރިންނަށް ހުޅުވާލެވިފައިވާ ކޯސްތަކުގެ މައުލޫމާތު ދޭނެ އެވެ.