ފެބްރުއަރީ 23 ވަނަ ދުވަހުން ފެށިގެން މާޗު އެއް ވަނަ ދުވަހުގެ ނިޔަލަށް 51 އެކްސިޑެންޓް ހިގާފައިވާކަމަށް ފުލުހުން ބުނެފި އެވެ.
ޓްރެފިކް ފުލުހުންގެ މިދިޔަ ހަފްތާގެ ތަފާސްހިސާބުތައް ދައްކާ ގޮތުން، ގަވާއިދާ ހިލާފަށް އުޅަނދު ދުއްވުމާ ގުޅިގެން ފުލުހުން ވަނީ 1341 އުޅަނދެއް ހުއްޓުވާފަ އެވެ. އެ ހިސާބުތަކުން ދައްކާގޮތުގައި 258 އުޅަނދެއް ދުއްވާފައިވަނީ ލައިސަންސް ނެތި އެވެ. އަދި 18 އަހަރު ނުވާ ފަސް ފަރާތަކުން ވަނީ އުޅަނދު ދުއްވާފަ އެވެ.
މީގެ އިތުރުން ކަނޑައެޅިފައިވާ ސްޕީޑް ލިމިޓަށްވުރެ ބާރު ސްޕީޑުގައި އުޅަނދު ދުއްވުމާ ގުޅިގެން ފަސް ފަރާތެއް ވަނީ މަޑު ކުރުވާފަ އެވެ. އަދި 17 ކާރަކާއި އަށް ސައިކަލު ޓޯކޮށްފައިވާއިރު ގަވާއިދާ ހިލާފަށް ޕާކު ކޮށްގެން އެއް ހަފްތާތެރޭ ވަނީ 127 އުޅަނދެއްގައި ސްޓިކާ ޖަހާފަ އެވެ.
އުޅަނދު ދުއްވަމުން ފޯން ބޭނުންކުރި 70 ފަރާތެެއް ހުއްޓުވާފައިވާ ކަމަށް ވެސް ފުލުުހުން ބުންޏެވެ. އަދި ކުޑަ ކުދިން ގޮވައިގެން އުޅަނދުގައި ދާނަމަ ހުންނަން ޖެހޭ ރައްކާތެރިކަން ނެތުމުގެ ސަބަބުން އެއް ފަރާތެއް ވަނީ ހުއްޓުވައިފަ އެވެ.
މީގެ އިތުރުން ގަވާއިދާ ހިލާފަ އޯވާޓޭކް ކުރި ފަސް ފަރާތަކަށް ފިޔަވަޅު އެޅިއިރު، މުއަދަތު ހަމަވެގެން ނުވަތަ ހަލާކުވެފައިވާ ލައިސަންސް ކާޑެއް ބޭނުންކޮށްގެން އުޅަނދު ދުއްވި 168 ފަރާތެއްގެ ލައިސަންސް ވެސް ވަނީ މިދިޔަ ހަފްތާގެ ތެރޭގައި ހިފަހައްޓައިފަ އެވެ.