ކުއަލަ ލަމްޕޫރު (މާޗް 4) - މީހެ ފަސް އަހަރު ކުރިން ގެއްލުނު މެލޭޝިއާ އެއާލައިންސްގެ މަތިންދާބޯޓު އެމްއެޗް 370 ހޯދުމުގެ މަސައްކަތް އަލުން ފެށުމުގެ ހުއްދަ ދޭން ތައްޔާރަށް އޮތް ކަމަށް މެލޭޝިއާ ސަރުކާރުން ބުނެފި އެވެ.
މެލޭޝިއާގެ ޓްރާންސްޕޯޓް މިނިސްޓަރު އެންތަނީ ލޯކޭ ވިދާޅުވީ، އެ ފްލައިޓް ހޯދުމުގެ މަސައްކަތަށް އެކަމަށް ޝައުގުވެރިވާ ކުންފުންޏަކުން ރަނގަޅު ޕްރޮޕޯސަލްއެއް ހުށަހަޅައިފިނަމަ އެކަމާމެދު ވިސްނާނެ ކަމަށެވެ.
މެލޭޝިއާގެ ވެރިރަށް ކުއާލަަލަމްޕޫރުން ފުރައިގެން ޗައިނާގެ ވެރިރަށް ބެއިޖިން އަށް 239 މީހުންނާއިގެން ދަތުރުކުރަނިކޮށް މަތިންދާބޯޓު އެމްއެޗް 370 ގެއްލުނީ 2014 ވަނަ އަހަރުގެ މާޗްމަހުގެ އަށް ވަނަ ދުވަހުއެވެ.
"އެކަމަށް ރަނގަޅު ހެކިތަކާއިއެކު ޕްރޮޕޯސަލެއް ލިބިއްޖެނަމަ އަޅުގަނޑުމެން އެކަމާމެދު ވިސްނާނަން، އަދި އެ ޕްރޮޕޯސަލާމެދު މަޝްވަރާކޮށް ކުރިއަށް ދިއުމާމެދު މަޝްވަރާކުރަން މިތިބީ ތައްޔާރަށް،" އެންތަނީ ވިދާޅުވި އެވެ.
އެމްއެޗް 370 ހޯދުމަށް ބެލި ސަރަހައްދަކީ ދުނިޔޭގެ ތާރީހުގައި ވެސް މަތިންދާބޯޓެއް ހޯދަން ބެލި އެންމެ ބޮޑު ސަރަހައްދެވެ. އެގޮތުން އިންްޑިއާ ކަނޑުގެ 46،300 އަކަމޭލުގެ ސަރަހައްދެއް ވަނީ ބަލާފަ އެވެ. މެލޭޝިއާގެ އިތުރުން އޮސްޓްރޭލިއާ އަދި ޗައިނާ އިން އެ މަސައްކަތަށް 140 މިލިއަން ޑޮލަރު ހަރަދުވި އެވެ. އޭގެ ފަހުން، އެމެރިކާގެ އޯޝަން އިންފިނިޓީ ނަމަކަށް ކިޔާ އަމިއްލަ ކުންފުންޏަކުން އެ ބޯޓު ހޯދުމުގެ މަސައްކަތް ނިންމާލީ މިދިޔަ މެއި މަހުގެ 29 ވަނަ ދުވަހު އެވެ.
އެމެރިކާގެ ކުންފުނިން އެ މަސައްކަތްކުރީ 70 މިލިއަން ޑޮލަރުގެ އެއްބަސްވުމެއްގެ ދަށުންނެވެ. މެލޭޝިއާ ސަރުކާރާއެކު ވި އެ އެއްބަސްވުމުގެ ދަށުން، އެ ފައިސާ ކުންފުންޏަށް ލިބޭނީ ބޯޓު ހޯދިއްޖެނަމަ އެވެ.
ނަމަވެސް، އާޖެންޓިނާގެ ސަބްމެރީން ހޯދި އެ ކުންފުނިން ބުނީ، ފަހުގެ ޓެކްނޮލޮޖީގެ އަލީގައި އެމްއެޗް 370 ވެސް ހޯދޭނެކަމުގެ ފުރުސަތު ބޮޑުކަމަށެވެ. އަދި މިހާރު ލިބިފައިހުރި ޑޭޓާތައް ދިރާސާ ކުރަމުންދާކަމަށާއި، އެ ބޯޓު ހޯދުމުގެ މަސައްކަތް އަލުން ފެށުމުގެ ޝައުގުވެރިކަންހުރި ކަމަށް އެ ކުންފުނިން ވަނީ ބުނެފަ އެވެ.
ބޯޓުން ދަތުރުކުރި މީހުންގެ ތެރެއިން 153 މީހުންނަކީ ޗައިނާ މީހުންނެވެ. އަދި 38 މީހުންނަކީ މެލޭޝިއާ މީހުންނެވެ. ދެން ތިބީ އީރާން، އެމެރިކާ، ކެނެޑާ، އޮސްޓްރޭލިއާ، އިންޑިއާ ، ފްރާންސް ، ނިއުޒީލޭންޑް ، ޔުކްރެއިން، ރަޝިޔާ، ޓައިވާން އަދި ނެދަލޭންޑްސް މީހުންނެވެ.
އެމްއެޗް 370 ގެއްލުނު ސަބަބު ހޯދުމަށް ހިންގި ތަހުގީގަށް ފަހު ނެރުނު ރިޕޯޓުގައި، އެ ބޯޓު ގަސްދުގައި އެހެން ދިމާލަކަށް ގެންގޮސްފައިވާ ކަމަށް ވަނީ ބުނެފަ އެވެ.
ނަމަވެސް، 495 ގަނޑުގެ ތަފްސީލީ ރިޕޯޓުގައި، އެ ބޯޓު އެހެން ދިމާލަކަށް އަނބުރާލި ސަބަބާއި އެކަން ކުރި މީހަކު ހިމަނާފައެއްނުވެ އެވެ. އެ ސުވާލުތަކުގެ ޖަވާބު ލިބޭނީ ބޯޓުގެ ބައެއް ފެނިގެންކަމަށް، އެ ތަހުގީގު ހިންގުމުގައި އިސްކޮށް އުޅުއްވި އޮފިޝަލުން ވަނީ ވިދާޅުވެފަ އެވެ.