ތިނަދޫ ދެކުނު ދާއިރާގެ މެންބަރު އަބްދުﷲ އަހުމަދު އަބްޅޯ ތިނަދޫގެ ޒުވާނުންނަށް ހާއްސަކޮށް އެއް ދުވަހުގެ ފުޓްސެލް ޓޯނަމަންޓެއް އިންތިޒާމް ކުރަން ނިންމައިފި އެވެ.
އަންނަ އެޕްރީލް ހަވަނަ ދުވަހު ބާއްވާ 19 ވަނަ ރައްޔިތުން މަޖިލީހުގެ އިންތިހާބުގައި ވެސް ތިނަދޫ ދެކުނު ދާއިރާއަށް ކުރިމަތިލައްވާފައިވާ އަބްޅޯ ތިނަދޫ ޒުވާނުންނަށް ހާއްސަކޮށް ބާއްވާ، "އަބްޅޯ 19 ފުޓްސެލް ޗެލެންޖަކީ" އެއް ދުވަހުގެ މުއްދަތަށް މާލޭގައި ބާއްވާ މުބާރާތެކެވެ.
އެ މުބާރާތް އިންތިޒާމް ކުރުމުގައި އިސްކޮށް އުޅޭ އަބްޅޯގެ ކެމްޕޭން ޓީމްގެ މެންބަރު، ރީހާން ރަޝީދު ބުނީ "އަބްޅޯ 19 ފުޓްސެލް ޗެލެންޖް"ގައި ބައިވެރިވާން މިއަދުން ފެށިގެން މި މަހުގެ 10 ވަނަ ދުވަހާ ހަމަޔަށް ފޯމް ހުށަހެޅޭނެ ކަމަށެވެ. އޭނާ ބުނި ގޮތުގައި، ފައިވް އޮން ފައިވް އުސޫލުން ކުޅޭ މި މުބާރާތުގައި ބައިވެރިވާން އީމެއިލް މެދުވެރިކޮށް ވެސް މި ފޯމް ހުށަހެޅޭނެ އެވެ. ފޯމް ފުރުމަށް ފަހު ފޮނުވަން ޖެހޭ އީމެއިލް އެޑްރެސްއަކީ؛ [email protected] އެވެ.
މި މަހުގެ 22ވާ ހުކުރު ދުވަހު ބާއްވާ މި މުބާރާތުގެ ޗެމްޕިއަން ޓީމަށް، 10،000 ރުފިޔާ ވަނީ ހުށަހަޅައިފަ އެވެ. އަދި ރަނަ ރަޕް ޓީމަށް، 5،000 ރުފިޔާ ދިނުމަށް ވަނީ ހަމަޖެހިފަ އެވެ. މާޗް 22 ވަނަ ދުވަހު އެ މުބާރާތް އޮންނާނީ، މެރީ ބްރައުން ރެސްޓޯރަންޓް ބިއްދޮށުން އޮންނަ މިނީ ފުޓްސަލް ދަނޑުގަ އެވެ.
ރީހާން ބުނީ މި މުބާރާތުގައި ބައިވެރިވާ ކޮންމެ ޓީމަކުން ވެސް އޮފިޝަލާ އެކު ހަ ކުޅުންތެރިން ބައިވެރި ކުރަން ޖެހޭނެ އެވެ. އަދި އެ ހުރިހާ ކުޅުންތެރިންނަކީ ތިނަދޫ އަށް ނިސްބަތްވާ ފަރާތްތަކަށް ވާން ޖެހޭނެ ކަމަށް އޭނާ ބުންޏެވެ. އަދި ހުރިހާ ޓީމްތަކަށް ވެސް ޖޯޒީ ދޭނީ މުބާރާތް އިންތިޒާމް ކުރާ އަބްޅޯ 2019ގެ ކެމްޕޭން ޓީމުން އެވެ.
"މި މުބާރާތުގައި ކޮންމެވެސް އެއް ޓީމަކަށް އެމްޕީ އަބްޅޯ ވެސް ކުޅުއްވާނެ،" ރީހާން ބުންޏެވެ.
އެ މުބާރާތުގެ ތިނަދޫގެ ޒުވާނުން އެކުވެރި މާހައުލެއްގައި ބައްދަލުކޮށް، އެކުވެރިކަން އާލާކުރުމަށް އެމްޕީ އަބްޅޯ ހުޅުވާލާ ފުރުސަތެކެވެ. އަބްޅޯ މެންބަރަކަށް ހުންނަވައިގެން ތިނަދޫއަށް ވަނީ ތަރައްގީގެ ގޮތުން އާ ކަންތައްތަކެއް ގެެނެސްދީ ފަސޭހަތަކެއް ހޯދައިދީފަ އެވެ.
މުބާރާތާ ގުޅޭ އިތުރު މައުލޫމާތެއް އޮޅުން ފިލުވަން ބޭނުން ނަމަ، 9991815, 9999621 އަށް ގުޅުމުން ލިބޭނެ ކަމަށް އިންތިޒާމް ޓީމުން ބުންޏެވެ.