ސައުދީ އަރަބިއްޔާގެ ޖިއްދާގައި ރާއްޖޭގެ ކޮންސިއުލޭޓެއް ވަރަށް އަވަހަށް ހުޅުވަން ނިންމާފައިވާ ކަމަށް ފޮރިން މިނިސްޓަރު އަބުދުﷲ ޝާހިދު ވިދާޅުވެއްޖެ އެވެ.
މިނިސްޓަރު ޝާހިދު އެކަން އިއުލާން ކުރެއްވީ ޔުނައިޓެޑް އަރަބް އެމިރޭޓްސް (ޔޫއޭއީ)ގެ އަބޫ ދާބީގައި އިއްޔެ ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ފޮރިން މިނިސްޓަރުންގެ 46 ވަނަ ކައުންސިލް ބައްދަލުވުމުގައި އެވެ.
މިނިސްޓަރު ވިދާޅުވީ، ވަރަށް އަވަހަށް ރާއްޖޭގެ ކޮންސިއުލޭޓެއް ޖިއްދާގައި ހުޅުވިގެންދާނެ ކަމަށާއި އެކަމަކީ ލިބިގެންދާ ވަރަށް ބޮޑު އުފަލެއް ކަމަށެވެ. އަދި އެކަމުގެ ސަބަބުން ރާއްޖެއަށް އިތުރު ފަސޭހަތައް ލިބި، އޯއައިސީއާ ގާތުން މަސައްކަތް ކުރުމަށް ފުރުސަތު ލިބިގެންދާނެ ކަމަށްވެސް މިނިސްޓަރު ވިދާޅުވި އެވެ.
ޖިއްދާގައި ރާއްޖޭގެ ކޮންސިއުލޭޓެއް ގާއިމް ކުރަން ނިންމާފައިވާއިރު، ކޮންސިއުލޭޓް ގާއިމް ކުރާނެ ވަކި ތާރީހެއް މިނިސްޓަރު ހާމައެއް ނުކުރައްވަ އެވެ.
ސައުދީ އަރަބިއްޔާގެ ޖިއްދާގައި ރާއްޖޭގެ ފުރަތަމަ ކޮންސިއުލޭޓެއް ގާއިމް ކުރަން ނިންމާފައިވާއިރު، ސައުދީގެ ރިޔާދުގައި ރާއްޖޭގެ އެމްބަސީއެއް ވަނީ މީގެ ކުރިން ގާއިމްކޮށްފަ އެވެ.