ރާއްޖޭގެ ޖަމިއްޔާތަކަށް އަމާޒުކޮށް އަންނަ ހޮނިހިރު ދުވަހު ބޮޑު ފެއާއެއް ހޯމް މިނިސްޓްރީ އިން ބާއްވަން ނިންމައިފި އެވެ.
ހޯމް މިނިސްޓްރީ އިން ބުނީ، ހަވަލި ނަމުގައި ބާއްވާ ފެއާ އޮންނާނީ އަންނަ ހޮނިހިރު، އާދިއްތަ އަދި ހޯމަ ދުވަހު ދަރުބާރުގޭގައި ކަމަށެވެ. އެފެއާގައި ވ. އަތޮޅުން ފިޔަވާ ރާއްޖޭގެ ހުރިހާ އަތޮޅަކުން 100 އަށްވުރެ ގިނަ ޖަމިއްޔާތަކުން ބައިވެރިވާނެ ކަމަށެވެ.
މިނިސްޓްރީން ބުނީ، ފެއާގެ އެންމެ ބޮޑު އަމާޒަކީ އެއް ދާއިރާއަކުން މަސައްކަތްކުރާ ޖަމްއިއްޔާތައް ގުޅުން ބަދަހިކޮށް ގުޅިގެން މަސައްކަތްކުރެވޭނެ މަގު ފަހިކޮށްދިނުން ކަމަށެވެ. ވިޔަފާރިވެރިންނާ އެހީދޭ ފަރާތްތަކާއި ގުޅުން ބަދަހި ކުރުން ކަމަށެވެ. އަދި ޖަމިއްޔާތަކުގެ މެދުގައި އޮންނަ ގުޅުން ހަރުދަނާ ކުރުން ކަމަށްވެސް މިނިސްޓްރީން ބުންޏެވެ.
ހޯމް މިނިސްޓްރީ އިން ބުނީ ޖަމިއްޔާތަކަށް އެންމެ ބޭނުންވާ ތަމްރީންތަކަކީ ޕްރޮޕޯސަލް އާއި ޕްރޮޖެކްޓްތައް ހެދުމާއި ގުޅޭ ދާއިރާތައް ކަމަށެވެ. އެގޮތުން ފެއާގައި ޖަމިއްޔާތަކަށް ބޭނުންވާ ތަމްރީން ދިނުމަށްވަނީ ހަމަޖެހިފަ އެވެ. ޕްރޮޕޯސަލް ތައްޔާރުކުރުމާއި ޕްރޮޖެކްޓް ހެދުމާއި ވޯކް ޕްލޭން ހެދުމުގެ އިތުރުން ބަޖެޓް ހެދުމުގައި ތަމްރީންތައް ފޯރުކޮށްދޭނެ އެވެ.
ފެއާގައި ކީނޯޓްސް ފޯރުކޮށް ދެވޭނެ އެވެ. އެގޮތުން ކީނޯޓް ފޯރުކޮށްދެވިގެންދާ ދާއިރާތަކަކި ކޮމިއުނިޓީގެ ތަރައްގީގައި ޖަމްއިއްޔާތަކަށް އަދާކުރެވޭނެ ދައުރާއި ޖަމްއިއްޔާތަކުގެ ދައުރާއި ދަނޑުވެރިކަމުގެ ދާއިރާއާ ކޮމިއުނިޓީގެ ތަރައްގީގައި ޒުވާނުންގެ ދައުރާއި ލިބެންހުރި ވަސީލަތްތައް ބޭނުންކޮށްގެން މަސައްކަތްކުރުމާއި ރާއްޖޭގެ އާސާރީ ތަންތަން ހިމާޔަތްކުރުމާއި އެތަންތަނުގެ މުހިއްމުކަންކަމާއި ގުޅޭ ގޮތުން ކީނޯޓްސް ދެވޭނެ ކަމަށެވެ. ކީނޯޓްސް ސެޝަންތައް އޮންނާނީ ސްޓެލްކޯގައި ކަމަށް މިނިސްޓްރީން ބުންޏެވެ.
ކީނޯޓްސްތައް ކުރިއަށް ގެންދާނީ ތަފާތު ދާއިރާތަކުގެ ތަޖުރިބާހުރި ބޭފުޅުން ކަމަށެވެ. އޭގެ ތެރޭގައި ޖަމިއްޔާތަކުގެ ބޭފުޅުންވެސް ހިމެނޭނެ ކަމަށެވެ. އަދި ކީނޯޓްސް ސެޝަންތަކުގައި އާންމުނަށްވެސް ބައިވެރިވެވޭނެ ކަަމަށް މިނިސްޓްރީން ބުންޏެވެ.
ފެއާގައި ބައެއް ހާއްސަ ކަންކަންވެސް ހިމެނިގެންދާނެ އެވެ. ކުޑަކުދިން ގޮވައިގެން ފެއާއަށް ޒިޔާރަތް ކުރެވޭނެ ކަމަށާއި ކުޑަކުދިންނަށް ހާއްސަކޮށް ކިޑްސް ކޯނައެއްވެސް ހިމެނޭނެ ކަމަށެވެ. އަދި ހާއްސަ އެހީތެރިކަމަށް ބޭނުންވާ ފަރާތްތަކަށް ފަސޭހަވާނެ ވަރަށް ގިނަ ކަންކަމަށް ސަމާލުކަން ދެވޭނެ ކަމަށްވެސް މިނިސްޓްރީން ބުންޏެވެ.
މީގެ އިތުރުން ޖަމްއިއްޔާތަކުގެ ސްޓޯލްތައްވެސް ބެހެއްޓިފައި ހުންނާނެ ކަމަށެވެ. އެ ސްޓޯލްތަކުގައި ޖަމްއިއްޔާތަކުގެ މަސައްކަތްތަކާއި ގުޅޭ ޖަމިއްޔާތަކާއި ގުޅޭ މައުލޫމާތުތައް ފޯރުކޮށްދެވޭނެ ކަމަށްވެސް މިނިސްޓްރީން ބުންޏެވެ.
ސްޓޯލްތައް އާދިއްތަ ދުވަހު ހާއްސަ ކުރެވޭނީ ވިޔަފާރިތަކާއި ކުންފުނިތަކަށާއި ސްޓޭކް ހޯލްޑަރުންނަށް ކަމަށެވެ. އަދި ހޯމަ ދުވަސް ހާއްސަ ކުރެވޭނީ ދަރިވަރުންނަށެވެ. އަދި ހުރިހާ ދުވަހަކުވެސް އާންމުންނަށް ސްޓޯލްތަކަށް ޒިޔާރަތް ކުރެވޭނެ ކަމަށެވެ. އެގޮތުން ސްޓޯލްތައް ހުޅުވިފައި ހުންނާނީ މެންދުުރުފަހު 1:00 އިން އިރުއޮއްސި 6:00 އަށެވެ. އަދި ރޭގަނޑު 8:30 އިން 10:30 އަށް ކަމަށް މިނިސްޓްރީން ބުންޏެވެ.