މިއަހަރު ބޮލީވުޑްގެ މަޝްހޫރު ބައެއް ތަރިންގެ ކައިވެނި ފެނިގެންދާނެ ކަމަށް ބެލެވިފައިވީނަމަވެސް، އެލިސްޓުގައި ޝާހިދު ކަޕޫރުގެ ނަމެއް ނުހިމެނެ އެވެ.
މާޗް މަހުގެ ތެރޭގައި ޝާހިދު ކަޕޫރު ދިއްލީއަށް ނިސްބަތްވާ 21 އަހަރުގެ މީރާ ރާޖްޕޫތް އާއި ކައިވެނިކުރާން އުޅޭކަމުގެ ހަބަރު ފެތުރުމާއިއެކު، ގިނަ ބަޔަކު އައީ މިކައިވެންޏަށް އިންތިޒާރުކުރަމުންނެވެ.
މިކައިވެނީގެ ވާހަކައަކީ ފާއިތުވި ތިން މަސްދުވަހުގެ ތެރޭގައި އެންމެ ގަދަޔަށް ދެކެވުނު ވާހަކަ އެވެ.
ގިނަބަޔަކު އިންތިޒާރުކުރަމުން އައި މިކައިވެނީގެ ރަސްމިއްޔާތު އިއްޔެ ބާއްވާފައިވާއިރު، ކައިވެނީގެ ރަސްމިއްޔާތަށްފަހު ޝާހިދު ވަނީ ކައިވެނީގެ ޕާޓީ ބޭއްވުމަށް ހަމަޖެހިފައި އޮތް އޮބްރޯއީ ހޮޓެލްގެ ބޭރުގައި އަލަތު ދެމަފިރިން ކަމަށްވާ ޝާހިދު އާއި މީރާގެ ކައިވެނީގެ އެންމެފަހުގެ ހަބަރުތައް ގެނެސްދިނުމަށް އެއްވެތިބި މީޑިއާގެ ފަރާތްތަކަށް އޭނާގެ އަލަތު އަނބިމީހާގެ ގޮތުގައި މީރާ ތައާރަފުކޮށްފަ އެވެ.
މީރާ މަޑު ފިޔާތޮށި ކުލައިގެ ލެހެނގާ އެއް ލައިގެން ހުރިއިރު، އޭނާގެ އަތުގައި ހިފައިގެން ކައިރީގައި ހުރި ޝާހިދު ލައިގެން ހުރީ ހުދުކުލައިގެ ބަންދްގަލަ އެކެވެ.
އިއްޔެގެ ހެނދުނުގެ ވަގުތެއްގައި ގުރޮގައުންގައި ހުންނަ ޝާހިދު އާއި މީރާގެ ގާތްއެކުވެރިއެއްގެ ގޭގައި ކައިވެނީގެ ރަސްމިއްޔާތު ބާއްވާފައިވާއިރު، ޕަންޖާބީ ޓްރެޑިޝަން އާއި އެއްގޮތަށް ކުރިއަށް މި ރަސްމިއްޔާތުގައި ބައިވެރިވެފައިވަނީ ދެފަރާތުގެ އާއިލާއާއި ގާތްއެކުވެރިން އެކަންޏެވެ.
މިކައިވެނީގެ ރަސްމިއްޔާތު ނިމުމާއިއެކު ޝާހިދު އާއި މީރާ ކައިވެނީގެ ހެދުމުގައި ނަގާފައިވާ ފޮޓޯތައް ސޯޝަލް މީޑިއާގައި ދައުރުވަމުން އަންނައިރު، ޝާހިދުވެސް ވަނީ އޭނާގެ އިންސްޓަގްރާމްއަށް މީރާ އާއިއެކު ނަގާފައިވާ ފޮޓޯއެއް ލާފަ އެވެ.
ކައިވެންޏަށްފަހު ރޭގައި އޮތް ކައިވެނި ޕާޓީއަށް 500 މެހެމާނުންނަށް ދައިވަތު ދީފައިވާއިރު، ބޮލީވުޑްގައި ތިބި ޝާހިދުގެ ރައްޓެހިންގެ ތެރެއިން ޑިޒައިނާ ކުނާލް ރާވަލް އާއި ކޮރިއޮގްރާފާ ބޮސްކޯ މާޓިސް އާއި ޑިޒައިނާ މަސާބާ ގުޕްތާ އާއި ފިރިމީހާ މަދޫ މަންޓެނާގެ އިތުރުން ޕްރޮޑިއުސަރު މުބީނާ ރޮޓެންސޭ ވަނީ ބައިވެރިވެފަ އެވެ.
ޝާހިދުގެ ކުރީގެ ލޯބިވެރިޔާ ބަތަލާ ކަރީނާ ކަޕޫރާއި މިކައިވެނީގެ ދައުވަތު ލިބިފައިވާކަމުގެ އަޑުތަކެއް އެރި ނަމަވެސް، ކަރީނާ ވަނީ އޭނާއަށް ދައުވަތުު ނުލިބޭކަމަށް ބުނެފަ އެވެ.އަދި އޭނާ އާއި ސައިފް އެދެނީ ޝާހިދު އަށް ކައިވެނީގެ ހުރިހާ އުފަލެއް ލިބުމަށް ކަމަށާއި އޭނާގެ ހެޔޮއެދުންތައް ވަނީ ޝާހިދުއާއި އެކުގައި ކަމަށެވެ.
ކައިވެނީގެ އެންމެ މުހިންމު ދެ ސެރެމަނީ ކަމަށްވާ ސަންގީތު އާއި ހީނާ އެޅުމުގެ ރަސްމިއްޔާތު ހޯމަ ދުވަހުގެ ރޭ ބާއްވާފައިވާއިރު، މިހަފްލާގައި ޝާހިދު އާއި މީރާ އެކުގައި ނަށަނިކޮށް ނަގާފައިވާ ފޮޓޯތަކަކާއި ވީޑިއޯ އެއްވެސް ވަނީ އާންމުވެފަ އެވެ.
ޝާހިދު އާއި މީރާގެ ދެމެދު އުމުރުގެ ގޮތުން 13 އަހަރުގެ ފަރަގެއް ހުންނައިރު، މިދެމީހުން ދިމާވެފައިވަނީ ރާދާ ސޯމޯ ސަތް ސަންގް ނަމަކަށް ކިޔާ ދީނީ އަޅުކަންކުރާ ގްރޫޕަކުންނެވެ.
ހަނީމޫނަށް ދާނެ ވަގުތު ޝާހިދުއަށް ނެތުމުގެ ސަބަބުން ފަސްކޮށްފައިވާއިރު، އަންނަ އާދީއްތަ ދުވަހު ބޮލީވުޑްގައި ތިބި ޝާހިދުގެ އެކުވެރިންނަށް ބާއްވާ ހާއްސަ ޕާޓީއެއް އޮންނާނެ އެވެ.
މީގެކުރިން ޝާހިދު ނޫސްވެރިންނާއި ވާހަކަދައްކަމުން ވަގުތު ޖެހުމުން ކައިވެނީގެ ހުރިހާ ކަމެއް ހިއްސާކުރާނެ ކަމަށް ބުނެފައިވާއިރު، ޝާހިދު ވަނީ ކައިވެނިކޮށް ނިމިގެން އެންމެފުރަތަމަ ވެސް މީޑިއާއަށް މީރާ އޭނާގެ އަންހެނުންގެ ގޮތުގައި ތައާރަފުކޮށްދީ ކުރިން ވީ ވައުދު ފުއްދާފަ އެވެ.