ގެދޮރުވެރިކަމުގެ ޔަގީންކަން އެމްޑީޕީއިން ދެމުން ދަނީ ރައްޔިތުންގެ މަޖިލީހުގެ އިންތިހާބުގެ ވޯޓާ ދިމާކޮށް ކަމަށް ބުނެ އިދިކޮޅު ފަރާތްތަކުން ދައްކާ ވާހަކައަކީ ތެދެއް ކަމަށާއި ރައްޔިތުންނަށް ކޮށް ދޭނެ ކަންކަމުގެ ވާހަކަ ދައްކަވަނީ ވޯޓާ ގުޅިގެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިރޭ ރައީސް ނަޝީދު އިސްވެ ހުންނަވާ ވަނީ އެމަނިކުފާނުގެ ވެރިކަމުގައި ފެށި ވެށިފަހި މާލެ ޕްރޮގްރާމްގައި ބައިވެރިވި މީހުންނާ ބައްދަލު ކުރައްވަން ފޯރަމެއް ބާއްވާފަ އެވެ. އެ ފޯރަމް ބާއްވަން އެމްޑީޕީއިން މީހުންނަށް ދައުވަތު ދިނުމަކީ އެއީ ކޮރަޕްޝަންގެ އަމަލެއް ކަމަށް ބުނެ ފާޑުކިޔާފަ އެވެ.
އެ ފޯރަމްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ޑިމޮކްރަޓިކް އުސޫލުން ހިންގާ ގައުމެއްގައި ކަންކަން ހައްލު ކުރާނީ ވޯޓާ ދިމާކޮށް ކަމަށެވެ. އެމްޑީޕީއިން ކޮށް ދޭނެ ކަންކަން ވޯޓާ ދިމާކޮށް އަބަދުވެސް އިއުލާން ކުރާނެ ކަމަށެވެ. އެއީ ރައްޔިތުން އެމްޑީޕީއަށް ވޯޓު ދޭންވީ ސަބަބު ދެއްކުމުގެ ގޮތުން ކަމަށެވެ.
"އެއީ ވަރަށް ބޮޑު ތެދުފުޅެއް، މި ވާހަކައަކީ ވޯޓާ ދިމާކޮށް އަޅުގަނޑުމެން ދައްކާ ވާހަކައެއް، އަޅުގަނޑުމެން ދެކޭ ގޮތުގައި މި ގައުމުގައި، ޑިމޮކްރަޓިކް އުސޫލުން ހިނގާ ގައުމެއްގައި ކަންކަން ހައްލު ކުރާނީ ވޯޓާ ގުޅިގެން، އަޅުގަނޑުމެން މި ހުށަހަޅަނީ އަޅުގަނޑުމެން ދެކޭ ގޮތުގައި ތިޔަ ބޭފުޅުން އަޅުގަނޑުމެންނަށް ވޯޓު ދޭންވީ ސަބަބެއް،" ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ކޮންމެ ވޯޓާ ދިމާކޮށް ވެސް ރައްޔިތުންނަށް ފައިދާވާނެ މަޝްރޫއުތަކާއި ހަމަތަކާއި އުސޫލުތައް އެމްޑީޕީއިން އަބަދުވެސް އިއުލާން ކުރާނެ ކަމަށެވެ. އެގޮތުން ރައްޔިތުންގެ މަޖިލީހުގެ އިންތިހާބާ ދިމާކޮށް އެމްޑީޕީއިން އެކުލަވާލާފައިވަނީ އެޖެންޑާ19ގެ މެނިފެސްޓޯ އެވެ.
އެޖެންޑާ19 އިން ހާސިލްކުރަން ބޭނުންވާ އަމާޒަކީ ވެށިމާލެ ޕްރޮގްރާމް އަލުން ފެށުން ކަމަށެވެ. ރައީސް ނަޝީދު ފެއްޓެވި މަޝްރޫއުއަކީ މާލޭގެ ކުދި ބިންތައް ހުރި މީހުން، ބޭނުންނަމަ އެ ބިން ދޫކޮށްލުމުން ބަދަލުގައި ހުޅުމާލެއިން ބިން ދިން މަޝްރޫއުއެކެވެ. މަޝްރޫއުގެ ދަށުން 200 އެއްހާ ގޯތި ހުޅުމާލެއިން އޭރު ދިނެވެ.
ރައީސް އަބްދުﷲ ޔާމީން ވެސް ވަނީ ހަމަ އެ މަޝްރޫއު އެހެން ނަމެއްގައި ކުރިއަށް ގެންގޮސްފަ އެވެ. އެއީ ގެދޮރުވެރިކަމުގެ މަޝްރޫއުގެ ނަމުގަ އެވެ.
ފޯރަމްގައި ރައީސް ނަޝީދު ވިދާޅުވީ އެމަނިކުފާނު ވެށިފަހި މަޝްރޫއު ފެއްޓެވިއިރު ވެެސް އެންމެ ބޮޑު ދަތިކަމާ ކުރިމަތިވީ އެކަމުގައި މަޖިލީހުގެ ތެރެއިންނެވެ. މަޖިލީހުން އެކަމަށް އެއްބާރުލުން އޭރު ނުލިބުނު ކަމަށެވެ. އަންނަ ރައްތިތުންގެ މަޖިލީހަކީ އެމްޑީޕީގެ މެޖޯރިޓީ އޮންނަ މަޖިލީހަކަށް ވާން ޖެހެނީ އެހެންވެ ކަމަށެވެ. ވެށިފަހި މާލެ މަޝްރޫއުގެ ދަށުން ތިލަފުއްޓާއި ގުޅީފަޅުން ފެށިގެން ހުޅުމާލެއާ ހަމައަށް މަގަކުން ގުޅާލަން ނިންމާފައިވާ ކަމަށް ވެސް އެމަނިކުފާނު ވިދާޅުވި އެވެ. އޭރަށް މާލޭ ސަރަހައްދަށް ގެދޮރުވެރިކަމުގެ މައްސަލަ އެއްކޮށް ހައްލުވެގެން ދާނެ ކަމަށެވެ.
ރައްޔިތުންނަށް ދިމާވެފައިވާ ގެދޮރުވެރިކަމުގެ މައްސަލައަށް އޮތް ހައްލަކީ އެޖެންޑާ19 ގައި ކަމަށް ރައީސް ނަޝީދު ވިދާޅުވި އެވެ. ބޯހިޔާވަހިކަމަށް ހާއްސަ ގާނޫނެއް އެކުލަވާލުމަށް އެޖެންޑާ19ގައި ވަނީ ހިމަނާފަ އެވެ. އޭގައި ގެދޮރު ލިބޭނެ ޝަރުތުތަކާއި އުސޫލުތައް އެކުލަވާލާނެ އެވެ.
ރައީސް ނަޝީދު ވިދާޅުވީ ރައްޔިތުންނަށް ގެދޮރު ފޯރުކޮށްދިނުމަކީ ދައުލަތުގެ ވާޖިބެއް ކަމަށެވެ. އެކަމަށް އިސްކަން ދޭނެ އެހެން ކަމެއް އެމްޑީޕީއަށް ނޯންނާނެ ކަމަށް ވެސް އެމަނިކުފާނު ވިދާޅުވި އެވެ.
ރާއްޖެއަކީ އުފެއްދުންތެރިކަމާއި ލިބޭ އާމްދަނީއަށް ބަލާއިރު ރައްޔިތުން އެންމެ ހާލުގައި އުޅޭ ގައުމު ކަމަށާއި އެކަން ބަދަލު ކުރައްވާނެ ކަމަށް ރައީސް ނަޝީދު ވިދާޅުވި އެވެ. ރައީސް ނަޝީދު ވިދާޅުވީ އެމްޑީޕީގެ ފުރަތަމަ ސަރުކާރުން ވެސް ރައްޔިތުންނަށް ކަންތައްތަކެއް ކޮށް ދޭނެ ކަމުގެ ވައުދުވި ކަމަށެވެ. އެކަންކަން ލިބުނު ކުޑަ ދުވަސްކޮޅުގެ ތެރޭގައި ވެސް ހާސިލްކުރި ކަމަށެވެ.
އުމުރުން ދުވަސްވީ މީހުންގެ އެލަވެންސް އާއި ނުކުޅުދޭ މީހުންގެ އެލަވެންސް އާއި އެކަނިވެރި މައިންގެ އެލަވެންސް އަދި ހިލޭ ފޮތް ލިސްޓާއި އާސަންދައިގެ ހިދުމަތް ރައީސް ނަޝީދު ފާހަގަކުރެއްވި އެވެ. އަދި މިހާތަނަށް ދީފައިވާ ހުރިހާ ފްލެޓަކީ ވެސް އެމްޑީޕީއިން ބިންގާ އެޅި ފްލެޓްތައްކަން އެމަނިކުފާނު ފާހަގަކުރެއްވި އެވެ. އެހެންކަމުން ކުރިއަށް އޮތް ތަނުގައި ވެސް ކަންކަން ހާސިލް ކުރެވެނީ އެ ޕާޓީއަށް ކަމަށް ވިދާޅުވި އެވެ.
ރައްޔިތުން އެމްޑީޕީގެ ސަރުކާރު ގެނެސްފައިވާއިރު މާލެ ސިޓީ ކައުންސިލަކީ ވެސް އެމްޑީޕީގެ ކައުންސިލެއްކަން ފާހަގަ ކުރައްވާ ރައީސް ނަޝީދު ވިދާޅުވީ މިހާރު ބޭނުން ވަނީ އެމްޑީޕީގެ މަޖިލީހެއް ކަމަށެވެ. މާލެ ރައްޔިތުންނަށް ދިމާވެފައިވާ ގެދޮރުވެރިކަން ހައްލު ކުރުމަށް އެމްޑީޕީއާ ހަވާލުކުރުން ކަމަށް ވާނީ އޭރަށް ކަމަށެވެ.