މިދިޔަ ބުރާސްފަތި ދުވަހުގެ ރޭ ކުރީގެ މަޝްހޫރު ބަތަލާ އަދި މިހާރު ވެރިކަން ކުރާ ބީޖޭޕީ ތަމްސީލުކުރައްވަމުން ގެންދަވާ ޕާލިމެންޓް މެމްބަރު ހެމާ މާލިނީ އިން ކާރުން އެހެން ކާރެއްގައި ޖެހި ނުރައްކާތެރި އެކްސިޑެންޓުގައި އަނެއް ކާރުގައި އިން ދެއަހަރުގެ ކުޑަ އަންހެން ކުއްޖާ މަރުވީ އެކުއްޖާގެ ބައްޕަގެ ސަބަބުން ކަމަށް ހެމާ ބުނެފި އެވެ.
މިއެކްސިޑެންޓްގައި ހެމާއަށް ލިބުނު އަނިޔާތަކަށް ފަރުވާދިނުމަށްފަހު، ހޮސްޕިޓަލުން ދޫކޮށްލާފައިވާއިރު އިއްޔެ ހެމާ ކުރި ޓްވީޓެއްގައި ވަނީ މިއެކްސިޑެންޓްގައި ކުޑަކުއްޖަކު މަރުވެ ހަތަރު މީހަކަށް އަނިޔާވީތީ އެކަމާއި ހިތާމަކުރާކަމަށެވެ. އަދި މަރުވި ސޯނަމް ނަމަކަށް ކިޔާ ކުޑަ އަންހެން ކުއްޖާ އިން ކާރު ދުއްވަން އިން އޭނާގެ ބައްޕަ ޓްރެފިކް ގަވާއިދުތަކަށް ހުރުމަތްކޮށް އެގޮތަށް ކާރު ދުއްވިނަމަ މިފަދަ ބަދު ނަސީބު ހާދިސާއެއް ނުހިނގައި، އެކުއްޖާ ދިރިހުރީސް ކަމަށެވެ.
މިމަހުގެ 2ވަނަ ދުވަހުގެ ރޭ 9:00 ޖެހި އެހާކަންހާއިރު، ރާޖަސްތާނުގެ ދައުސާ ހައިވޭގައި މިއެކްސިޑެންޓް ހިނގީ ހެމާާ އިން މާސިޑީޒް ކާރު މާރުތޯ އަލްޓޯ ކާރެއްގައި ޖެހިގެންނެވެ.
ހެމާ އަށް ލިބުނު އަނިޔާތަކަށް ފޯޓިސް ހޮސްޕިޓަލުގައި ފަރުވާ ދިނުމަށްފަހު އަނެއް ދުވަހު ދޫކޮށްލާފައިވާއިރު، އެކްސިޑެންޓަށްފަހު ހެމާ ކުރި ޓްވީޓް އާ ގުޅިގެން މަރުވި ސޯނަމްގެ ބައްޕަ، ހަނޫމާން ކަންޑޭވާލް ވަނީ މިއެކްސިޑެންޓް ހިނގަން މެދުވެރިވީ އޭނާ ޓްރެފިކްގެ ގަވާއިދަށް ހުރުމަށްތެރިކޮށް ނުހިތުމުން ނޫންކަމަށެވެ. އެކްސިޑެންޓް ހިނގި ވަގުތު 100 ކިލޯ މީޓަރު ބާރު މިނުގައި ދުއްވަމުން އައި ހެމާ އިން ކާރުން ޖެހުނީ އެމީހުންގެ ކާރުގައި ކަމަށް ކަންޑޭވާލް ވަނީ ބުނެފަ އެވެ.
"ވަރަށް ދެރަވެއްޖެ ހެމާ ޕާލިމަންޓް މެމްބަރަކަށްވެ އެފަދަ ގޮތަކަށް ވިސްނުން ހުރީތީ. ހެމާގެ ޓްވީޓްގައި އެކްސިޑެންޓް ހިނގީ އަހަރެން ޓްރެފިކް ގަވާއިދުތަކަށް ނުބެލުމުން ކަމަށް ބުނެފައިވާތީ" އެކްސިޑެންޓްގައި ލިބުނު އަނިޔާތަކަށް ހޮސްޕިޓަލުގައި ފަރުވާ ހޯދަމުން އަންނަ ކަންޑޭވާލް ބުނެފައިވެ އެވެ.
މީގެއިތުރުން ހެމާކުރި ޓްވީޓްގެ ސަބަބުން ހިތްހަމަނުޖެހިފައިހުރި ކަންޑޭވާލް ވަނީ ހިމާގެ ހިތްވަރެއް ހުރިނަމަ ޓްވީޓް ނުކޮށް އެފަދަ ވާހަކަތައް އޭނާ ކައިރީގައި ދައްކާނެކަމަށެވެ. އަދި ހެމާކުރެން އޭނާ ކަމޭނުހިތީ ޓްރެފިކްގެ ކޮން ގަވާއިދަކަށް ތޯ ބުނަމުން ވަނީ އޭނާ ދުއްވަމުން އައީ ބާރު ސްޕީޑްގައިތޯ، ނުވަތަ ދުއްވަމުން ނުބައި ފަޅިންތޯ ނުވަތަ ސިންގަލް ނުދޭތޯ ނޫނީ އޭނާ ހުރީ ސީޓް ބެލްޓް ނާޅާތޯޯ ބުނުމަށް އެދިފަ އެވެ.
"އަހަރެންގެ ކުށަކީ އަހަރެން އައީ ކާރު ވަރަށް މަޑުން ދުއްވަމުން، އަދި ހެމާ އިން ކާރު ބާރު ސްޕީޑްގައި ދުއްވާފައި އައުން" ހެމާމެން ފަދަ ބޮޑެތި މީހުންނަށް ކޮންމެ އެއްޗެކޭވެސް ބުނެވިދާނެ ކަމަށް ބުނަމުން ކަންޑޭވާލް ބުންޏެވެ.
ކަންޑޭވާލްގެ އަންހެނުންވެސް ވަނީ އޭނާގެ ފިރިމީހާ އަކީ ވަރަށް މަޑުން ކާރު ދުއްވާ މީހެއްކަަމަށް ބުނެފަ އެވެ.
އެކްސިޑެންޓަށްފަހު ހޮސްޕިޓަލުގައި އޮވެ ހެމާ ނެރުނު ބަޔާނެއްގައި މިހާދިސާގައި ދެއަހަރުގެ ކުޑަ ކުއްޖަކު މަރުވެ، ހަތަރު މީހަކަށް އަނިޔާވުމުން އެކަމާ ހިތާމަކުރާކަމަށް ނެރުނު ބަޔާނެއްގައި ބުނެފައިވާއިރު، ހެމާ ހޮސްޕިޓަލުން ދޫކޮށްލުމުން މުމްބައިގައި ހުންނަ ހެމާގެ ގޭގެ ބޭރުގައި ނޫސްވެރިންނާ ވާހަކަދައްކަމުން ހެމާގެ ދޮށީ އަންހެން ދަރިފުޅު އީޝާ ޑިއޯލް ވަނީ އެކްސިޑެންޓްގައި އަނިޔާ ލިބުނު އެންމެނަށް ފައިސާގެ އެހީ ދޭނެ ކަމަށް ބުނެފަ އެވެ.
މިއެކްސިޑެންޓް ހިނގިއިރު ހެމާގެ ކާރު ދުއްވަން އިން ޑްރައިވަރު ހައްޔަރުކޮށް ފަހުން ކަފާލާތުގެ ދަށުން ދޫކޮށްލާފައިވާއިރު، މަރުވި ސޯނަމްގެ އާއިލާއިން ވަނީ ދައުސާގެ ކޮޓްވާލީ ޕޮލިސް ސްޓޭޝަންގައި މިއެކްސިޑެންޓްގެ މައްސަލަ ފައިލްކޮށްފަ އެވެ.
މީގެކުރިން މިއާއިލާއިން ވަނީ އެކްސިޑެންޓަށްފަހު ހެމާ ޖައިޕޫރް ހޮސްޕިޓަލަށް ގެންގޮސް އެމީހުން މާދުރުގައި ހުރި ޑިސްޓްރިކް ހޮސްޕިޓަލަށް ނުގެންގޮސް ހެމާ އާއިއެކު އެމީހުން ކުޑަ އަންހެން ދަރިފުޅު ގެންދިޔަ ނަމަ ފަހަރުގައި އެކުއްޖާގެ ފުރާނަ ސަލާމަތްކުރެވުނީސް ކަމަށެވެ.
އެކްސިޑެންޓަށްފަހު ހެމާ ހޮސްޕިޓަލަށް ގެންގޮސްފައިވަނީ އެވަގުތު އެހެން ދިޔަ ކާރެއްގައި އިން ޑޮކްޓަރެކެވެ.
ކަންޑޭވާލްގެ އިތުރުން މިއެކްސިޑެންޓްގައި އޭނާގެ އަންހެނުންނާއި، ހަތަރު އަހަރުގެ ފިރިހެން ދަރިފުޅާއި ދައްތަ ވެސް ވަނީ ބޮޑެތި އަނިޔާތަށް ލިބިފަ އެވެ.