ސަލްމާން ޚާން ޕްރޮޑިއުސްކޮށް ލީޑްރޯލުން ފެނިގެންދާ ފިލްމު "ބަޖްރަންގީ ބައިޖާން" ރިލީޒްކުރާ ދުވަސް ކުޑަ ތަންވަމުން އަންނައިރު، ފިލްމުގެ ޓީމުން މިފިލްމުގެ ޕްރޮމޯޝަންގެ ގިނަ ހަރަކާތްތަކެއް އަންނަނީ ކުރަމުންނެވެ.
ނަމަވެސް ސަލްމާންގެ ނަމުގައި މިފިލްމާއި ބެހޭގޮތުން ސޯޝަލް މީޑިއާތަކުގަ އާއި ވަޓްސް އަޕް ގްރޫޕްތަކުގައި ފޭކް މެސެޖްތަކެއް ފޮނުވަމުން އަންނަކަމަށް ބުނެ ސަލްމާން މުމްބައި ފުލުހުންނަށް މައްސަލަ ހުށަހަޅައިފި އެވެ.
އެކި ސޯޝަލް މީޑިއާތަކުގައި ފަތުރަމުން އަންނަ މި މެސެޖްތައް ފޮނުވަމުން އަންނަ ފަރާތެއް ހޯދުމަށް ސަލްމާން ވަނީ މުމްބައި ފުލުހުންގެ ސައިބާ ސެލް ޑިޕާޓްމެންޓަށް މައްސަލަ ހުށަހަޅާފައިކަމަށް މުމްބައި ފުލުހުންގެ ސްޕޯކްސްޕާސަން ޑެޕިއުޓީ ކޮމިޝަނާ ދަނަންޖޭ ކުލްރާނީ ވަނީ ބުނެފަ އެވެ.
"މިމައްސަލަ މިހާރު އަންނަނީ ބަލަމުން" ޑެޕިއުޓީ ކޮމިޝަނާ ކުލްރާނީ ބުނެފައިވެ އެވެ.
ސަލްމާންގެ ހަދާފައިވާ ފޮޓޯއަކާއި އެކު ދައުރުވަމުން އަންނަ މި މެސެޖްތަކުގައި ވަނީ "ބަޖްރަންގީ ބައިޖާން" ސަލްމާންގެ މުސްލިމް ފޭނުން ބަލަން ސިނަމާތަކަށް ނުވަން ކަމުގައި ވިޔަސް ހިޓަކަށް ވާނެ ކަމަށެވެ.
ސަލްމާންގެ ފަރާތުން ވާހަކަދެއްކި ފަރާތުން ވަނީ މިމެސްޖްތަކަކީ ސަލްމާން އާއި ގުޅުން ހުރި އެއްޗެއް ނޫންކަމަށާއި މިހާރު އެމައްސަލަ ފުލުހުންނަށް ހުށަހަޅާފައިވާނެ ކަމަށެވެ.
މީގެކުރިންވެސް ސަލްމާންގެ ފޮޓޯތަކަކާއިއެކު މިފަދަ މެސެޖްތަކެއް ސޯޝަލް މީޑިއާތައް މެދުވެރިކޮށް ވަނީ އާންމުކޮށްފަ އެވެ.
މިމަހުގެ 17ވަނަ ދުވަހުގައި ރިލީޒްކުރުމަށް ހަމަޖެހިފައިވާ މިފިލްމުގެ ނަމުން ހިންދީ ދީނަށް ފުރައްސާރަވާ ކަމަށް ބުނެ، ބައެއް ހިންދީ ދީނީ ޖަމާއަށްތަކުން ވަނީ މިފިލްމާއި ދެކޮޅަށް މުޒާހަރާވެސް ކޮށްފަ އެވެ.
އިންޑިއާގެ ބޯޑަރުތެރެއަށް ގެއްލޭ ޕާކިސްތާން ކުޑަ އަންހެން ކުއްޖެއް އަނބުރާ ގައުމަށް ގެންގޮސްދިނުމަށް ސަލްމާން ބުރަ މަސައްކަތްކުރާތަން ފެނިގެންދާ މިފިލްމުގައި ސަލްމާންގެ އިތުރުން ކަރީނާ ކަޕޫރު އާއި ނަވާޒުއްދީން ސިއްދީގީ މުހިންމު ރޯލުތަކުން ފެނިގެންދާނެ އެވެ.