ރައީސް އިބްރާހިމް މުހައްމަދު ސޯލިހް ވަނީ ގއ. ވިލިނގިއްޔާއި އެއަތޮޅު ކޫއްޑޫ ގުޅުވާލަދިނުމަށް ވައުދުވެފައި ކަމަށާއި ކޫއްޑޫ އާއި މާމެންދޫވެސް ގުޅުވާލުމަކީ މެނިފެސްޓޯގެ ވައުދެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ގއ. ދާންދޫ ދާއިރާގެ ކެނޑިޑޭޓް ޔައުގޫބް އަބުދުﷲގެ ކެމްޕެއިނަށް އެއަތޮޅު މާމެންދޫގައި އަށް ވަޑައިގެން ނަޝީދު ވިދާޅުވީ، ދަތުރުފަތުރުގެ ނިޒާމުން ރާއްޖޭގެ ރަށްތައް ގުޅާލުމަކީ މިފަހަރުގެވެސް ވަރަށް މުހިންމު ވައުދެއް ކަމަށާއި އެކަމަކީ ހުވަދު އަތޮޅަށް ވަރަށް މުހިންމު ކަމެއް ކަމަށެވެ.
"މުދަލާ ހިދުމަތް އެއްރަށުން އަނެއް ރަށަށް ބަދަލުވާން ފެށީމާ މި ހުވަދޫގެ ރަށްތައް މިހާރު މިހުރީ އެކަށީގެންވާ އާބާދީއެއްގައި، މިއަތޮޅުގެ ގިނަ ރަށްތައް މިހުރީ ކޮލަމާފުށި ފިޔަވާ ދެއްވަދޫ ފިޔަވާ، ވަރަށް ގިނައިން އަތޮޅު ދުނީގައި، އަދި އެހާމެ ގިނައިން އެއް ފަޅެއްގައި، އެއްފަޅެއްގައި ނެތަސް މި އޮންނަނީ ވަރަށް ކުދި ކުދި ކަނޑުއޮޅި ތެރޭގައި ރަށްތައް އެތުރިފައި،" ނަޝީދު ވިދާޅުވި އެވެ.
ވިލިނގިއްޔާއި ކޫއްޑޫ ގުޅުވާލުމަކީ ރައީސް އިބްރާހިމް މުހައްމަދު ސޯލިހުގެ ވައުދެއް ކަމަށާއި ކޫއްޑޫ އާއި މާމެންދޫވެސް ގުޅުވާލުމަކީ މެނިފެސްޓޯގެ ވައުދެއް ކަމަށް ނަޝީދު ވިދާޅުވި އެވެ.
"ރައީސް ސޯލިހް ވައުދުވެވަޑައިގެން ވިލިނގިއްޔާއި ކޫއްޑޫއާ ގުޅުވުމަށް، އަޅުގަނޑުމެންނަށް ޔަގީން އަޅުގަނޑުމެން މި ދައްކާ ވާހަކަ އަކީ ބޮޑު މަގެއްގެ ވާހަކަ، އަޅުގަނޑުމެންނަށް އެމަގު ގެނެވޭނެ މާމެންދޫއަށް، އަޅުގަނޑުމެންގެ މެނިފެސްޓޯ ވައުދެއް އެއީ އިރާދަ ކުރެއްވިއްޔާ ކޫއްޑޫ އާއި މާމެންދޫވެސް ގުޅުވާލުން،" ނަޝީދު ވިދާޅުވި އެވެ.
ނަޝީދު ވިދާޅުވީ، މަސްވެރިކަމަކީ ހުވަދު އަތޮޅުގެ އެންމެ ބޮޑު މަސައްކަތް ކަމަށާއި ހުވަދޫ އަތޮޅުގެ މަސްވެރިކަމުގެ އުފެއްދުންތަކުން ރާއްޖޭގެ އިގްތިސޯދު މީގެ ކުރިންވެސް އިތުރުވެފައިވާ ކަމަށެވެ. ކުރިއަށް އޮތް ތަނުގައިވެސް އިތުރު ކުރުމަށް މަސް ޕްލާންޓްތައް ގާއިމް ކުރަންޖެހޭ ކަމަށެވެ. އެޖެންޑާ 19 އިން ކަށަވަރު ކޮށްދެނީ އެކަންކަން ކަމަށްވެސް ނަޝީދު ވިދާޅުވި އެވެ.
ނަޝީދު އިތުރަށް ވިދާޅުވީ، ރަށްރަށުގައި ގާއިމް ކުރާ މަސް ޕްލާންޓްތަކަކީ ކައުންސިލްތަކުން އުފައްދާ ކުންފުނިތައް ހިއްސާވާ ތަންތަނަށް ހަދާނެ ކަމަށާއި އެތަންތަނަކީ ސަރުކާރު ހިއްސާވާ ކުންފުނިން ހިންގާނެ ތަންތަނެއް ނޫން ކަަމަށެވެ. ލާމަރުކަޒީ ނިޒާމުން ކައުންސިލްތަކަށް ރައްޔިތުންނަށް ފައިދާވާ ކުންފުނިތައް އުފެއްދުމުގެ ބާރު ލިބިގެންދާނެ ކަމަށްވެސް ނަޝީދު ވިދާޅުވި އެވެ.
