ނިއު ދިއްލީ (އޭޕްރީލް 1) - އިންޑިއާގައި އަންނަ މަހު ބޭއްވުމަށް ހަމަޖެހިފައިވާ އާންމު އިންތިހާބުގައި މައި އިދިކޮޅު ކޮންގްރެސް ޕާޓީގެ ލީޑަރު ރާހުލް ގާންދީ ވާދަކުރައްވާނީ ދެ ގޮނޑިއަށް ކަމަށް އެ ޕާޓީން އިއުލާނުކޮށްފި އެވެ.
ގާންދީ އާއިލާގެ ތާއީދު ބޮޑު، އުތުރު ސްޓޭޓެއް ކަމުގައިވާ އުއްތަރު ޕްރަދޭޝްގެ އަމެތީގެ އިތުރުން، ދެކުނުގެ ކެރެލާ ސްޓޭޓްގެ ގޮނޑިއަށްވެސް ރާހުލް ގާންދީ ކުރިމަތިލައްވަން ނިންމަވާފައިވާކަން އެ ޕާޓީން ވަނީ ބުނެފަ އެވެ. އިންޑިއާގެ އިންތިހާބުތަކާއި ގާނޫނު ބުނާ ގޮތުން، ކޮންމެ ކެންޑިޑޭޓަކަށް ވެސް ގިނަވަގެން ދެ ދާއިރާއަށް ކުރިމަތިލެވޭނެ އެވެ. ނަމަވެސް، އިންތިހާބުގައި ދެ ގޮނޑި ވެސް ކާމިޔާބުވެއްޖެނަމަ، ހަ މަސް ދުވަހުގެ ތެރޭގައި ކޮންމެ ވެސް އެއް ދާއިރާއެއް ހިޔާރުކުރަންޖެހޭނެ އެވެ. ގޮންޑި ދޫކޮށްލާ ދާއިރާގައި އަލުން ބައި އިލެކްޝަނެއް ބާއްވަންޖެހޭނެކަމަށް ވެސް ގާނޫނުގައި ބުނެ އެވެ.
ރާހުލް ގާންދީގެ އެ ނިންމެވުމަކީ، ދެކުނުގެ ސްޓޭޓުތަކަށް އިދިކޮޅުން ދޭ އަހަންމިއްޔަތުކަން ދައްކުވައިދޭކަމެއްކަމަށް ކޮންގްރެސް ޕާޓީން ވަނީ ބުނެފަ އެވެ.
ނަމަވެސް، ވެރިކަން ކުރާ ބީޖޭޕީއަށް ތާއީދުކުރާ ފަރާތްތަކުން ބުނަނީ، ދެ ގޮނޑިއަށް ރާހުލް ގާންދީ ކުރިމަތިލައްވަނީ، އުއްތަރު ޕްރަދޭޝްގެ ގޮނޑި ކާމިޔާބުކުރެއްވޭނެ ކަމުގެ ޔަގީންކަން ނެތުމުން ކަމަށެވެ.
ރާހުލް ގާންދީގެ އިތުރުން، މިހާރުގެ ބޮޑު ވަޒީރު ނަރެންދުރަ މޯދީވެސް ދެ ދާއިރާއަށް ކުރިމަތިލައްވާނެ ކަމުގެ އިޝާރާތެއް ވަނީ ދެއްވައިފަ އެވެ.
އިންޑިއާގެ ޕާލިމަންޓުގެ ތިރިގެ "ލޯކް ސަބާ"އަށް މެމްބަރުން އިންތިހާބު ކުރާނީ އަންނަ އޭޕްރީލް މަހުގެ 19 އިން މެއި މަހުގެ 19 ވަނަ ދުވަހާއި ހަމައަށް ދިގުދެމިގެންދާ އިންތިހާބުގަ އެވެ. ވޯޓު ގުނުން އޮންނާނީ މެއި 23 ވަނަ ދުވަހެވެ.
އިންޑިއާގެ 900 މިލިއަނަށް ވުރެ ގިނަ މީހުން ވޯޓުލުމަށް ގާތްގަނޑަކަށް އެއް މިލިއަން ވޯޓު ފޮށި އިންޑިއާގެ އެކި ސަރަހައްދުގައި ބެހެއްޓުމަށް ވަނީ ހަމަޖެހިފައި އެވެ. މިއީ މުޅި ދުނިޔޭގައި މިހާތަނަށް ބޭއްވޭ އެންމެ ބޮޑު އިންތިހާބެވެ.