އާއިލާއަށް ފިލައިގެން އުޅުނު ކުޑަ ދެ ކުއްޖަކު ފޮރުވައިގެން ގެންގުޅުނު މީހަކު ފުލުހުން ހައްޔަރުކޮށްފި އެވެ.
ފުލުހުން ބުނީ، އެ އިދާރާގެ ފެމެލީ އެންޑް ޗައިލްޑް ޕްރޮޓެކްޝަން ޑިޕާޓްމެންޓަށް ހުށަހަޅާފައިވާ މައްސަލައަކާ ގުޅިގެން ބެލި އިރު އާއިލާއަށް ފިލައިގެން ރާއްޖޭގެ ރަށެއްގައި ކުޑަދެކުދިން ފޮރުވައިގެން ގެންގުޅެމުންދާ ކަމަށް ފުލުހަށް މައުލޫމާތު ލިބުނު ކަމަށެވެ. އަދި ކޯޓް އަމުރެއްގެ ރޭ ދަންވަރު އެ ކުދިންތިބި ގެ އަށްވަދެ އެ ދެކުދިން ހޯދާފައިވާ ކަމަށެވެ. އަދި އެ ދެ ކުދިން ފޮރުވައިގެން ގެންގުޅުނު 29 އަހަރުގެ ފިރިހެނަކު ހައްޔަރުކޮށްފައިވާ ކަމަށް ވެސް ބުންޏެވެ.
ނަމަވެސް އެކުދިން ފޮރުވައިގެން އުޅުނީ ކޮން ރަށެއްގައި ކަމެއް ފުލުހުން އަދި ހާމަކޮށްފައެއް ނުވެ އެވެ. އަދި ފޮރުވައިގެން އުޅުނު މީހާއާ މި ދެ ކުދިންނާ އޮތީ ކޮން ގުޅުމެއް ކަމެއް ވެސް ސާފެއް ނުވެ އެވެ.
ފުލުހުން ބުނީ، އެ މައްސަލާގައި ހައްޔަރު ކުރި މީހާ އުޅުނު ގެ ބަލައި ފާސްކުރިއިރު މަަސްތުވާތަކެތި ބަންދު ކުރަން ގެންގުޅޭ ކަމަށް ބެލެވޭ ސާމާނާއި މަސްތުވާތަކެތި ހުރިކަމަށް ބެލެވޭ ކަރުދާހާއި މަސްތުވާތަކެތި ހުރިކަމަށް ބެލެވޭ ޕެކެޓެއް ފެނިފައިވާ ކަމަށެވެ.
އެމައްސަލާގައި ހިމެނޭ ކުޑަ ދެކުދިން މިހާރު ފެމެލީ އެންޑް ޗައިލްޑް ޕްރޮޓެކްޝަނާ ހަވާލުކޮށްފަ އެވެ. އާއިލާއިން އެ ކުދިންނާއި ހަވާލު ވަންދެން ތިބޭނީ އެ ޑިޕާޓްމަންޓްގެ ބެލުމުގެ ދަށުގަ އެވެ. އަދި ހައްޔަރު ކުރި މީހާގެ ބަންދަށް ކޯޓުން ވަނީ 10 ދުވަސް ދީފަ އެވެ.