ޕެންޝަން ފަންޑުން ހައްޖަށް ދެވޭނީ ރިޓަޔާމެންޓް ސޭވިން އަކައުންޓުގެ ބެލެންސްގައި 336،000 ގިނަ ރުފިޔާ ޖަމާވެފައި ހުންނަ ފަރާތްތަކަށް ކަމަށް ފެންޝަން އޮފީހުން ބުނެފި އެވެ.
ޕެންޝަން ފަންޑުން ފައިސާ ދޫކުރުމާބެހޭ ގަވާއިދު މިއަދު ގެޒެޓް ކުރިއިރު، އެ ގަވާއިދުގައިވާ ގޮތުން ޕެންޝަން ފަންޑުގެ ފައިސާއިން ހައްޖަށް ދެވޭނީ މީގެ ކުރިން ހައްޖުގެ އަޅުކަން އަދާކޮށްފައި ނުވާ ފަރާތްތަކަށެވެ. އަދި ޕެންޝަން ފަންޑުން ދޫކުރާނީ އެ އަހަރަކު ހައްޖަށް ދިއުމުގެ އަގު ކަމުގައި ސަރުކާރުން ކަނޑައަޅާ އަގުގެ 50 ޕަސަންޓެވެ.
ހައްޖަށް ގެންދާ ޖަމާއަތް ނުވަތަ ކުންފުނިން ޕެންޝަން އޮފީހަށް ފޯމް ހުށަހެޅުމުން، ހައްޖަށް ދިއުމުގެ ޝަރުތު ހަމަވޭތޯ ބެލުމަށްފަހު، ޝަރުތު ހަމަވާނަމަ، ސަރުކާރުން ހައްޖަށް ގެންދަން ކަނޑައަޅައިފައިވާ އަގުގެ 50 ޕަސަންޓު ހައްޖަށް ގެންދާ ކުންފުންޏަށް ނުވަތަ ޖަމާއަތަށް ދޫކުރާނެ އެވެ.
ޖަމާއަތެއް ނުވަތަ ކުންފުންޏެއް މެދުވެރިކޮށް ހައްޖުގެ އަޅުކަން އަދާކުރަން ދާނަމަ އެތަނަކުން، ޕެންޝަން އޮފީހާއެކު ހައްޖަށް ގެންދިއުމާއި ގުޅޭ ގޮތުން އެއްބަސްވުމެއް ހަދަން ޖެހެ އެވެ. އަދި ހައްޖަށްދާ ފަރާތަކީ ހައްޖަށް ދިއުމަށް ކޯޓާ ހަމަޖެހިފައިވާ މީހަކަށް ވާން ވެސް ޖެހެ އެވެ. މީގެ އިތުރުން އެއްވެސް ސަބަބަކާ ލައިގެން ޕެންޝަން ފައިސާ ހިފެހެއްޓި ފައިވާ ފަރާތަކަށް ވެގެން ނުވާނެ ކަމަށްވެސް ގަވާއިދުގައި ވެ އެވެ.
ޕެންޝަން ސްކީމުގެ މެމްބަރުންނަށް ޕެންޝަން ފައިސާ ބޭނުން ކުރެވެން ހުރި އަދަދާއި، ރިޓާޔާމެންޓް ސޭވިން އެކައުންޓް ސްޓޭޓްމެންޓް ޕެންޝަން އޮފީހުގެ މޯބައިލް އެޕްލިކޭޝަނުން ބަލައިލެވެން ހުންނާނެ އެވެ. ޕެންޝަން ފަންޑުގެ އެހީގައި ހައްޖަށް ދާ ފަރާތްތަކުގެ ލިސްޓު އާއްމުކުރާނެ ކަމަށް ޕެންޝަން އޮފީހުން ބުންޏެވެ.
ޕެންޝަން ފަންޑުން ހައްޖަށް ދެވޭ ގޮތަށް ޕެންޝަނާ ބެހޭ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން ފާސްކޮށްފައިވަނީ މިދިޔަ ފެބްރުއަރީ މަހު 27 ވަނަ ދުވަހު އެވެ.