ޒަރޫރީ ބޭނުންތައް ފުއްދަން ކަމަށް ބުނެ މާލޭގެ ބާޒާރު މަތީގައި ސަލާން ޖަހަމުން ދިޔަ 20 މީހެއްގެ ހާލަތު ދެނެގަނެ، އެ އެންމެނަށް ޖެންޑާ މިނިސްޓްރީން އެހީވެ ދީފި އެވެ.
މާލޭގެ ބާޒާރުމަތީ އެކި ސަރަހައްދުތަކަށް ޖަމާވެ ސަލާން ޖަހާ މީހުންތަކެއް އަބަދު ވެސް އުޅެ އެވެ. ނަމަވެސް ޖެންޑާ މިނިސްޓްރީން ބުނީ ބާޒާރުމަތީގައި ޒަރޫރީ ބޭނުންތަކަށް ސަލާން ޖަހަމުންދާ ބަޔަކު އުޅޭކަން އެ މިނިސްޓްރީއަށް ފާހަގަ ކުރެއްވިފައިވާ ކަމަށެވެ.
މިނިސްޓްރީން އެހެން ބުނި އިރު ދުރާލައި އިއުލާން ކުރުމަށްފަހު ޖެންޑާ މިނިސްޓަރު ޝިދާތާ ޝަރީފު މިިދިޔަ ފެބްރުއަރީ ވަނީ ސަލާން ޖަހާ މީހުން އުޅޭ ސަރަހައްދަށް ޒިޔާރަތް ކުރައްވާފަ އެވެ.
އާންމުކޮށް "އެއް ކަރުދާސް ކޮށްފައިވާ" ލިޔުން މެދުބވެރިކޮށް މީޑިއާއަށް މައުލޫމާތު ދޭ ޖެންޑާއިން މިއަދު ވަނީ ބާޔާނެއް އާންމުކޮށްފަ އެވެ. އެ ބަޔާނުގައި ބުނަނީ ސަލާން ޖަހާ މީހުންގެ މައްސަލަ ހައްލު ކުރަން ހަތަރު ބޭފުޅެއްގެ މައްޗަށް އިންޓަވެންޝަން ކޮމެޓީ އެއް މިނިސްޓަރު ޝިދާތާ އެކުލަައްވާފައިވާ ކަމަށާއި އެ ކޮމިޓީން ކުރި މަސައްކަތުން ސަލާން ޖަހާ މީހުންގެ ތެރެއިން ޒަރޫރީ ބޭނުންޖެހިފައިވާ 20 މީހެއްގެ ހާލަތު ދެނެގެންފައިވާ ކަމަށެވެ.
އެ މީހުންގެ ތެރޭގައި ތިބި އިޖުތިމާއީ ރައްކާތެރިކަމުގެ ނިޒާމުގެ ތެރެއިން ތަފާތު އެކި އިނާޔަތްތަކުގެ ޝަރުތު ހަމަވި ނަމަވެސް މިހާތަނަށް އެފަދަ އިނާޔަތެއް ލިބެމުން ނުދާ ފަރާތްތަކަށް އިނާޔަތްތަކުގެ މައުލޫމާތު ފޯރުކޮށްދިން އިރު އިނާޔަތް ލިބޭނެ މަގު ފަހިކޮށްދީފައިވާ ކަމަށް މިނިސްޓްރީގެ ބަޔާން ބުނެ އެވެ.
އަދި އޭގައި ބުނެފައިވާ ގޮތުގައި ސަލާންޖަހާ މީހުންގެ ތެރެއިން ދިވެހި ރައްޔިތެއްކަން އަންގައިދޭ ކާޑާއި އެފަދަ މުހިއްމު ލިޔެކިޔުންތައް ނެތް ފަރާތްތަކަށް އެ ތަކެތި ހޯދައިދިނުމުގައި އެހީތެރިކަން ވެސް ދިނެވެ.
މީގެ އިތުރުން ބޭސް ފަރުވާ ކުރަން ނުކުޅެދީފައިވާ ފަރާތްތައް ޑޮކްޓަރަށް ދައްކައި ސިއްހީ އެހީތެރިކަން ފޯރު ކޮށްދިނުމަށް އެކަމާ ގުޅޭ މުއައްސަސާތަކާއި ގުޅުވައިދީފައިވާއިރު ވަޒީފާއެއް ހޯދައި ދޭން އެދުނު ފަރާތްތަކުގެ ތެރެއިން ތިން މީހަކު ވަޒީފާ ދޭ ފަރާތްތަކާ ގުޅުވައިދީ އިތުރު މީހަކަށް ވަޒީފާ ހަމަޖައްސައިދިން ކަމަށް ވެސް ޖެންޑާގެ އެއް ކަރުދާސްކޮށްފައިވާ ބަޔާނުގައި ވެއެވެ.